ចិន៖មេរោគបំប្លែងខ្លួន « អូមីក្រុង » ចូលដល់ក្រុងប៉េកាំងតាមរយៈសំបុត្រមួយផ្ញើចេញពីប្រទេសកាណាដា
នៅក្នុងប្រទេសចិន រដ្ឋអំណាចសុខាភិបាលបានឲ្យដឹងនាថ្ងៃចន្ទ ទី១៧ មករាថា មេរោគបំប្លែងខ្លួន « អូមីក្រុង » មួយករណីដែលបានរកឃើញក្នុងក្រុងប៉េកាំងនាចុងសប្តាហ៍កន្លងទៅបានឆ្លងតាមសំបុត្រមួយផ្ញើចេញពីប្រទេសកាណាដា។ ការហ៊ានលើកឡើងយ៉ាងដូចនេះដោយរដ្ឋអំណាចសំអាងថា ស្រ្តីអ្នកទទួលសំបុត្រនោះមានវិជ្ជមានអូមីក្រុងនៅក្រោយទទួលសំបុត្រ។ តែរដ្ឋអំណាចបានធានាថា រូបស្រ្តីវិជ្ជមានអូមីក្រុងមិនបានចាកចេញពីក្រុងប៉េកាំងទេនារយៈពេលប៉ុន្មានសប្តាហ៍ចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:០៨
រហូតមកដល់ពេលនេះ រដ្ឋអំណាចសុខាភិបាលចិនមានការប្រយ័ត្នប្រយែងខ្លាំងចំពោះចំណីអាហារ កក ដែលនាំចូលពីក្រៅ។ តែឥឡូវនេះ សំបុត្រផ្ញើពីក្រៅកំពុងក្លាយជាផ្ទាំងស៊ីបថ្មីមួយទៀត។ សំបុត្រដែលរដ្ឋអំណាចសុខាភិបាលចិនចង់និយាយនេះ គឺសំបុត្រដែលបានផ្ញើចេញពីប្រទេសកាណាដាក្នុងថ្ងៃទី៧ មករាដោយបានឆ្លងកាត់សហរដ្ឋអាមេរិក និងហុងកុង មុននឹងទៅដល់អាកាសយានដ្ឋានក្រុងប៉េកាំងក្នុងថ្ងៃទី១០ មករា។ នៅមួយថ្ងៃក្រោយមក ពោលក្នុងថ្ងៃទី១១ មករា សំបុត្រនោះត្រូវបានប្រគល់ទៅឲ្យស្រ្តីម្នាក់ដែលរស់នៅក្នុងសង្កាត់ Haidian។
ក្រោយពីបានទទួលសំបុត្រ ស្រ្តីរូបនោះក៏មានវិជ្ជមានមេរោគបំប្លែងខ្លួនថ្មី « អូមីក្រុង » នេះជាការបញ្ជាក់របស់រដ្ឋអំណាចសុខាភិបាល។ ចំណែកនាយិការងរដ្ឋបាលប្រៃសណីយ៍ក្រុងប៉េកាំងបានលំអិតថា « អូមីក្រុង » ត្រូវបានរកឃើញនៅលើស្រោមសំបុត្រ និងនៅក្នុងសំបុត្រ។ ដោយឡែក បណ្តាញសារព័ត៌មានរដ្ឋបានចុះផ្សាយព័ត៌មានយ៉ាងលំអិតស្តីពីរូបស្រ្តីវិជ្ជមានអូមីក្រុងដែលមិនបានចាកចេញពីក្រុងប៉េកាំងក្នុងរយៈពេល ២សប្តាហ៍ចុងក្រោយនេះទេ។ មួយវិញទៀត ស្រ្តីរូបនោះក៏មិនបានជួបនរណាម្នាក់មកពីខាងក្រៅដែរ។
តែមុននឹងដឹងថាមានវិជ្ជមានអូមីក្រុង ស្រ្តីរូបនោះដដែលបានចេញដើរនៅក្នុងតំបន់ដែលខ្លួនរស់នៅ ដូចជាចូលបង្គន់សាធារណៈ ជិះរថយន្តក្រុង ចូលមើលល្ខោន ទៅលេងផ្ទះមិត្តភក្តិ ទៅញាំនៅភោជនីយដ្ឋាន ទៅទិញម្ហូបអាហារ ឬមួយក៏ទៅផ្សារទំនើបជាដើម។ ភ្លាមៗក្រោយពីដឹងថាស្រ្តីរូបនោះមានវិជ្ជមានអូមីក្រុង និងក៏ដូចជាមានផ្ទុះករណីឆ្លងថ្មី រដ្ឋអំណាចបើកយុទ្ធនាការធ្វើតេស្តិ៍ទ្រង់ទ្រាយធំ។ ជាក់ស្តែងនៅផ្សារទំនើបដែលស្រ្តីរូបនោះបានទៅ រដ្ឋអំណាចបានបោះតង់ធំមួយនៅខាងក្រៅដើម្បីធ្វើតេស្តិ៍។ តែខណៈនេះ ការធ្វើតេស្តិ៍លើករណីទាក់ទងជាង ១៣ ០០០នាក់បានបញ្ជាក់ពីលទ្ធផលអវិជ្ជមានទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ