សហរដ្ឋអាមេរិកនិងហ្វីលីន ធ្វើសមយុទ្ធរួមគ្នាទ្រង់ទ្រាយធំ
សមយុទ្ធទ្រង់ទ្រាយធំ រវាងសហរដ្ឋអាមេរិកនិងហ្វីលីពីន ចាប់បើកពីថ្ងៃចន្ទទី ២៨ មីនា និងក្នុងរយៈពេល១២ថ្ងៃ នៅកោះ Luçon កោះដែលធំជាងគេរបស់ហ្វីលីពីន។ នេះជាលំហាត់សឹកប្រចាំឆ្នាំ ជាលើកចុងក្រោយសម្រាប់លោកប្រធានាធិបតីហ្វីលីពីន ឌុយទែរតេ ដែលដំបូងចង់ផ្តាច់ហ្វីលីពីនពីសម្ព័ន្ធភាពយោធាជាមួយអាមេរិក ហើយងាកទៅស្រវារកចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
បន្ទាប់ពីបានលុបចោល ឬបង្រួមតូច ដោយហេតុកូវីដ នៅឆ្នាំនេះ ហ្វីលីពីនបានសម្រេចបើកធ្វើសមយុទ្ធប្រចាំឆ្នាំ ជាទ្រង់ទ្រាយធំឡើងវិញ ដោយប្រសិទ្ធនាមថាសមយុទ្ធបាលីកាតង់ ដែលមានន័យថាជាសមយុទ្ធរឹតចំណងសម្ព័ន្ធភាពយោធាអាមេរិកហ្វីលីពីនឱ្យកាន់តែស៊ីជម្រៅ។ នេះបើតាមប្រសាសន៍របស់មេបញ្ជាកងទ័ពហ្វីលីពីន លោកឧត្តមសេនីយ៍ Andres Centino។ ជាសមយុទ្ធ “មិត្តភាពនិងទំនុកចិត្ត” រវាងកងកម្លាំងយោធាពីរប្រទេស ដែលនឹងរួមគ្នាឈ្នះក្នុងប្រតិបត្តិការយោធា។ នេះជាសំដីរបស់មេបញ្ជាការអាមេរិកលោកឧត្តមសេនីយ៍ Jay Bargeron ក្នុងពេលប្រកាសបើកសមយុទ្ធ។
សមយុទ្ធបានចាប់ផ្តើម ដោយមានទាហានអាមេរិកនិងហ្វីលីពីន ចូលរួមចំនួនជិត៩ពាន់នាក់ ហាត់ចេញធ្វើប្រតិបត្តិការក្នុងទឹក លើគោក និងដោយហាត់បាញ់គ្រាប់កាំភ្លើងពិតៗផង។ ជាសមយុទ្ធដែលមានកម្មវត្ថុផ្តោតលើការការពារសន្តិសុខដែនទឹក ប្រយុទ្ធប្រឆាំងនឹងភេរវនិយម ប្រតិបត្តិការជំនួយមនុស្សធម៌ និងប្រតិបត្តិការសង្គ្រោះក្នុងករណីមានមហន្តរាយ។ ពោលគឺខុសស្រលះពីសមយុទ្ធមុនៗដែលមានប្រធានបទ ត្រៀមប្រឈមនឹងជម្លោះក្នុងសមុទ្ទចិនខាងត្បូង ជាប់ជម្លោះជាមួយចិន ហើយចិនទាមទារគ្រប់គ្រងទាំងស្រុង។
គ្រាន់តែបានឡើងកាន់អំណាចជាប្រធានាធិបតីហ្វីលីពីន នៅឆ្នាំ២០១៦ ភ្លាម លោក ឌុយទែរតេ បានប្រកាន់នយោបាយងាកខិតទៅរកចិន ហើយបានប្រកាសចេតនាចង់ដើរចេញពីកិច្ចព្រមព្រៀង VFA (Visiting Forces Agreement) ឬចំណងសម្ព័ន្ធភាពយោធាដែលផ្តល់សិទ្ធិស្របច្បាប់ឱ្យកងទ័ពអាមេរិកឈរជើងនៅហ្វីលីពីននិងរៀបចំលំហាត់សឹករួមគ្នាជារៀងរាល់ឆ្នាំ នៅខែកុម្ភៈ២០២០ទៀត។ ប៉ុន្តែ នៅខែកក្កដា២០២០ដែល លោកឌុយទែរតេ បានប្តូរចិត្តវិញ នៅពេលឃើញមតិសាធារណៈ និងយោធាហ្វីលីពីន ព្រួយបារម្ភខ្លាំងនឹងមហិច្ឆតាចិនក្នុងតំបន់សមុទ្ទចិនខាងត្បូង និងជាពិសេស ក្រោយពីមានភាពតានតឹងជាមួយចិន ដែលបានបញ្ជូននាវាយោធារាប់រយគ្រឿង ចូលមកតំបន់ថ្មប្រះទឹក បញ្ឈរតាមបណ្តោយឆ្នេររបស់ហ្វីលីពីន។
ប៉េកាំងមិនខ្វល់នឹងសេចក្តីសម្រេចរបស់តុលាការយុត្តិធម៌អន្តរជាតិ កាលពីឆ្នាំ២០១៦ថាចិនគ្មានសិទ្ធជាប្រវត្តិសាស្ត្រនៅសមុទ្ទចិនខាងត្បូង ដ៏សម្បូរបែបខាងធនធានធម្មជាតិក្រោមទឹកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ