ហុងកុង-សេរីភាពសារព័ត៌មាន

បណ្តាញព័ត៌មាននៅហុងកុងមួយទៀតប្រកាសបិទ ដោយបារម្ភពីសុវត្ថិភាពអ្នកកាសែត

សេរីភាពសារព័ត៌មាននៅហុងកុងរួញកាន់តែតូចទៅៗ។ នេះបើតាមពាក្យបរិហាររបស់ក្រុមអ្នកកាសែតនៃបណ្តាញសារព័ត៌មានអនឡាញ CitizenNews ដែលប្រកាសបិទទ្វារ ចាប់ពីអាធាត្រ ថ្ងៃចន្ទទី ៣មករា២០២២នេះតទៅ។ CitizenNews បញ្ឈប់សកម្មភាពលែងផ្តល់ព័ត៌មាន ដោយព្រួយបារម្ភអំពីសុវត្ថិភាពរបស់អ្នកកាសែត។ CitizenNews ជាបណ្តាញសារព័ត៌មានទីបីហើយ Stand News និង Apple Daily ដែលបានបិទទ្វារ គិតចាប់តាំងពី ហុងកុង មានច្បាប់សន្តិសុខថ្មី តាក់តែងដោយចិនតាំងពីខែមិថុនា២០២០មក។

ចុះផ្សាយនៅថ្ងៃ៖ 03/01/2022 - 17:06

១៤ នាទី

លោក Chris Yeung សហស្ថាបនិកវេបសាយ Citizen Newsនិងជាអតិតប្រធានសមាគមន៍អ្នកកាសែតហុងកុង ធ្វើសន្និសីទកាសែតថ្ងៃទី ៣មករា ២០២២ REUTERS - TYRONE SIU

ដោយ៖ អៀង សុខម៉ិញ

ផ្សាយពាណិជ្ជកម្ម

បង្កើតឡើងនៅឆ្នាំ២០១៧ ដោយក្រុមអ្នកកាសែតជើងចាស់ និងទ្រទ្រង់ហិរញ្ញវត្ថុដោយអ្នកអាន CitizenNews ជាបណ្ដាញសារព័ត៌មានឯករាជ្យ អនឡាញដ៏មានប្រជាប្រិយភាពជាងគេបំផុតមួយនៅហុងកុង ដោយមានអ្នកដានតាមបណ្តាញសង្គមចំនួន ៨សែននាក់។ ប៉ុន្តែចាប់ពីម៉ោង១២អាធ្រាត្រថ្ងៃទី ៣ មករា ២០២២ទៅ វេបសាយCitizenNews លែងដំណើរការទៀតហើយ។

ក្នុងថ្ងៃផ្សាយចុងក្រោយ ក្រុមអ្នកកាសែត បានពន្យល់ថា គ្មានការប៉ះទង្គិចឬបញ្ជាពីអាជ្ញាធរទេ បណ្តាញសារព័ត៌មាន បានបង្ខំចិត្តបិទទ្វារដោយខ្លួនឯង ក្រោយពីឃើញអាជ្ញាធរហុងកុងបានបើកប្រតិបត្តិការចាប់ខ្លួនអ្នកកាសែតចំនួន៧នាក់ និងបិទខ្ទប់ហិរញ្ញវត្ថុរបស់បណ្តាញ Stand News កាលពីសប្តាហ៍មុន។ លែងមានអារម្មណ៍ថាមានសុវត្ថិភាពក្នុងពេលធ្វើការ អ្នកកាសែតក៏ជាមនុស្ស និងមានក្រុមគ្រួសារ ទើបចេះតែព្រួយបារម្ភអំពីសុវត្ថិភាពរបស់ខ្លួននោះ។ នេះបើតាមការគូសបញ្ជាក់បន្ថែមរបស់លោក Chris Yeung សហស្ថាបនិកវេបសាយ CitizenNews និងជាអតីតប្រធានអ្នកកាសែតនៅហុងកុង។

ការបិទទ្វាររបស់CitizenNews បានទទួលការស្វាគមន៍និងអបអរពីសំណាក់សារព័ត៌មានផ្លូវការជាភាសាអង់គ្លេស Global Times ថា “ដូច Stand News វេបសាយCitizenNews តែងតែសរសេរព័ត៌មានរិះគន់រដ្ឋាភិបាលនិងបក្សកុម្មុយនិស្តចិនណាស់” និងប្រព្រឹត្តទៅចំថ្ងៃដែលសមាជិកសភាហុងកុងថ្មី ស្បថចូលកាន់តំណែង។ សមាជិកសភាថ្មី ៨៩នាក់ក្នុងចំណោម៩០នាក់បានចេញសេចក្តីថ្លែងការណ៍រួម កាលពីសប្តាហ៍មុន គាំទ្រប្រតិបត្តិការចាប់ខ្លួនអ្នកកាសែតStand News។

អតីតដែនដីក្រោមអាណានិគមអង់គ្លេស ហុងកុងធ្លាប់ជាបន្ទាយនៃសេរីភាពសារព័ត៌មានដ៏ចំបងបំផុតនៅអាស៊ី និងត្រូវបានសារព័ត៌មានអន្តរជាតិជាច្រើន AFP, CNN, Wall Street Journal, Financial Times ឬក៏ Bloomberg បានទៅតាំងទីស្នាក់ការធំ។ ប៉ុន្តែស្ថានភាពបានធ្លាក់ដុនដាបជាលំដាប់តាំងពីឆ្នាំ២០១៩ និងជាពិសេសក្រោយការបង្កើតច្បាប់សន្តិសុខជាតិថ្មីនៅឆ្នាំ ២០២០មក។ ច្បាប់ដែលបានក្លាយជាឧបករណ៍បង្ក្រាបរាល់គ្រប់សំឡេងបះបោរប្រឆាំង និងបំបិទបណ្តាញសារព័ត៌មាន Apple Daily កាលពីខែមិថុនា និង Stand News កាលពី សប្តាហ៍មុន។

ប្រឈមនឹងស្ថានភាពនេះ New York Times និង Washington Post បានរើទីស្នាក់ការមួយភាគីទៅសេអ៊ូល។ ចំណែកកាសែតក្នុងស្រុក បានបន្ទន់សំឡេងតាមបន្ទាត់នយោបាយរបស់អាជ្ញាធរកាន់តែខ្លាំងឡើងៗ។ សូម្បីតែកាសែត South China Morning Post ដ៏ល្បីនៅហុងកុងរបស់លោក ចេក ម៉ា Jack Ma ក៏បានសម្របខ្លួនតាម និងបានចាត់ទុកការរិះគន់របស់ក្រុមបស្ចឹមលោកស្តីពីសេរីភាពនៅហុងកុង ថាគ្មានសីលធម៌៕