វិបត្តិកាហ្សាក់ស្ថាន៖ ប្រទេសលោកខាងលិចបារម្ភពីការបញ្ជូនទ័ពរុស្ស៊ីទៅកាហ្សាក់ស្ថាន
នៅកាហ្សាក់ស្ថាន ប្រធានាធិបតីបានអះអាងនៅថ្ងៃសុក្រនេះថា អាជ្ញាធរបានស្តារសន្តិសុខសណ្តាប់ធ្នាប់ឡើងវិញ នៅក្នុងតំបន់មួយផ្នែកធំរបស់ប្រទេស ដែលបានរងរញ្ជួយ ដោយសារបាតុកម្ម និងកុប្បកម្មហិង្សា នៅប៉ុន្មានថ្ងៃមកនេះ។ តាមក្រសួងមហាផ្ទៃកាហ្សាក់ស្ថាន គេបានបាញ់សម្លាប់ឧក្រិដ្ឋជនប្រដាប់អាវុធ ២៦នាក់ ដែលចំណែកមនុស្សជាង ៣ពាន់នាក់ដែលពាក់ព័ន្ធនឹងហេតុការណ៍ធ្វើបាតុកម្ម កុប្បកម្ម ត្រូវបានប៉ូលិសចាប់ឃុំខ្លួន។ សហគមន៍អន្តរជាតិបានអំពាវនាវឲ្យគ្រប់ភាគី ជៀសវាងកាប្រើអំពើហិង្សា និងត្រូវដោះស្រាយបញ្ហាតាមការចរចា។
ចុះផ្សាយនៅថ្ងៃ៖
ស្តាប់ - ០២:១៦
សហភាពអឺរ៉ុប អាមេរិក និងអង្គការសហប្រជាជាតិ បានសំដែងក្តីបារម្ភ និងបានអំពាវនាវឲ្យមានភាពស្ងប់ស្ងាត់នៅកាហ្សាក់ស្ថាន ដែលរងរញ្ជួយ ដោយសារកុប្បកម្មដ៏ហិង្សា តាំងពីថ្ងៃពុធ។ ប្រធានឧត្តមស្នងការសិទ្ធិមនុស្ស បានអំពាវនាវឲ្យមានការគោរពសិទ្ធិធ្វើបាតុកម្មអហិង្សា និងបានទាមទារឲ្យអាជ្ញាធរបើកឡើងវិញ បណ្តាញអ៊ីនធ័រនែត សម្រាប់ការប្រើប្រាស់បន្ទាន់របស់បុគ្គលិកពេទ្យប្រឆាំងជំងឺកូវីដ។
នៅក្រោយរុស្ស៊ីបានបញ្ជូនទាហានមួយកងពលទៅជួយកងកម្លាំងកាហ្សាក់ស្ថាន កាលពីថ្ងៃព្រហស្បតិ៍ ទៅ តាមការស្នើសុំរបស់ប្រធានាធិបតីកាហ្សាក់ស្ថាន ក្រុមប្រទេសលោកខាងលិចនាំមុខដោយអាមេរិក បានព្រមានកងទ័ពរុស្ស៊ី កុំឲ្យមានគំនិត ចង់រំលោភសិទ្ធិមនុស្ស និងឆ្លៀតឱកាសចូលគ្រប់គ្រងស្ថាប័នសំខាន់ៗ កាហ្សាក់ស្ថាន។
នៅយប់ថ្ងៃព្រហស្បតិ៍ កងកម្លាំងកាហ្សាក់ស្ថានបានវាយបណ្តេញ ក្រុមបាតុករចេញអស់ពីទីលានសាធារណៈក្នុងទីក្រុងអាល់ម៉ាទី (Almaty) ជាទីដែលបាតុកម្មអហិង្សាបានប្រែក្លាយទៅជាកុប្បកម្មដ៏ហិង្សា ដែលបានបណ្តាលឲ្យស្លាប់មនុស្សជាច្រើននាក់។
តាមអ្នកទទួលខុសត្រូវជាន់ខ្ពស់ម្នាក់នៃវិមានប្រធានាធិបតី កាហ្សាក់ស្ថាន បាតុកម្មសន្តិភាព ដែលដំបូងឡើយផ្ទុះឡើង ដើម្បីប្រឆាំងតវ៉ានឹងការដំឡើងតម្លៃឧស្ម័ន បានប្រែក្លាយជាកុប្បកម្ម ដោយសារការញុះញង់របស់មនុស្សមួយក្តាប់តូច។ ពួកគេទាំងនោះមួយចំនួនជាចោរប្លន់ ប្រដាប់អាវុធ និងមួយក្រុមទៀត ជាភេរវជន ដែលបើកការវាយប្រហារទៅលើកម្លាំងសមត្ថកិច្ច ដើម្បី ដណ្តើមកាំភ្លើងមកប្រើប្រាស់។
តាមក្រសួងមហាផ្ទៃកាហ្សាក់ស្ថាន នៅក្នុងការបង្រ្កាប ឧក្រិដ្ឋជនប្រដាប់អាវុធ ២៦នាក់ ត្រូវបាញ់សម្លាប់ ចំណែក ១៨នាក់រងរបួសធ្ងន់។ នៅចំណែក កងរក្សាសន្តិសុខកាហ្សាក់ស្ថាន មានមនុស្ស១៨នាក់បាត់បង់ជីវិត និង៧៤៨នាក់រងរបួស។
នៅក្នុងសេចក្តីប្រកាសព័ត៌មាននៅថ្ងៃសុក្រទី ៧មករា ប្រធានាធិបតីកាហ្សាក់ស្ថានបានថ្លែងថា សណ្តាប់ធ្នាប់សន្តិសុខ ត្រូវបានស្តារឡើងវិញទាំងស្រុង ប៉ុន្តែ អាជ្ញាធរនៅបន្តបេសកកម្ម ដើម្បីបំផ្លាញទាំងស្រុង ក្រុមជនប្រដាប់អាវុធ ដែលនៅតែបន្តបំផ្លាញទ្រព្យសម្បត្តិសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ