ចិន-កូវីដ១៩៖បន្ទាប់ពីក្រុងសៀងហៃ ក្រុងប៉េកាំងពង្រីកការធ្វើតេស្តិ៍ និងកំពុងប្រឈមនឹងការបិទខ្ទប់?
នៅក្នុងប្រទេសចិន រដ្ឋអំណាចក្រុងសៀងហៃបានប្រកាសនាថ្ងៃអង្គារ ទី២៦ មេសាពីការស្លាប់ថ្មីដោយកូវីដ១៩ ចំនួន ៥២នាក់ និងរកឃើញអ្នកឆ្លងថ្មីចំនួន ១៧ ០០០នាក់ក្នុងរយៈពេល ២៤ម៉ោងចុងក្រោយ។ ដោយឡែក ខណៈដែលអ្នកក្រុងសៀងហៃទាំង ២៥លាននាក់កំពុងបន្តស្ថិតក្នុងការបិទខ្ទប់តាំងពីដើមខែមេសា រដ្ឋអំណាចក្រុងប៉េកាំងបាន និងកំពុងពង្រីកយុទ្ធនាការធ្វើតេស្តិ៍រកកូវីដ១៩ លើពលរដ្ឋទាំង ២២លាននាក់ និងផ្តើមចាត់វិធានការតឹងរឹងមួយចំនួន។ ខណៈនេះ អ្នកក្រុងប៉េកាំងកំពុងបារម្ភពីការបិទខ្ទប់ទូទៅដូចអ្នកក្រុងសៀងហៃដែរ។
ចុះផ្សាយនៅថ្ងៃ៖
ស្តាប់ - ០២:០៣
រហូតមកដល់ថ្ងៃនេះ ស្ថានការណ៍ក្នុងក្រុងប៉េកាំងនៅមិនទាន់ធ្ងន់ធ្ងរដូចនៅក្រុងសៀងហៃនៅឡើយមែន តែជាស្ថានការណ៍មួយដែលរដ្ឋអំណាចមិនអាចធ្វេសប្រហែស និងមើលរំលងបានទេ។ រកឃើញករណីវិជ្ជមានកូវីដ១៩ ប្រមាណជា ១០០នាក់នាសប្តាហ៍កន្លងទៅ រដ្ឋអំណាចក្រុងប៉េកាំងបានប្រកាសពីការរកឃើញវិជ្ជមានថ្មីចំនួន ៣៣ករណីនៅថ្ងៃអង្គារ ទី២៦ មេសា។ ប្រឈមនឹងកំណើនករណីឆ្លង និងដើម្បីកំណត់អត្តសញ្ញាណ រួមទាំងធ្វើចត្តាឡីស័កអ្នកវិជ្ជមានឲ្យបានលឿនបំផុត រដ្ឋអំណាចក្រុងប៉េកាំងបានពង្រីកយុទ្ធនាការធ្វើតេស្តិ៍ដល់ទៅ ១២សង្កាត់ក្នុងចំណោម ១៦សង្កាត់។
នៅថ្ងៃអង្គារ ទី២៦ មេសា យុទ្ធនាការធ្វើតេស្តិ៍បានចាប់ផ្តើមនៅក្នុងសង្កាត់ថ្មីចំនួន ១១សង្កាត់ដែលមានពលរដ្ឋសរុបប្រមាណជា ២០លាននាក់។ ទន្ទឹមនឹងយុទ្ធនាការធ្វើតេស្តិ៍ទ្រង់ទ្រាយធំ រដ្ឋអំណាចក៏បានចាប់ផ្តើមដាក់ចេញនូវវិធានការរឹតបន្តឹងមួយចំនួន។ ជាក់ស្តែង ការបិទទ្វារទីកន្លែងហាត់កីឡាជាច្រើនរហូតដល់មានការជូនដំណឹងថ្មី ការតាំងពិព័ណ៌ ពិធីមង្គលការ ការរៀបចំទស្សនីយភាព និងការប្រកួតកីឡានានាត្រូវបានព្យួរមួយរយៈ ហើយព្រះវិហារពុទ្ធសាសនាទីតេឈ្មោះ ឡាម៉ាសនឹងត្រូវបិទទ្វារចាប់ពីថ្ងៃពុធ ទី២៧ មេសា។
ទោះជាយ៉ាងនេះក្តី ការរស់នៅប្រចាំថ្ងៃរបស់អ្នកក្រុងប៉េកាំងហាក់នៅមានសភាពធម្មតា ព្រោះភោជនីយដ្ឋាន ហាងលក់ទំនិញ រោងកុន និងការិយាល័យធ្វើការនៅបន្តបើកទ្វារជាធម្មតា។ តែគេបានសង្កេតឃើញថានារយៈពេលប៉ុន្មានថ្ងៃចុងក្រោយនេះ អ្នកក្រុងប៉េកាំងបាននាំគ្នាផ្អើលទិញម្ហូបអាហារស្តុក ដូចជាសាច់ បន្លែ ផ្លែឈើ ឬមួយទឹកសុទ្ធ។ អ្វីដែលពួកគេបារម្ភ គឺខ្លាចទទួលរងការបិទខ្ទប់ដូចអ្នកក្រុងសៀងហៃ នោះបើទោះបីជាពេលនេះ រដ្ឋអំណាចក្រុងប៉េកាំងមិនបានលើកឡើងពីលទ្ធភាពនៃការបិទខ្ទប់ទាំងស្រុងក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ