អង្គការសហប្រជាជាតិថា នឹងព្យាយាមមិននាំយកជំងឺកូវីដ នៅពេលចូលទៅជួយសង្រ្គោះកោះតុងហ្កា
អង្គការសហប្រជាជាតិបាននិយាយធានាថា នឹងមិននាំចូលជំងឺកូវីដ ទៅក្នុងតុងហ្កា ដែលទើបរងខូចខាតធ្ងន់ធ្ងរដោយសារគ្រោះរលកយក្សស៊ូណាមី និងការផ្ទុះភ្នំភ្លើងក្រោមសមុទ្រ កាលពីថ្ងៃចុងសប្តាហ៍កន្លងទៅ។ នៅក្នុងសន្និសីទកាសែត នៅទីក្រុងហ្សឺណែវប្រទេសស៊្វ៊ីស កាលពីថ្ងៃអង្គារ អ្នកនាំពាក្យរបស់អង្គការសុខភាពពិភពលោក បានបញ្ជាក់ថា បេសកកម្មផ្តល់ជំនួយមនុស្សធម៌ដល់ប្រទេសប្រជុំកោះតុងហ្កា នឹងធ្វើឡើងដោយប្រយ័ត្នប្រយែងបំផុត ដើម្បីជៀសវាង មិននាំយកជំងឺរាតត្បាតកូវីដទៅចម្លងប្រជាជនតុងហ្កា។
ចុះផ្សាយនៅថ្ងៃ៖
ស្តាប់ - ០២:១២
នៅក្នុងដំណាក់កាលរៀបចំ នាំជំនួយមនុស្សធម៌ ទៅជួយតុងហ្កា នៅ៥ថ្ងៃក្រោយ តុងហ្កា រងគ្រោះដោយសាររលកយក្សស៊ូណាមី ដែលបង្កឡើងដោយកម្លាំងផ្ទុះភ្នំភ្លើងក្រោមសមុទ្រ អង្គការសហប្រជាជាតិ បានអះអាងថា គោលដៅដំបូងគេនៃបេសកកម្មនាំជំនួយមនុស្សធម៌របស់អង្គការសហប្រជាជាតិ ទៅតុងហ្កា គឺការមិននាំយកជំងឺកូវីដ ទៅឲ្យប្រជាជនតុងហ្កា។
តាមអ្នកនាំពាក្យរបស់ការិយាល័យសម្របសម្រួលជំនួយមនុស្សធម៌របស់អង្គការសហប្រជាជាតិ លោកJens Laekde គេនឹងគោរពអនុវត្តយ៉ាងម៉ត់ចត់ ច្បាប់ វិន័យរបស់រដ្ឋាភិបាលតុងហ្កា ស្តីពីជំងឺកូវីដ។
អង្គការសហប្រជាជាតិសន្យាថានឹងព្យាយាមធ្វើយ៉ាងណាឲ្យប្រទេសប្រជុំកោះ តុងហ្កា នៅបន្តជៀសឆ្ងាយពីជំងឺរាតត្បាតកូវីដ។ តុងហ្កា រាជាណាចក្រដ៏តូច នៅភាគខាងត្បូងមហាសមុទ្រប៉ាស៊ីហ្វិក ដែលមានប្រជាជនរស់នៅជាង ១សែននាក់ ជាប្រទេសគ្មានកូវីដ។
គិតចាប់តាំងពីផ្ទុះកើតមានជំងឺកូវីដ នៅក្នុងពិភពលោក តុងហ្កាមានករណីឆ្លងកូវីដតែមួយករណី លើកដំបូងតែប៉ុណ្ណោះ ដោយមកពីមានវិធានការគ្រងគ្រងកូវីដយ៉ាងតឹងរ៉ឹង។ តាមអង្គការសុខភាពពិភពលោកប្រជាជនតុងហ្កា ជាង ៦០%បានទទួលចាក់វ៉ាក់សាំងពេញលេញ។
សម្រាប់អ្នកនាំពាក្យរបស់អង្គការសុខភាពពិភពលោក លោក Christian Lindmeier វាជាសិទ្ធិសម្រេចចិត្តរបស់រាជរដ្ឋាភិបាលតុងហ្កា ដែលថា តើត្រូវផ្តោតអាទិភាពទៅខាងណា? តើត្រូវបន្តរក្សាច្បាប់ប្រឆាំងកូវីដដ៏តឹងរ៉ឹង ឬត្រូវការទទួលជំនួយបន្ទាន់ នៅក្រោយគ្រោះមហន្តរាយរលកយក្សស៊ូណាមី។ យ៉ាងណាក៏ដោយ ពីខាងអង្គការសុខភាពពិភពលោក អាទិភាពសំខាន់នៃបេសកកម្មផ្តល់ជំនួយមនុស្សធម៌ដល់ប្រជាជនតុងហ្កា គឺការមិននាំយកជំងឺកូវីដទៅប្រទេសប្រជុំកោះមួយនេះ។
គួរបញ្ជាក់ថា រលកយក្សស៊ូណាមី ដែលបង្កឡើងដោយគ្រោះថ្នាក់ផ្ទុះភ្នំភ្លើង កាលពីថ្ងៃសៅរ៍កន្លងទៅ បានសម្លាប់មនុស្ស២នាក់ បំផ្លាញផ្ទះសម្បែងជាង ៥០ខ្នង។ គិតរហូតមកដល់ថ្ងៃអង្គារ ការនាំយកជំនួយទៅជួយប្រទេសតុងហ្កា នៅជួបការលំបាក ដោយសារបណ្តាញទំនាក់ទំនង អ៊ីនធ័រនែត ភ្លើងអគ្គិសនី ត្រូវដាច់ រំខានដោយសាររលកយក្សស៊ូណាមី ទីលានចុះចតរបស់ព្រលានយន្តហោះ នៅគ្របដណ្តប់ដោយផេះដុំថ្ម ដែលបាចសាចចេញពីភ្នំភ្លើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ