កូវីដ១៩ ៖ ប្រឈមនឹងអូមីក្រុង ហុងកុងតម្រូវឱ្យពលរដ្ឋមានបណ្ណវ៉ាក់សាំង
ប្រឈមនឹងរលកចម្លងកូវីដបំប្លែងខ្លួនអូមីក្រុង អាជ្ញាធរហុងកុងបានសម្រេចដាក់ឱ្យដំណើរការបណ្ណចាក់ថ្នាំបង្ការ។ ចាប់ពីសប្តាហ៍នេះតទៅ ពលរដ្ឋហុងកុង ត្រូវមានបណ្ណបញ្ជាក់ថាបានចាក់វ៉ាក់សាំងរួចហើយនៅជាប់នឹងខ្លួន បើពុំនោះទេពួកគេនឹងរងការផាកពិន័យ។
ចុះផ្សាយនៅថ្ងៃ៖
ស្តាប់ - ០២:២១
ពលរដ្ឋហុងកុង ចាប់ពីអាយុ១២ឆ្នាំឡើងទៅ ត្រូវមានបណ្ណវ៉ាក់សាំង បញ្ជាក់ថាបានទទួលថ្នាំបង្ការយ៉ាងហោចណាស់ក៏មួយដូសដែរ ឬមានលិខិតបញ្ជាក់ “ករណីលើកលែង” ពីគ្រូពេទ្យ ទើបអាចចូលញ៉ាំតាមអាហារដ្ឋានបាន ចាប់ពីថ្ងៃព្រហស្បតិ៍ទី២៥កុម្ភៈតទៅ។ ពលរដ្ឋគ្រប់រូបត្រូវតែមានបណ្ណវ៉ាក់សាំង និងលិខិតលើកលែងពីគ្រូពេទ្យ នោះជាប់នឹងខ្លួន ដូចត្រូវកាន់អត្តសញ្ញាប័ត្រយ៉ាងដូច្នោះ។ នេះបើតាមសេចក្តីប្រកាសរបស់អគ្គលេខារងនៃស្ថាប័នចំណីអាហារនិងសុខភាព ដែលលម្អិតទៀតថា អាជ្ញាធរមិនតម្រូវឱ្យពលរដ្ឋហុងកុងទាំងអស់ ត្រូវតែបង្ហាញបណ្ណវ៉ាក់សាំង នៅពេលចូលផ្សារម្ហូប ផ្សារទំនើប មន្ទីរពេទ្យ ទីតាំងរដ្ឋបាលរដ្ឋទូទៅទេ ប៉ុន្តែភ្នាក់ងារមានសមត្ថកិច្ចនឹងធ្វើការឆែកឆេរ និងត្រួតពិនិត្យដោយចោះៗ ពលរដ្ឋគ្មានបណ្ណវ៉ាក់សាំងនឹងរងការផាកពិន័យភ្លាម។
បន្ទាប់មក នៅខែខាងមុខ ពលរដ្ឋហុងកុងត្រូវតែចាក់ថ្នាំបង្ការកូវីដ១៩ ឱ្យបានគ្រប់បីដូស។
លោកស្រីប្រមុខរដ្ឋាភិបាលហុងកុង ការី ឡាំ បានបង្ហាញក្តីសង្ឃឹមកាលពីខែមករាថា វិធានការតម្រូវឱ្យមានបណ្ណវ៉ាក់សាំង នឹងជំរុញឱ្យប្រជាពលរដ្ឋហុងកុង នៅនៅស្ទាក់ស្ទើរក្នុងចិត្ត រូតរះទៅទទួលថ្នាំបង្ការកូវីដ។ ការដាក់ឱ្យដំណើរការបណ្ណវ៉ាក់សាំង ជាវិធានការចុងក្រោយសម្រាប់ហុងកុង ដែលបើប្រៀបទៅនឹងបណ្តាប្រទេសជឿនលឿនដូចគ្នា មានអត្រាអ្នកចាក់វ៉ាក់សាំងទាបជាងគេបំផុតមួយ ៖ មនុស្សចាស់មិនដល់៥០%បានចាក់ថ្នាំបង្ការពីរដូស។
តាមគំរូប្រទេសចិន ហុងកុងបានអនុវត្តយុទ្ធសាស្ត្រហ្សេរ៉ូកូវីដ និងពុំមានករណីវិជ្ជមានកូវីដសោះ ក្នុងអំឡុងពេលជាច្រើនខែជាប់គ្នា ទើបពុំបានត្រៀមលក្ខណៈពន្លឿន និងជំរុញពលរដ្ឋឱ្យទៅចាក់ថ្នាំបង្ការ។
ប៉ុន្តែពេលនេះ ហុងកុង ត្រូវប្រឈមនឹងរលកចម្លងកូវីដយ៉ាងខ្លាំងក្លាបំផុត ដោយមានករណីឆ្លងថ្មី រាប់សិបពាន់នាក់ក្នុងមួយថ្ងៃៗ ហើយនេះគ្រាន់តែជាការចាប់ផ្តើមប៉ុណ្ណោះ នៅសប្តាហ៍ខាងមុខ ចំនួនអ្នកឆ្លងកូវីដ១៩ អាចឡើងដល់វាល់សែននាក់ក្នុងមួយថ្ងៃៗ។ នេះបើតាមការព្យាករណ៍របស់អ្នកជំនាញសាលាសុខាភិបាលសាធារណៈនៃសាកលវិទ្យាល័យហុងកុង។ បន្ថែមពីលើបណ្ណវ៉ាក់សាំង អាជ្ញាធរហុងកុងមិនអនុញ្ញាតឱ្យអ្នកវិជ្ជមានកូវីដ បង្ឃាំងខ្លួនព្យាបាលខ្លួនឯងនៅផ្ទះទេ។ ដោយមានជំនួយពីចិន ហុងកុងបានសម្រេចសាងសង់មន្ទីរពេទ្យ មណ្ឌលព្យាបាលអ្នកជំងឺថ្មី និងរឹបអូសយកបន្ទប់សណ្ឋាគារនានា សម្រាប់ឱ្យអ្នកជំងឺធ្វើចត្តាឡីស័ក។
នៅចំពោះជំហរប្រកាន់នយោបាយសូន្យកូវីដនេះ ពលរដ្ឋហុងកុងចាប់សម្រុកចាកចេញពីក្រុង។ បើតាមតួលេខរដ្ឋាភិបាល មានពលរដ្ឋជាង២៧៧០៣នាក់បានចាកចេញពីក្រុង។ គឺជាចំនួនដ៏ច្រើនបំផុតមិនធ្លាប់មានទេ សម្រាប់រដ្ឋធានីហិរញ្ញវត្ថុដែលពីមុនគេចាត់ទុកជាទីក្រុងអន្តរជាតិប្រចាំតំបន់អាស៊ីនោះ។ ជាងនេះទៅទៀត បើតាមអង្គការក្រៅរដ្ឋាភិបាល មានកម្មករបម្រើការតាមផ្ទះ ភាគច្រើនជាហ្វីលីពីន និងឥណ្ឌូណេស៊ី ច្រើនណាស់កំពុងត្រូវបានគេបណ្តេញចេញពីការងារនិងឱ្យនៅក្រៅផ្ទះ តែម្តងនៅពេលធ្វើតេស្តវិជ្ជមានកូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ