ចិនព្យាយាមធានាថាសេដ្ឋកិច្ចខ្លួនមិនរងផលប៉ះពាល់ទោះក្នុងករណីក្រុមហ៊ុនEvergrandeដួលរលំ
នៅថ្ងៃចន្ទ ទី៦ ធ្នូ ធនាគារកណ្តាលចិនបានបញ្ចេញទឹកប្រាក់បន្ថែមរាប់ពាន់លានដុល្លារសម្រាប់ការផ្តល់ប្រាក់កម្ចី។ វិធានការនេះធ្លាក់មកនៅខណៈដែលរដ្ឋាភិបាលទីក្រុងប៉េកាំងព្យាយាមធានាដល់សាធារណជននិងវិនិយោគិនថា សេដ្ឋកិច្ចចិននឹងមិនរងផលប៉ះពាល់ឡើយ ទោះក្នុងករណីក្រុមហ៊ុនអចលនទ្រព្យយក្ស Evergrande ដួលរលំក៏ដោយ។
ចុះផ្សាយនៅថ្ងៃ៖
ស្តាប់ - ០២:៣៩
ធនាគារប្រជាជនចិនបានប្រកាសបញ្ចេញទឹកប្រាក់ចំនួន ១,២ ទ្រីលានយ័ន ឬស្មើនឹង ១៩០ ពាន់លានដុល្លារសម្រាប់ធនាគារនានាផ្តល់ប្រាក់កម្ចីដោយកាត់បន្ថយចំនួនថវិកាដែលធានាគារត្រូវរក្សាទុកនៅក្នុងទុនបម្រុង។
សេចក្តីប្រកាសខាងលើធ្លាក់មកបន្ទាប់ពីអាជ្ញាធរទីក្រុងប៉េកាំងសន្យាថានឹងរក្សាទីផ្សារផ្តល់ប្រាក់កម្ចីឲ្យមានដំណើរការល្អនិងនៅក្រោយពេលដែលក្រុមហ៊ុន Evergrande ទាញសញ្ញាអាសន្នថាខ្លួនអាចនឹងអស់លុយសម្រាប់សងទៅម្ចាស់បំណុល។
កាលពីថ្ងៃសុក្រសប្តាហ៍មុន Evergrande និយាយថាខ្លួនត្រូវបានម្ចាស់បំណុលទាមទារឲ្យសង់ប្រាក់ ២៦០ លានដុល្លារ។ ក្រៅពីនេះក្រុមហ៊ុននៅមានបំណុលចំនួន ២៥៥ លានដុល្លារផ្សេងទៀតដែលចាំបាច់ត្រូវសងនៅត្រឹមថ្ងៃទី២៨ ធ្នូខាងមុខ។
ទឹកប្រាក់ខាងលើនេះ គឺជាចំនួនតិចតួចប៉ុណ្ណោះនៃបំណុលសរុបទាំងអស់របស់ក្រុមហ៊ុនដែលមានរហូតដល់ ៣១០ ពាន់លានដុល្លារ។ ក៏ប៉ុន្តែចំណោទគឺនៅត្រង់ថាបើក្រុមហ៊ុនមិនអាចសងបំណុលតាមកាលកំណត់ នោះម្ចាស់បំណុលនឹងនាំគ្នាទាមទារឲ្យ Evergrande សងលុយបំណុលផ្សេងទៀតភ្លាមៗ ហើយបំណុលអាចកើនដល់ច្រើនពាន់លានដុល្លារ។
ទាក់ទងការបញ្ចេញទឹកប្រាក់ដ៏ច្រើនសន្ធឹកសន្ធាប់ ធនាគារកណ្តាលចិននិយាយថាខ្លួនចង់គាំទ្រដល់ការអភិវឌ្ឍន៍សេដ្ឋកិច្ចពិតប្រាកដ និងកាត់បន្ថយការចំណាយផ្នែកហិរញ្ញវត្ថុសម្រាប់អាជីវកម្ម។ តែវាមិនមែនជាការបញ្ជាក់ថាអាជ្ញាធរចង់ផ្លាស់ប្តូរគោលនយោបាយរូបិយវត្ថុដ៏ប្រុងប្រយ័ត្នរបស់ខ្លួនឡើយ។
គួរបញ្ជាក់ថា កន្លងមក Evergrande បានព្យាយាមបង់ប្រាក់ទៅឲ្យម្ចាស់បំណុលនៅថ្ងៃកំណត់ក្នុងរយៈពេលដែលត្រូវបានគេអនុគ្រោះឲ្យ។ ប៉ុន្តែគេមិនដឹងនោះទេថាក្រុមហ៊ុនបានលុយនោះទាំងនោះមកពីណា។
ទន្ទឹមគ្នានេះ ក្រុមហ៊ុនអចលនទ្រព្យផ្សេងទៀតក៏ត្រូវបានគេអនុញ្ញាតឲ្យខ្ចីប្រាក់ថ្មីបន្ថែមដែរដែលនេះអាចជាវិធីសាស្ត្រប្រើដើម្បីធានាដល់សាធារណជនថាវិស័យអចលនទ្រព្យដែលជាក្បាលម៉ាស៊ីនដ៏សំខាន់មួយនៃសេដ្ឋកិច្ចចិន មានសុខភាពល្អ។
គួររំឭកថា ក្រុមហ៊ុនអភិវឌ្ឍន៍អចលនទ្រព្យចិនជាច្រើនបានធ្លាក់ខ្លួនជាប់ផុងជ្រៅក្នុងបញ្ហាបំណុល និងត្រូវខំប្រឹងរកប្រាក់សងទៅម្ចាស់បំណុលវិញ តាំងពីអាជ្ញាធរចិនចាប់បង្ក្រាបទម្លាប់ខ្ចីប្រាក់ដោយគ្មានភាពប្រុងប្រយ័ត្នកាលពីឆ្នាំទៅមិញ។
វិធានការរបស់រដ្ឋាភិបាលចិនបានធ្វើឲ្យវិស័យសំណង់ជួបភាពរអាល់រអួល។ កំណើនសេដ្ឋកិច្ចចិនដែលទទួលរងពីវិបត្តិនេះអាចកើនបានត្រឹមចំនួន ៤,៩% ប៉ុណ្ណោះសម្រាប់ត្រីមាសទីបីនៃឆ្នាំ២០២១។ តួលេខនេះធ្លាក់ចុះពីចំនួន ៧,៩% នៅក្នុងត្រីមាសទីពីរ និងធ្លាក់ចុះពី ១៨,៣% សម្រាប់ត្រីមាសទីមួយក្នុងឆ្នាំ២០២១ដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ