ចិនធ្វើតេស្តរកកូវីដ លើប្រជាជននៅក្រុងស៊ីអាន ទាំង១៣លាននាក់
អាជ្ញាធរចិន នៅក្រុងស៊ីអាន បានសម្រេចបើកការធ្វើតេស្តកូវីដ ទៅលើប្រជាជនទាំងអស់តែម្តង នៅក្នុងទីក្រុងនេះ ដែលមានចំនួនប្រមាណ១៣លាននាក់។ ការសម្រេចនេះ គឺបន្ទាប់ពីគេបានរកឃើញ ករណីវិជ្ជមានកូវីដ១៩ ចំនួន៤២នាក់ បន្ថែមទៀត នៅថ្ងៃអង្គារទី២១ធ្នូ។ ចិនកំពុងប្រឹងទប់ស្កាត់រលកឆ្លងរាលដាលកូវីដ ខណៈកម្មវិធីប្រកួតកីឡាអូឡាំពិករដូវរងារ កាន់តែខិតជិតមកដល់។
ចុះផ្សាយនៅថ្ងៃ៖
ផ្អែកតាមការបញ្ជាក់ ពីក្រសួងសុខាភិបាលចិន គិតពីថ្ងៃទី៩ធ្នូមក គឺមានករណីវិជ្ជមានកូវីដ១៩ សរុបចំនួន៩១ករណី នៅក្នុងទីក្រុងស៊ីអាន។ ដោយយោងលើហេតុផលនេះ អាជ្ញាធរនឹងបើកការធ្វើតេស្តទ្រង់ទ្រាយធំ ទៅលើប្រជាជនអ្នកក្រុងស៊ីអាន ទាំងអស់តែម្តង ដែលមានចំនួនប្រមាណ១៣លាននាក់។
អាជ្ញាធរក្រុងស៊ីអាន ក៏បានសម្រេចបិទសាលារៀន ជម្ឈមណ្ឌលកំសាន្ត មណ្ឌលកីឡា ដែលបិទជិតផងដែរ ដើម្បីបង្អាក់ប្រជាជន កុំឲ្យចេញទៅក្រៅ ជួបជុំគ្នាច្រើន។ សារមន្ទីរបុរេប្រវត្តិសាស្ត្រ រូបសំណាកទាហានធ្វើពីដីឥដ្ឋ ដ៏ល្បីនៅក្បែរក្រុងស៊ីអាន ក៏បានប្រកាសបិទទ្វារជាបណ្តោះអាសន្នដែរ ដោយអះអាងថាមានករណីផ្ទុះការឆ្លងរាលដាលកូវីដ។
គួររំលឹកថា តាំងតែពីផ្ទុះការឆ្លងរាលដាលកូវីដ នៅក្រុងវូហានមក ចិនបានកំណត់យុទ្ធសាស្ត្រ កូវីដសូន្យ ពោលគឺទប់ស្កាត់ឲ្យបានជាដាច់ខាត នូវករណីឆ្លងថ្មីសូម្បីតែមួយករណីក៏ដោយ។ តែយ៉ាងណា ជារឿយៗ នៅប្រទេសចិន តែងតែមានករណីឆ្លងរាលដាលថ្មីទៀត ដោយចៀសមិនផុត។
គួរកត់សំគាល់ដែរថា ថ្វីបើយោងតាមតួលេខផ្លូវការ ចិនមានចំនួនឆ្លងថ្មីតិចបំផុតក៏ដោយ តែអាជ្ញាធរចិន នៅតែបន្ត អនុវត្តវិធានការដ៏តឹងតែង និង ល្អិតល្អន់បំផុត តួយ៉ាងដូចជាការដាក់ឲ្យធ្វើចត្តាឡីស័កមនុស្សទាំងទីក្រុង និង ការធ្វើតេស្តទ្រង់ទ្រាយធំ ព្រមៗគ្នាលើមនុស្សជាច្រើនលាននាក់។ វិធានការដ៏តឹងតែងនេះ គឺជាត្រៀមបំរុង មិនឲ្យមានរលកឆ្លងរាលដាលសាជាថ្មី ខណៈកម្មវិធីប្រកួតកីឡាអូឡាំពិករដូវរងារ នៅទីក្រុងប៉េកាំង កាន់តែខិតជិតមកដល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ