ប្រមុខការទូតចិនទៅឥណ្ឌា ដើម្បីស្តារទំនាក់ទំនងឱ្យប្រសើរឡើង
ឥណ្ឌានិងចិន បាននិងកំពុងខិតខំស្តារទំនាក់ទំនងគ្នាឱ្យបានប្រសើរឡើង។ គិតចាប់តាំងពីខែមិថុនាឆ្នាំ២០២០ ថ្ងៃដែលមានការប៉ះទង្គិចប្រដាប់អាវុធនៅតាមព្រំដែនមក នៅថ្ងៃសុក្រទី ២៥មីនា២០២២នេះ ជាលើកទីមួយដែលរដ្ឋមន្ត្រីការបរទេសចិន លោក វ៉ាង យី បានអញ្ជើញទៅបំពេញទស្សនកិច្ច នៅទីក្រុងញូវដេលី។
ចុះផ្សាយនៅថ្ងៃ៖
ស្តាប់ - ០១:៥៦
ក្រោយជំនួបរវាងលោកប្រមុខការទូតចិន វ៉ាងយី និងសមភាគីឥណ្ឌាលោក ចៃស្ហាន់ការ Jaishankar ចិនបានអះអាងនៅក្នុងសេចក្តីថ្លែងការណ៍ថា “ប៉េកាំងចង់ឃើញប្រទេសជាប់ព្រំដែនគ្នាទាំងពីរ ធ្វើការរួមគ្នាដើម្បីសន្តិភាពនិងស្ថិរភាពតំបន់ និងសន្តិភាពនៅលើពិភពលោក។ នៅពេលចិននិងឥណ្ឌា និយាយក្នុងសំឡេងតែមួយ នោះពិភពលោកទាំងមូលនឹងស្តាប់បាន។ ចិនចង់ឃើញប្រទេសទាំងពីរ ពង្រឹងការប្រាស័យទាក់ទងគ្នា និងកិច្ចសហប្រតិបត្តិការ ពង្រឹងការគាំទ្រគ្នាទៅវិញទៅមក និងផ្តល់សញ្ញាវិជ្ជមានលើកស្ទួយនយោបាយពហុជាតិនិយម”។ នេះបើតាមសេចក្តីថ្លែងការណ៍ចិនដដែល។
ប៉ុន្តែភាគីឥណ្ឌាមិនសូវបង្ហាញសុទិដ្ឋនិយមទេ លោកប្រមុខការទូតឥណ្ឌា បានលើកឡើង ថា ជំនួបប្រជុំថ្នាក់មេបញ្ជាការជាន់ខ្ពស់យោធា ចំនួន១៥លើក គិតចាប់តាំងពីឆ្នាំ២០២០មក វិវឌ្ឍទៅដោយយឺតៗបំផុត មិនដូចការប្រាថ្នាចង់បានទេ។ ភាពតានតឹងតាមព្រំដែននៅតែបន្តប៉ះពាល់ដល់ទំនាក់ទំនងចិន-ឥណ្ឌាដដែល។ ដូច្នេះ បើគេសួរថាតើទំនាក់ទំនងរវាងប្រទេសទាំងពីរបានជានាធម្មតាឡើងវិញហើយនៅថ្ងៃនេះ ចម្លើយគឺ “ទេ”។ នេះជាការបញ្ជាក់បន្ថែមរបស់លោក ចៃស្ហានការ
ធ្លាប់មានសង្គ្រាមនឹងគ្នានៅឆ្នាំ១៩៦២ កាលពីខែមិថុនា២០២០ ជាលើកទីមួយគិតចាប់តាំងពីឆ្នាំ១៩៧៥មក ដែលទាហានឥណ្ឌានិងចិនបានប្រយុទ្ធគ្នាមួយប្រាវ នៅតាមព្រំដែន រហូតបង្កឱ្យមានស្លាប់២០នាក់ខាងឥណ្ឌា និង៤នាក់ខាងចិន។ ហេតុការណ៍នោះបានធ្វើឱ្យទំនាក់ទំនងឥណ្ឌាចិនធ្លាក់ដុនដាបយ៉ាងខ្លាំង ហើយម្ខាងៗសុទ្ធតែបាននាំគ្នាពង្រឹងកម្លាំងយោធានៅតាមព្រំដែនរៀងខ្លួនៗ។
សម្រាប់ពេលនេះ អ្វីដែលប្រទេសទាំងពីរមានជំហរដូចគ្នា គឺចិននិងឥណ្ឌា បានបោះឆ្នោតអនុវប្បវាទដូចគ្នានៅអង្គការសហប្រជាជាតិ មិនថ្កោលទោសទង្វើឈ្លានពានរបស់រុស្ស៊ីលើអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ