ជប៉ុនខឹងខ្លាំង ក្រោយពីយន្តហោះទម្លាក់គ្រាប់បែករបស់ចិននិងរុស្ស៊ីហោះរួមគ្នាក្បែរដីជប៉ុន
ថ្ងៃអង្គារ៍ទី២៤ឧសភា យន្តហោះទម្លាក់គ្រប់បែក ជាច្រើនគ្រឿង របស់ចិននិងរុស្ស៊ី បានហោះហើររួមព្រមគ្នា នៅក្បែរកៀកនឹងដែនដីរបស់ជប៉ុន។ ទង្វើនេះ ធ្វើឲ្យជប៉ុនខឹង និងបានប្រើមធ្យោបាយផ្លូវការទូត ដើម្បីបោះសម្តីព្រមាន ក្រុងប៉េកាំងនិងម៉ូស្កូ។ ព្រឹត្តិការណ៍នេះ ធ្លាក់ជួនចំពេលដែល បក្សសម្ព័ន្ធចតុភាគី ក្វាដ កំពុងតែជួបប្រជុំគ្នានៅក្រុងតូក្យូ ដើម្បីរកមធ្យោបាយទប់ទល់នឹងឥទ្ធិពលរបស់ចិន នៅតំបន់ឥណ្ឌូ-ប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០២:១៧
យន្តហោះទម្លាក់គ្រាប់បែក សរុបមានចំនួន ៤គ្រឿង ពីរជារបស់ចិន និងពីរគ្រឿងទៀតជារបស់រុស្ស៊ី ដែលហោះហើរនៅក្បែរកៀកកិចដែនសមុទ្រជប៉ុន។ មានយន្តហោះរុស្ស៊ីមួយ ក៏បានហើរឆ្លបយកការណ៍ ដោយបានហោះពីកោះហុកកៃដូ ឆ្ពោះទៅជ្រោយនូតុ របស់ជប៉ុនទៀតផង។ នេះជាអ្វីដែលរដ្ឋមន្ត្រីការពារជាតិជប៉ុន លោក Nobuo Kishi ថ្លែងប្រាប់អ្នកសារព័ត៌មាន និងបានសម្តែងខឹងសម្បារជាខ្លាំងទល់នឹងក្រុងប៉េកាំងនិងម៉ូស្កូ។
ការព្រលែងយន្តហោះសម្រាប់ច្បាំង ឲ្យហោះហើរនៅក្បែរដែនទឹកជប៉ុននេះ គឺនៅក្នុងថ្ងៃតែមួយ ដែលសម្ព័ន្ធមិត្តចតុភាគី សហរដ្ឋអាមេរិក អូស្ត្រាលី ឥណ្ឌា និង ជប៉ុន បានជួបប្រជុំគ្នានៅក្រុងតូក្យូ ដើម្បីរកមធ្យោបាយទប់ទល់នឹងឥទ្ធិពលកាន់តែខ្លាំងៗរបស់ចិន ទាំងផ្នែកសេដ្ឋកិច្ចនិងទាំងយោធា។ ចេតនាដែលរុស្ស៊ីនិងចិនក្នុងការប្រព្រឹត្តធ្វើដូច្នេះ គឺត្រូវរដ្ឋមន្ត្រីជប៉ុនចាត់ទុកថា ជាការញ៉ុះញ៉ុង់បង្កហេតុ និងជាការកំញើញគំរាមគំហែង។
ទោះបីជាម្តេចក្តី ភាគីជប៉ុននៅតែឲ្យតម្លៃលើផ្លូវការទូត។ រដ្ឋមន្ត្រីការពារជាតិជប៉ុន មានប្រសាសន៍ប្រាប់អ្នកកាសែតថា តាមផ្លូវការទូត ជប៉ុនសម្តែងក្តីព្រួយបារម្ភជាពន់ពេក និងសូមបង្ហាញពីទស្សនៈយល់ឃើញចំពោះប្រទេសជាតិជប៉ុននិងចំពោះសន្តិសុខក្នុងតំបន់។ មន្ត្រីជាន់ខ្ពស់ជប៉ុនរូបនេះ គូសបង្ហាញថា សហគមអន្តរជាតិកំពុងតែឆ្លើយតបចំពោះការឈ្លានពានរបស់រុស្ស៊ីនៅអ៊ុយក្រែន ហើយពេលនេះ ចិន ស្រាប់តែបានសហការជាមួយរុស្ស៊ី ធ្វើសកម្មភាពបែបនេះទៀត នៅក្បែរដីជប៉ុន នេះគឺការគួរឲ្យព្រួយបារម្ភណាស់ ហើយក៏មិនត្រូវមាក់ងាយស្ថានការណ៍នេះដែរ។
ជារបាយការណ៍ រដ្ឋមន្ត្រីជប៉ុនបានផ្តល់ឲ្យទីភ្នាក់ងារព័ត៌មានបារាំង AFP ថាចាប់ពីខែវិច្ឆិកាឆ្នាំមុនរហូតមកទល់ពេលនេះ មានយន្តហោះចិននិងរុស្ស៊ី បានហោះហើរក្បែរព្រំដែនជប៉ុន ចំនួន៤ដងលើក មកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ