តើទំនាក់ទំនងរវាងចិន និងអូស្រា្តលីអាចស្គាល់ភាពធូរស្រាលជាមួយនាយករដ្ឋមន្រ្តីថ្មីអូស្រា្តលីដែរ ឬទេ?
នៅក្នុងប្រទេសចិន នាយករដ្ឋមន្រ្តីលោកលី ខឺជាំងបានផ្ញើសារអបអរសាទរនាយករដ្ឋមន្រ្តីថ្មីអូស្រា្តលីលោកអង់តូនី អាល់បានីស៊ី។ « ភាគីចិនត្រៀមខ្លួនធ្វើការជាមួយភាគីអូស្រ្តាលីដើម្បីឈានទៅបិទបញ្ចប់ភាពចម្រូងចម្រាសលើរឿងអតីតកាល និងសម្លឹងមើលអនាគតកាលដើម្បីលើកកម្ពស់ និងជំរុញភាពជាដៃគូយុទ្ធសាស្រ្តរួម » នេះជាសម្តីរបស់លោកលី ខឺជាំងដែលទីភ្នាក់ងារសារព័ត៌មានផ្លូវការចិនស៊ីនហួរបានចុះផ្សាយនាយប់ថ្ងៃចន្ទ ទី២៣ ឧសភា។ គួររម្លឹកថា ចិន និងអូស្រា្តលីក្នុងជំនាន់នាយករដ្ឋមន្រ្តីលោកស្កុត ម៉ូរីសុនបានស្គាល់ទំនាក់ទំនងតានតឹងខ្លាំងដោយក្រុងកង់បេរ៉ាបានទាមទារឲ្យមានការស៊ើបអង្កេតអន្តរជាតិស្តីពីប្រភពដើមនៃមេរោគកូវីដ១៩ និងការដែលអូស្តា្រលីមិនឲ្យក្រុមហ៊ុនចិន Huawei ចូលរួមសាងសង់បណ្តាញទូរគមនាគមន៍ 5G។ ក្រុងប៉េកាំងបានឆ្លើយបកវិញដោយឈប់ទិញផលិផលអូស្រា្តលីមួយចំនួន ដូចជាធ្យូងថ្ម ឬស្រា។ យ៉ាងណាក៏ដោយ អ្នកស្រាវជ្រាវ និងអ្នកជំនាញ លោកបារតេឡេមី គួរម៉ុងបានយល់ឃើញថា នាយករដ្ឋមន្រ្តីថ្មីអូស្រា្តលីលោកអង់តូនី អាល់បានីស៊ីចេញពីគណបក្សពលករត្រូវស្វែងរកតុល្យភាពនៃទំនាក់ទំនងរវាងអូស្រា្តលី និងអាមេរិក ហើយរវាងអូស្រា្តលី និងចិន។
ចុះផ្សាយនៅថ្ងៃ៖
ស្តាប់ - ០១:៤៧
« យុទ្ធនាការឃោសនាបោះឆ្នោតនៅអូស្រា្តលីកន្លងមកបានធ្វើឡើងនៅក្នុងបរិបទនៃការបង្កើតសម្ព័ន្ធយោធាត្រីភាគី AUKUS ដែលមានអូស្រា្តលី អង់គ្លេស និងអាមេរិក និងការដែលអូស្រា្តលីបានបោះបង់ចោលវិញនូវកិច្ចសន្យាទិញនាវាមុជទឹកបារាំងកាលពីខែកញ្ញាកន្លងទៅ។ គេក៏បានដឹងផងដែរថា មានឥស្សរជនគ្រាក់ៗចេញពីគណបក្សពលករ ពិសេសអតីតនាយករដ្ឋមន្រ្តីលោកគេវីន រូដបានចេញមុខជាចំហដើម្បីរិះគន់ទិតៀនចាស់ដៃលើជំហររបស់ក្រុមអ្នកអភិរក្សនិយម។
ក្រុមគណបក្សពលករបានវាយប្រហារលើក្រុមអ្នកអភិរក្សនិយមដែលមានជំហរចាក់ស្របជាមួយអាមេរិក និងដែលបានចេញមុខប្រឆាំងចិនខ្លាំងក្លា។ ដូច្នេះ នេះជាវិញ្ញាសារ និងជាសមីការមួយដែលនាយករដ្ឋមន្រ្តីថ្មីលោកអង់តូនី អាល់បានីស៊ីត្រូវដោះស្រាយឲ្យបានឆាប់រហ័ស។ តើរដ្ឋាភិបាលថ្មីអូស្រា្តលីនឹងព្យាយាមរកឲ្យឃើញឡើងវិញដោយនៅម្ខាង នូវទម្រង់តុល្យភាពនៃភាពជិតស្និទ្ធជាយុទ្ធសាស្ត្រជាមួយសហរដ្ឋអាមេរិក រួមទាំងជាមួយប្រទេសសមាជិកផ្សេងទៀតក្នុងបក្សសម្ព័ន្ធក្វាដ « Quad »។
ហើយនៅម្ខាងទៀតក្នុងពេលជាមួយគ្នា រដ្ឋាភិបាលថ្មីអូស្រា្តលីត្រូវស្តារឡើងវិញនូវទំនាក់ទំនាក់សេដ្ឋកិច្ច និងពាណិជ្ជកម្មដ៏សំខាន់ខ្លាំងណាស់ជាមួយចិន។ ទំនាក់ទំនាក់សេដ្ឋកិច្ច និងពាណិជ្ជកម្មជាមួយចិននេះ គឺសំខាន់ជាងជាមួយអាមេរិកទៅទៀត។ ដូច្នេះគេអាចរង់ចាំថា នាយករដ្ឋមន្រ្តីថ្មីអូស្រា្តលីជាមនុស្សដែលបង្ហាញចេញនូវនយោបាយឆ្លាតជាងអតីតនាយករដ្ឋមន្រ្តី និងចេះបត់បែនពីជំហរនយោបាយដែលធ្លាប់មាននារយៈពេលប៉ុន្មានខែចុងក្រោយនេះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ