ក្រោយខ្យល់ព្យុះទីហ្វុង Rai ដែលបានសម្លាប់មនុស្សយ៉ាងតិច ៣៧៥នាក់ ហ្វីលីពីនអំពាវនាវរកជំនួយ
នៅក្នុងប្រទេសហ្វីលីពីន ចំនួនអ្នកស្លាប់ដោយខ្យល់ព្យុះទីហ្វុង Rai បានកើនឡើងជារៀងរាល់ថ្ងៃ។ គិតត្រឹមថ្ងៃអង្គារ ទី២១ ធ្នូ ចំនួនមនុស្សស្លាប់មានយ៉ាងតិច ៣៧៥នាក់ និងមានប្រជាជនប្រមាណជា ៤០០ ០០០នាក់កំពុងជ្រកកោណនៅតាមមជ្ឈមណ្ឌលដែលរៀបចំដោយរដ្ឋអំណាច ឬមួយក៏ស្នាក់នៅបណ្តោះអាសន្ននៅតាមផ្ទះក្រុមគ្រួសារ។ ខណៈនេះ ក្រុមអ្នកជួយសង្រ្គោះបានផ្តើមដឹកជញ្ជូនជំនួយទៅកាន់តំបន់រងគ្រោះ ហើយក្រុមអង្គការមនុស្សធម៌បានផ្តើមអំពាវនាវរកជំនួយ។
ចុះផ្សាយនៅថ្ងៃ៖
ស្តាប់ - ០១:៤៩
ក្រោយភ្លៀងមេឃស្រឡះ តែក្រោយព្យុះជាពេលវេលាដែលត្រូវគិតគូរពីការសាងសង់ឡើងវិញ និងការស្វែងរកជំនួយជួយជនរងគ្រោះដែលកំពុងខ្វះស្បៀង និងគ្មានទឹកស្អាតប្រើប្រាស់ ពិសេសនៅកោះបូអូលដែលបានរងគ្រោះខ្លាំងជាងគេ។ នៅលើកោះទេសចរណ៍មួយនេះ និងក្រៅពីប្រជាជនជាម្ចាស់ស្រុក មានប្រជាជនហ្វីលីពីនជាច្រើននាក់ទៀតបានទៅដើរលេងសម្រាកលំហែកាយនៅក្នុងពេលបុណ្យណូអែលនាពេលខាងមុខ។ តែអ្វីៗត្រូវបានបំផ្លាញដោយខ្យល់ព្យុះ Rai និងមានមនុស្សស្លាប់ប្រមាណជា ១០០នាក់នៅលើកោះបូអូលនោះ។
ទន្ទឹមនឹងអំពាវនាវរកជំនួយដោយខ្លួនឯង អភិបាលកោះបូអូលលោក Arthur Yap ក៏បានបញ្ជាក់ពីក្តីសង្ឃឹមទទួលបានជំនួយឆាប់រហ័សពីប្រធានាធិបតីលោកឌុយទែរតេ។ ជំនួយដែលលោក Arthur Yap ចង់បាននៅចំពោះមុខពីលោកឌុយទែរតេ គឺថវិកាដើម្បីទិញចំណីអាហារ និងទឹកស្អាត ឬមួយក៏បញ្ជូនកម្លាំងទ័ព និងប៉ូលិសដើម្បីជួយការពារពីការចូលលួច ប្លន់។ គេបានសង្កេតឃើញជាទូទៅថា ទាហាន ប៉ូលិស និងឆ្មាំសមុទ្ររាប់ពាន់នាក់កំពុងខ្នះខ្នែងដឹកជញ្ជូនជំនួយចាំបាច់ទៅកាន់កោះនានាដែលបានរងការវាយប្រហារដោយខ្យល់ព្យុះ Rai។
ការដឹកជញ្ជូនជំនួយនេះត្រូវបានក្រសួងការពារជាតិចេញបញ្ជាឲ្យប្រើនាវា កាណូត យន្តហោះ និងឡានកាំមីញ៉ុង។ ស្របពេលជាមួយគ្នា អង្គការកាកបាទក្រហម និងអឌ្ឍចន្ទក្រហមក៏បានអំពាវនាវរកជំនួយចំនួន ២២លានដុល្លារសម្រាប់ការជួយបន្ទាន់ និងការកសាងហេដ្ឋារចនាសម្ព័ន្ធឡើងវិញ។ ខណៈនេះ ប្រទេសអង់គ្លេសបានឆ្លើយតបនឹងការអំពាវនាវដោយសន្យាផ្តល់ចំនួន ១លានដុល្លារ ប្រទេសកាណាដាបានសន្យាឲ្យប្រមាណជា ២លាន ៣សែនដុល្លារ ហើយសហភាពអឺរ៉ុបបានសន្យាជួយជិត ២លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ