អាមេរិកថា កូរ៉េខាងជើង កំពុង “បង្កហេតុ” តែហៅឱ្យចូលចរចា
ទង្វើសាកល្បងមីស៊ីលបាលីស្ទិករបស់កូរ៉េខាងជើង កាលពីពេលថ្មីៗនេះ ជា សញ្ញាបញ្ជាក់ថា ព្យុងយ៉ាងកំពុងតែ “បង្ករឿង”។ នេះជាការយល់ឃើញរបស់លោករដ្ឋមន្ត្រីការបរទេសអាមេរិក អង់តូនី ប្លីងកិន ក្រោយពីបានជួបប្រជុំជាមួយសមភាគីជប៉ុននិងកូរ៉េខាងត្បូង នៅកោះហាវៃ។
ចុះផ្សាយនៅថ្ងៃ៖
ស្តាប់ - ០២:១៥
“ព្យុងយ៉ាងត្រូវតែបញ្ឈប់សកម្មភាពសាកល្បងមីស៊ីលបាលីស្ទិកខុសច្បាប់ ហើយត្រូវត្រលប់មកចូលតុចរចា” នេះជាសេចក្តីថ្លែងការណ៍រួមរបស់សហរដ្ឋអាមេរិក កូរ៉េខាងត្បូងនិងជប៉ុន ក្រោយជំនួបត្រីភាគថ្នាក់រដ្ឋមន្ត្រីការបរទេស នៅរដ្ឋហាវៃ នាថ្ងៃសៅរ៍ទី ១២កុម្ភៈ។ សេចក្តីថ្លែងការណ៍ដដែលបានចាត់ទុក ការសាកល្បងមីស៊ីលបាលីស្ទិក ទាំង៧លើក ក្នុងឆ្នាំ២០២២របស់កូរ៉េខាងជើង កន្លងមកនេះ បានបង្កឱ្យមានអស្ថិរភាពតំបន់ខ្លាំងណាស់។
លោក ប្លីងកិន និងសមភាគីកូរ៉េខាងត្បូង និងជប៉ុន បានអះអាងជាថ្មី ក្នុងសំឡេងតែមួយ អំពីសាមគ្គីភាពជាធ្លុងមួយ ប្រឈមនឹងការគំរាមកំហែងនុយក្លេអ៊ែរកូរ៉េខាងជើង។ ក្នុងសន្និសីទកាសែតរួម លោកប្រមុខការទូតអាមេរិក បានថែមទាំងប្រកាសចាត់ទុកសកម្មភាពសាកល្បងមីស៊ីលរបស់កូរ៉េខាងជើងកន្លងមក ដោយពាក្យធ្ងន់ៗថាជា ដំណាក់កាលបង្ករឿង។ ហើយសម្ព័ន្ធត្រីភាគី នឹងបន្តរិះរកគ្រប់មធ្យោបាយនាំកូរ៉េខាងជើងឱ្យព្រមទទួលខុសត្រូវចំពោះទង្វើរបស់ខ្លួន មានជាអាទិ៍ការដាក់ទណ្ឌកម្មលើបុគ្គលចំនួន៨នាក់និងអង្គការពាក់ព័ន្ធនឹងរបបព្យុងយ៉ាង ជាឧទាហរណ៍។
ប៉ុន្តែវ៉ាស៊ីនតោន តូក្យូ និងសេអ៊ូល គ្មានឆន្ទៈស្អប់ខ្ពើមព្យុងយ៉ាងទេ និងនៅតែបន្តចង់បើកកិច្ចចរចា ដោយគ្មានលក្ខខណ្ឌជាមួយកូរ៉េខាងជើងជានិច្ច។ នេះជាការគូសបញ្ជាក់បន្ថែមរបស់រដ្ឋមន្ត្រីទាំងបី។
សូមបញ្ជាក់ថា ជំនួបត្រីភាគី អាមេរិក ជប៉ុនកូរ៉េខាងត្បូង ប្រព្រឹត្តទៅក្នុងក្របខ័ណ្ឌនៃទស្សនកិច្ចមួយជុំតំបន់ប៉ាស៊ីហ្វិករបស់លោកប្រមុខការទូតអាមេរិក រយៈពេលមួយសប្តាហ៍ ដោយផ្តើមពីអូស្ត្រាលី ហ្វីជី និងបញ្ចប់នៅរដ្ឋហាវៃនេះឯង។ កាលនៅទីក្រុងមែលប៊ន លោក ប្លីងកិន បានជួបប្រជុំសម្ព័ន្ធចតុភាគី Quad អាមេរិកអូស្ត្រាលីជប៉ុននិងឥណ្ឌា ដើម្បីទប់ទល់ការពង្រីកឥទ្ធិពលក្នុងតំបន់អាស៊ីប៉ាស៊ីហ្វិករបស់ចិន។ ក្នុងអំឡុងពេលទស្សនកិច្ចមួយជុំនេះ អាមេរិកបានផ្សព្វផ្សាយឯកសារ១៨ទំព័រ បញ្ជាក់អំពីលក្ខណៈជាយុទ្ធសាស្ត្រនៃតំបន់ឥណ្ឌូប៉ាស៊ីហ្វិក សម្រាប់នយោបាយការបរទេស និងផលប្រយោជន៍អាមេរិក។ ជីវិតរបស់ប្រជាពលរដ្ឋអាមេរិកនិងមនុស្សលើពិភពលោក អាស្រ័យនឹងអ្វីដែលកើតឡើងនៅក្នុងតំបន់ឥណ្ឌូប៉ាស៊ីហ្វិកដ៏សំខាន់នេះហើយ។ នេះបើតាមការពន្យល់របស់លោកប្លីងកិនពីរដ្ឋហាវៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ