ឥណ្ឌា៖ សមាគម អង្គការក្រៅរដ្ឋាភិបាលជិត ៦០០០ បាត់បង់សិទ្ធិទទួលជំនួយពីបរទេស
នៅប្រទេសឥណ្ឌា អង្គការក្រៅរដ្ឋាភិបាលនិងសមាគម ក្នុងស្រុកជិត ៦០០០ត្រូវហាមមិនឲ្យទទួលប្រាក់ជំនួយបរទេសចាប់ដើមខែមករាឆ្នាំ ២០២២។ នៅក្នុងចំណោមអង្គការក្រៅរដ្ឋាភិបាលដែលបានបាត់បង់សិទ្ធិទទួលជំនួយពីបរទេសមានផងដែរ អង្គការOxfamឥណ្ឌា ដែលធ្វើការទៅការអប់រំរបស់កុមារ ការពង្រឹងសមត្ថភាពអំនាចរបស់ស្រ្តី ហើយនិងប្រយុទ្ធប្រឆាំងភាពមិនស្មើភាពនៅ ឥណ្ឌា។ អ្នកទទួលខុសត្រូវរបស់អង្គការOxfam ឥណ្ឌាបានទាមទារឲ្យអាជ្ញាធរលើកចោលបម្រាម ព្រោះវាធ្វើឲ្យប៉ះពាល់ដល់ការងាររបស់អង្គការដែលកំពុងជួយប្រជាជនឥណ្ឌាក្នុងស្ថានភាពលំបាក បង្កឡើងដោយវិបត្តិកូវីដ។
ចុះផ្សាយនៅថ្ងៃ៖
ស្តាប់ - ០២:៣២
នៅប្រទេសឥណ្ឌា អង្គការក្រៅរដ្ឋាភិបាល មិនបានទទួលដំណឹងល្អឡើយ នៅថ្ងៃបើកទំព័រឆ្នាំថ្មី ឆ្នាំ ២០២២។ ចាប់ពីថ្ងៃទី ១ ខែមករា ឆ្នាំ ២០២២ សមាគម និង អង្គការក្រៅរដ្ឋាភិបាលជិត ៦០០០ ដែលនៅក្នុងនោះមានអង្គការOxfam ឥណ្ឌា បានបាត់បង់សិទ្ធិ ក្នុងការទទួលបានប្រាក់ជំនួយពីបរទេស។ មូលហេតុ គឺអាជ្ញាបណ្ណរបស់ពួកគេ ដែលផ្តល់ដោយរដ្ឋាភិបាលឥណ្ឌា ត្រូវអស់សុពលភាព ចាប់ពីដើមឆ្នាំ២០២២នេះ។
នៅឥណ្ឌា ដើម្បីបានសិទ្ធិទទួលថវិកាពីបរទេស គ្រប់អង្គការក្រៅរដ្ឋាភិបាល និងសមាគមសុប្បរសធម៌ ត្រូវចុះឈ្មោះក្នុងបញ្ជីច្បាប់ស្តីពីការគ្រប់គ្រងវិភាគទានបរទេស។ ប៉ុន្តែ តាមក្រសួងមហាផ្ទៃឥណ្ឌា អង្គការមួយភាគធំដូចជា Oxfam បានបាត់បង់សិទ្ធិទទួលប្រាក់ជំនួយពីបរទេស ព្រោះពួកគេមិនបានដាក់ពាក្យសុំថ្មី សម្រាប់ឆ្នាំ ២០២២។ ចំណែកពាក្យសុំជាង ១៧០ ត្រូវអាជ្ញាធរបដិសេធទាត់ចោល ក្នុងហេតុផលរំលោភច្បាប់ឥណ្ឌា។
អង្គការ Oxfam ឥណ្ឌាបានអះអាងថា ខ្លួនបានដាក់ពាក្យសុំអាជ្ញាបណ្ណថ្មីដើម្បីបន្តទទួលជំនួយ ពីបរទេស ប៉ុន្តែ អាជ្ញាធរបដិសេធ។ អង្គការOxfam ឥណ្ឌាដែលជាសាខារបស់អង្គការOxfam អន្តរជាតិ មានទីតាំងនៅទីក្រុងឡុងដ៍បានអំពាវនាវឲ្យរដ្ឋាភិបាលលើកចោលបម្រាមនេះវិញ ព្រោះវានឹងអាចប៉ះពាល់ខ្លាំងដល់ការងាររបស់អង្គការ។ សូមបញ្ជាក់ថា នៅក្នុងអំឡុងជួបរលកកូវីដកាលពីខែមេសាឆ្នាំមុន អង្គការOxfam បានផ្តល់ជំនួយដ៏សំខាន់ បំពង់អុកស៊ីសែន សម្ភារៈដកដង្ហើម ដល់ប្រជាជនដែលឆ្លងមេរោគកូវីដ នៅក្នុងខណៈពេលដែលរដ្ឋាភិបាល មន្ទីរពេទ្យរដ្ឋខ្វះខាតមធ្យោបាយខ្លាំង។
មួយសប្តាហ៍មុននេះ អាជ្ញាធរឥណ្ឌាទើបបានដកហូតអាជ្ញាបណ្ណដូចគ្នានេះពីអង្គការផ្តល់ជំនួយមនុស្សធម៌ Mère Teresa។ ក្រុមអង្គការ សមាគមដែលរិះគន់ចំណាត់ការរបស់រដ្ឋាភិបាលក្នុងការគ្រប់គ្រងវិបត្តិកូវីដ ក៏ស្ថិតនៅក្នុងបញ្ជីខ្មៅដែរ ដូចជាអង្គការវេជ្ជសាស្ត្រឥណ្ឌា សកលវិទ្យាល័យអ៊ីស្លាម និងអង្គការគ្រឹស្តផ្សេងទៀត។ គេបារម្ភថា ដោយលែងផ្តល់អាជ្ញាបណ្ណដល់អង្គការដល់ទៅជិត ៦០០០ រដ្ឋាភិបាលឥណ្ឌា របស់លោកណារិនដ្រា ម៉ូឌី ចង់កាត់ផ្តាច់ ប្រភពចំណូលរបស់អង្គការដែលរិះគន់ រដ្ឋាភិបាលរបស់លោក។
ចាប់តាំងពីចូលកាន់តំណែងជានាយករដ្ឋមន្រ្តីឥណ្ឌានៅឆ្នាំ ២០១៤ លោកណារិនដ្រា ម៉ូឌីបានជំរុញឲ្យមានកំណែទម្រង់ ច្បាប់រឹតបន្តឹង ប្រាក់ជំនួយបរទេសសម្រាប់អង្គការក្រៅរដ្ឋាភិបាល។ ច្បាប់នេះ ត្រូវបានប្រើផងដែរ សម្រាប់ប្រឆាំងអង្គការGreenpeace និងអង្គការការពារបរិស្ថានផ្សេងទៀត ដែលហ៊ានរិះគន់ រដ្ឋាភិបាលក្នុងរឿងប្រើប្រាស់ថាមពលធ្យូងថ្ម។ ជាលទ្ធផល នៅឥណ្ឌាដែលល្បីខាងបញ្ចេញផ្សែងពុល ឧស្ម័នកាបូនិក អង្គការការពារបរិស្ថានបានបាត់មុខសឹងទាំងស្រុងពីទេសភាពឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ