នាយករដ្ឋមន្ត្រីកោះសាឡូម៉ុងថាកុបកម្មគឺការរៀបចំឡើងដើម្បីផ្តួលរំលំលោក
ក្រោយផ្ទុះការតវ៉ាជាបន្តបន្ទាប់ នាយករដ្ឋមន្ត្រីកោះសាឡូម៉ុងបាននិយាយនៅថ្ងៃអាទិត្យ ទី២៨ វិច្ឆិកានេះថា លោកនឹងមិនចុះពីតំណែងទៅតាមការទាមទាររបស់បាតុករនោះទេ។ លោកនាយករដ្ឋមន្ត្រីបន្ថែមថា កុបកម្មហិង្សារយៈពេលបីថ្ងៃកន្លងមកនេះគឺការរៀបចំឡើងដោយក្រុមមនុស្សមួយក្តាប់តូចដែលមានចេតនាចង់ផ្តួលរំលំរដ្ឋាភិបាលរបស់លោកតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១៧
នៅក្នុងសុន្ទរកថាមួយដែលផ្សាយទៅកាន់ប្រជាជាតិទាំងមូល លោកនាយករដ្ឋមន្ត្រីកោះសាឡូម៉ុង ម៉ាណាសេហ្វ សូហ្កាវ៉ារ (Manasseh Sogavare) បាននិយាយថាវាច្បាស់ណាស់ថាព្រឹត្ដិការណ៍ថ្មីៗដែលកើតនៅទីក្រុងហូនីញ៉ារ៉ាត្រូវបានរៀបគ្រោងទុកយ៉ាងល្អ និងរៀបចំឡើងដើម្បីកម្ចាយលោកចេញពីតំណែងមេដឹកនាំកោះ ដោយគ្មានហេតុផលត្រឹមត្រូវ។
បន្ថែមលើនេះ លោកនាយករដ្ឋមន្ត្រីបានប្រាប់ទៅកាន់ប្រជាជនកោះសាឡូម៉ុងថារដ្ឋាភិបាលរបស់លោកមានការតាំងចិត្តមោះមុត… ហើយក៏នឹងមិនចុះចាញ់ចំពោះចេតនាអាក្រក់របស់មនុស្សក្រុមមនុស្សមួយត្តាប់តូចតែពីរបីនាក់នោះដែរ។
គួរបញ្ជាក់ថា ប្រជាជននៅកោះសាឡូម៉ុងបាននាំគ្នាធ្វើបាតុកម្មទាមទារឲ្យនាយករដ្ឋមន្រ្តីចុះចេញពីតំណែងរយៈពេលបីថ្ងៃមកហើយចាប់ពីថ្ងៃព្រហស្បតិ៍ ទី២៥ វិច្ឆិកា។ ប្រជាជនជាច្រើននៃតំបន់កោះប៉ាស៊ីហ្វិកដែលមានប្រជាជនសរុប ៨សែននាក់ ជឿថារដ្ឋាភិបាលរបស់ពួកគេប្រព្រឹត្តអំពើពុករលួយ ហើយជំពាក់គុណ ឬបំណុល ឬបម្រើផលប្រយោជន៍ឲ្យចិន និងបរទេសផ្សេងទៀត។
ក្រុមបាតុករបានបញ្ចេញកំហឹងរបស់ពួកគេដោយផ្ទាល់ទៅកាន់ លោកនាយករដ្ឋមន្ត្រី សូហ្កាវ៉ារ និងរដ្ឋាភិបាលរបស់លោក។ បាតុកម្ម របស់ប្រជាជនបានឈានក្លាយជាកុបកម្មហិង្សា ហើយអ្នកតវ៉ាជាច្រើនក៏បានប៉ុនប៉ងដុតអគារសភានិងគេហដ្ឋានឯកជនរបស់នាយករដ្ឋមន្ត្រីផងដែរ។
ក៏ប៉ុន្តែ ក្រុមអ្នកតវ៉ាទាំងនោះត្រូវបានបង្ក្រាបដោយប៉ូលិសដោយការបាញ់ឧស្ម័នបង្ហូរទឹកភ្នែក និងការបាញ់គ្រាប់កាំភ្លើងពិតឡើងលើដើម្បីជាការព្រមាន។ នាយករដ្ឋមន្ត្រីកោះសាឡូម៉ុងបានលើកឡើងថាកុបកម្មហិង្សាបានកើតឡើងដោយមានមេខ្លោងពីរបីនាក់ជាអ្នកដើរបំបោងបំភ្លៃព័ត៌មានកៀរគរប្រជាជនឲ្យចូលរួមនៅក្នុងការតវ៉ា។
លោកបានឲ្យដឹងដែរអំពើហិង្សាដែលផ្តោតលើទីក្រុងចិន Chinatown នៅរដ្ឋធានីហូនីញ៉ារ៉ា បានធ្វើឲ្យកោះសាឡូម៉ុងខាតបង់ប្រាក់ប្រមាណ ២៥ លានដុល្លារ និងបានបំផ្លាញផងដែរការងារចំនួន ១ពាន់ការងារនៅក្នុងសេដ្ឋកិច្ចរបស់ប្រទេសដែលត្រូវបានញាំញីរួចទៅហើយពីផលប៉ះពាល់នៃជំងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ