ហ្វីលីពីន៖ កូនប្រុសអតីតមេដឹកនាំផ្តាច់ មានសំឡេងស្ទង់មតិថា អាចឈ្នះការបោះឆ្នោតប្រធានាធិបតី
នៅថ្ងៃច័ន្ទទី៩ឧសភា ពលរដ្ឋហ្វីលីពីន នឹងត្រូវទៅបោះឆ្នោត។ ការស្ទង់មតិចុងក្រោយ បង្ហាញថា កូនប្រុសរបស់អតីតមេដឹកនាំផ្តាច់ហ្វីលីពីន គឺមានសំឡេងភាគច្រើន ហើយនឹងអាចឈ្នះការបោះឆ្នោតក្លាយប្រធានាធិបតី។ ក៏ប៉ុន្តែ នេះជាក្តីបារម្ភខ្លាំងណាស់ សម្រាប់អ្នកការពារសិទ្ធមនុស្ស និង សហគមកាតូលិក ដែលពួកគេអះអាងថា បើគ្រួសារលោក Ferdinand Marcos មកកាន់អំណាចឡើងវិញ នោះគឺ ហ្វីលីពីន នឹងក្លាយជា«ឋាននរក»។ ចំពោះក្រុមបេក្ខជនប្រឆាំង ការបោះឆ្នោតលើកនេះ គឺការសមរភូមិប្រយុទ្ធដើម្បី«ព្រលឹងជាតិ» និងជាការប្រឆាំងនឹងអំណាចផ្តាច់ការឃោរឃៅព្រៃផ្សៃ។
ចុះផ្សាយនៅថ្ងៃ៖
ស្តាប់ - ០២:៥៩
ក្នុងការស្ទង់មតិចុងក្រោយ បង្ហាញថា លោក Ferdinand Marcos Junior អាចមានគេចង់បោះឆ្នោតឲ្យគាត់ ប្រមាណ៥៦ភាគរយ គឺច្រើនជាងគូប្រជែងលោកស្រី Leni Robredo ដែលបានត្រឹមតែ៣៣ភាគរយ។ ចំណែកបេក្ខជនផ្សេងទៀត មានសំឡេងតិចតួច ដែលចង់បោះឆ្នោតឲ្យ។
លោក Ferdinand Marcos Junior ជាកូនប្រុសរបស់លោក Ferdinand Marcos ដែលធ្លាប់បានកាន់អំណាចផ្តាច់ការ នៅហ្វីលីភីន អំលុងទសវត្សរ៍១៩៧០និង៨០ ដែលបានធ្វើឲ្យមនុស្ស ៧ម៉ឺននាក់ ត្រូវគេសម្លាប់ ត្រូវរងទារុណកម្ម និងត្រូវគេរំលោភផ្លូវភេទ។ នេះបើតាមអង្គការ Amnesty International។ លោកFerdinand Marcos បានភៀសខ្លួនរត់ចោលស្រុក និងស្លាប់នៅសហរដ្ឋអាមេរិក ឆ្នាំ១៩៨៧។ លោកត្រូវជាប់ឈ្មោះថា ជាមេដឹកនាំផ្តាច់ការ និងបានលួចលុយជាតិ ១០ពាន់លានដុល្លារ។
នៅពេលនេះ កូនប្រុសរបស់លោកបានឈានឆ្ពោះទៅការកាន់អំណាចឡើងវិញនៃគ្រួសារអ្នកនយោបាយ Marcos។ អ្នកវិភាគនយោបាយហ្វីលីពីន មើលឃើញថា Ferdinand Marcos Junior បានប្រើយុទ្ធសាស្ត្រនយោបាយគ្មានតម្លាភាព។ លោកមិនព្រមផ្តល់សម្ភាសជាមួយអ្នកកាសែត ឬជៀសវាងការសួរដេញដោលទស្សនគំនិតដឹកនាំប្រទេសរបស់លោក។ លោកមិនផ្តល់សម្ភាសតាមទូរទស្សន៍ជាមួយអ្នកសារព័ត៌មានជំនាញ។ លោកនិយាយតែតាមបណ្តាញសង្គមផ្ទាល់ខ្លួន ដែលចង់និយាយពីអ្វីស្រេចតែចិត្ត ដោយគ្មានអ្នកសួរទប់ឬដេញដោល ហើយនៅតាមបណ្តាញសង្គម ដូចជាYoutube លោកបង្ហាញពីភាពមានបាននិងទ្រព្យសម្បត្តិ ដើម្បីទាក់ទងចិត្តយុវជនហ្វីលីពីន ដែលកំពុងអត់ការងារនិងដែលកំពុងតែអស់សង្ឃឹម ឲ្យគិតថា គ្រួសារអ្នកនយោបាយនិងអ្នកមានមហាសាលនេះ នឹងធ្វើឲ្យសេដ្ឋកិច្ចជាតិរីកចម្រើនឡើង និងបង្កើតការងារឲ្យពួកគេ។ យុទ្ធសាស្ត្រនេះ បានទាក់ចិត្តយុវជនច្រើន ឲ្យគាំទ្ររូបលោក។ យុវជនទាំងនោះជាមនុស្សកើតក្រោយសម័យផ្តាច់ការរបស់ឪពុក Ferdinand Marcos និងមិនស្គាល់ច្បាស់ពីប្រវត្តិពុករលួយរបស់គ្រួសារនេះទេ។
ម្យ៉ាងវិញទៀត ការចងសម្ព័ន្ធភាពជាមួយនឹងលោកស្រី Sara Duterte ជាកូនស្រីរបស់ប្រធានាធិបតីជិតផុតអាណត្តិ Rodrigo Duterte ក៏រឹងរឹតធ្វើឲ្យ Ferdinand Marcos Junior កាន់តែមានសំឡេងគាំទ្រច្រើនឡើងៗ។ កាលពីថ្ងៃសៅរ៍ ក្នុងយុទ្ធនាការឃោសនាចុងក្រោយ លោក Ferdinand Marcos Junior បានថ្លែងថា ខ្លួននឹងឈ្នះ និងបានសន្យាថា គ្មានរឿងទារុណកម្មទុក្ខវេទនាកើតមានជាថ្មីឡើយ។
ចំណែក ក្រុមអ្នកប្រឆាំងនិងក្រុមអង្គការសិទ្ធិមនុស្ស បារម្ភក្លាចក្រែងថា បើជាប់ឆ្នោត គឺលោកអាចនឹងកែប្រែរដ្ឋធម្មនុញ លុបបំបាត់មាត្រាចែងពីការកំណត់អាណត្តិប្រធានាធិបតី ឲ្យកាន់អំណាចត្រឹមតែមួយអាណត្តិ ៦ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ