វៀតណាម៖ ព្រះសង្ឃដ៏មានឥទ្ធិពល ធីក ញឹតហាញ់សុគតក្នុងជន្មាយុ៩៥ព្រះវស្សា
ព្រះសង្ឃវៀតណាមព្រះនាម ធីក ញឹតហាញ់ (Thich Nhat Hanh) ដែលជាសង្ឃដ៏មានឥទ្ធិពលមួយអង្គនៅលើពិភពលោកផ្នែកអប់រំផ្លូវចិត្តបានសុគតក្នុងជន្មាយុ ៩៥វស្សាដោយជរាពាធនៅថ្ងៃសៅរ៍ ទី២២ មករា ឆ្នាំ២០២២។ ព្រះអង្គបានសុគតនៅឯវត្តធូហៀវក្នុងទីក្រុងហ៊ុយប្រទេសវៀតណាម បន្ទាប់ពីរស់នៅនិរទេសខ្លួនអស់រយៈពេលជាច្រើនឆ្នាំរួចមក។
ចុះផ្សាយនៅថ្ងៃ៖
ស្តាប់ - ០២:១៤
ព្រះសង្ឃធីក ញឹតហាញ់ ជាសង្ឃដឹកនាំផ្នែកអប់រំផ្លូវចិត្តដ៏ល្បីឈ្មោះនៅប្រទេសលោកខាងលិច ត្រូវបានគេមើលឃើញថាបុគ្គលទី២ បន្ទាប់ពីសម្តេចសង្ឃដាឡៃ ឡាម៉ា (Dalai Lama) ដែលបានចំណាយពេលជិត ៤ទសវត្សរ៍រស់នៅនិរទេសខ្លួនពីប្រទេសកំណើត។ ព្រះអង្គត្រូវបានបណ្តេញចេញពីប្រទេសវៀតណាមក្នុងទសវត្សរ៍ឆ្នាំ ១៩៦០ដោយសារតែបានប្រឆាំងនឹងសង្គ្រាមវៀតណាម-អាមេរិក។
ក្រោយចាកចេញពីប្រទេសកំណើត ព្រះអង្គបានចំណាយពេលរាប់ទសវត្សរ៍នៅក្នុងប្រទេសបារាំង ជាទីដែលព្រះអង្គបានបង្កើតវត្ត "Plum Village" និងបានបន្តបេសកកម្មបង្កើតវត្តអារាមនិងមជ្ឈមណ្ឌលសមាធិជាច្រើនកន្លែងនៅជុំវិញពិភពលោក។ គឺក្នុងអំឡុងពេលនេះហើយដែលប្រទេសលោកខាងលិចចាប់ស្គាល់សង្ឃពុទ្ធសាសនាអង្គនេះថាជាអ្នកតវ៉ាដ៏សកម្មទៅនឹងសង្គ្រាមវៀតណាម។
ព្រះសង្ឃដ៏មានឥទ្ធិពលមួយអង្គនេះតែងធ្វើដណើរនិងមានសង្ឃដីកាជាប្រចាំអំពីការអនុវត្តនៃការហាត់លត់អប់រំចិត្ត ការពិចារណាក៏ដូចជាសតិបញ្ញានៅអឺរ៉ុបនិងអាមេរិក។ ក្នុងពេលនៅមានព្រះជន្ម សង្ឃញឹតហាញ់បានសរសេរសៀវភៅជាង ១០០ក្បាលស្តីពីការគិតពិចារណា និងសមាធិ។ សៀវភៅចុងក្រោយរបស់ព្រះអង្គត្រូវបានបោះពុម្ពនៅខែតុលា ឆ្នាំ ២០២១។
ក្នុងឆ្នាំ ២០១៤ ព្រះសង្ឃញឹតហាញ់ បានរងគ្រោះពីជំងឺដាច់សរសៃឈាមខួរក្បាលរហូតលែងអាចមានសង្ឃដីកាបាន។ ៤ឆ្នាំក្រោយ ពោលនៅក្នុងឆ្នាំ២០១៨ ដោយទទួលបានការអនុញ្ញាតពីអាជ្ញាធរវៀតណាម ព្រះអង្គបានវិលត្រលប់ទៅស្រុកកំណើតក្នុងទីក្រុងហ៊ុយភាគកណ្តាលនៃប្រទេសដើម្បីចំណាយជីវិតចុងក្រោយនៅទីនោះ។ ក៏ប៉ុន្តែ ទីតាំងវត្តធូហៀវ កន្លែងដែលព្រះអង្គគង់នៅត្រូវបានតាមដានត្រួតពិនិត្យយ៉ាងដិតដល់ពីសំណាក់មន្ត្រីប៉ូលិសដែលស្លៀកពាក់ឯកសណ្ឋានស៊ីវិល។
នៅពេលនេះ គេនៅមិនទាន់ដឹងច្បាស់នៅឡើយទេថាតើរដ្ឋាភិបាលវៀតណាមនឹងមានប្រតិកម្មយ៉ាងណាចំពោះពិធីបុណ្យសពរបស់ព្រះអង្គដែលគ្រោងប្រារព្ធធ្វើរយៈពេល ៥ ថ្ងៃចាប់ពីថ្ងៃសៅរ៍ ទី ២២ខែមករាតទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ