ហ្វីលីពីនចង់រារាំងមិនឱ្យជ័យលាភីណូបែលសន្តិភាព ទៅទទួលរង្វាន់នៅអូស្លូ
រដ្ឋាភិបាលហ្វីលីពីន កំពុងព្យាយាមរារាំង មិនឱ្យលោកស្រី ម៉ារីយ៉ា រេសា Maria Ressa ជ័យលាភី ណូបែលសន្តិភាពឆ្នាំ២០២១ ធ្វើដំណើរទៅទីក្រុងអូស្លូ នៅខែធ្នូខាងមុខ ដើម្បីទទួលរង្វាន់របស់លោកស្រីទេ។ មូលហេតុមកពី អាជ្ញាធរខ្លាចលោកស្រីរត់គេចខ្លួនពីតុលាការ។ នេះបើតាមឯកសារដែលភ្នាក់ងារសារព័ត៌មានបារាំងAFP បានឃើញ។
ចុះផ្សាយនៅថ្ងៃ៖
ស្តាប់ - ០១:៤៤
ជាស្ថាបនិកវេបសាយសារព័ត៌មានអង្កេត Rappler លោកស្រី ម៉ារីយ៉ា រេសា និងអ្នកកាសែតរុស្ស៊ី លោក ឌីមីទ្រី មូរ៉ាតូវ Dmitri Mouratov បានជាប់ជាជ័យលាភីណូបែលសន្តិភាពឆ្នាំ២០២១ ចំពោះបុព្វហេតុការពារសេរីភាពសារព័ត៌មាន។ ពិធីប្រគល់ពានរង្វាន់នឹងប្រព្រឹត្តទៅ នៅថ្ងៃទី ១០ធ្នូ នៅ ទីក្រុងអូស្លូ ប្រទេសន័រវែស។
ប៉ុន្តែអតីតអ្នកឆ្លើយឆ្លងព័ត៌មានឱ្យទូរទស្សន៍អាមេរិកCNN ដែលបច្ចុប្បន្នមានសេរីភាព រស់នៅក្រៅឃុំដោយមានលក្ខខណ្ឌ កំពុងរង់ចាំការកាត់ក្តីនៅសាលាឧទ្ទរណ៍។ កាលពីខែមិថុនា តុលាការបានកាត់ទោសលោកស្រីរេសា ពីបទបរិហារកេរ្តិ៍ ហើយលោកស្រីក៏មានជាប់បណ្តឹងជាច្រើនករណីទៀត ក្នុងនោះមានមួយករណី ដែលលោកស្រីអាចនឹងត្រូវជាប់ទោសក្នុងពន្ធនាគារដល់ទៅ ៦ឆ្នាំ។
ក្នុងវ័យ៥៨ឆ្នាំ លោកស្រីអ្នកកាសែតមាត់ឆៅដែលបរិហារនយោបាយប្រយុទ្ធប្រឆាំងនឹងគ្រឿងញៀនរបស់លោកប្រធានាធិបតីហ្វីលីពីន លោក ឌុយទែរតេ និងប្រព័ន្ធតុលាការហ្វីលីពីន មិនសំចៃមាត់ បានដាក់សំណើទៅតុលាការសុំសិទ្ធិ ធ្វើដំណើរទៅទទួលរង្វាន់នៅក្រុងអូស្លូ។ ប៉ុន្តែរដ្ឋអាជ្ញាប្រឆាំង ដោយយល់ថាហេតុផលរបស់លោកស្រី គ្មានលក្ខណៈចាំបាច់ ដាច់ខាតត្រូវធ្វើដំណើរទេ។ ផ្ទុយទៅវិញ ពាក្យរិះគន់វាយប្រហារ ប្រព័ន្ធតុលាការហ្វីលីពីន ជាញឹកញយរបស់លោកស្រី អាចបញ្ជាក់បានថាលោកស្រី គ្មានការគោរពដំណើរការតុលាការ ដូច្នេះហានិភ័យរត់គេចខ្លួនមានខ្ពស់។ នេះបើតាមសេចក្តីថ្លែងការណ៍របស់រដ្ឋអាជ្ញាហ្វីលីពីនកាលថ្ងៃទី ៨វិច្ឆិកា ដែលទីភ្នាក់ងារសារព័ត៌មានបារាំងទើបទទួលបាន។ ពេលនេះ លោកស្រីដែលមានសញ្ញាតិអាមេរិកដែរ កំពុងស្ថិតនៅលើទឹកដីសហរដ្ឋអាមេរិក ក្រោយពីទទួលការអនុញ្ញាតពីតុលាការ។
វិទ្យាស្ថានណូបែល យល់ថា ពិតជាគួរឱ្យអៀនខ្មាសណាស់ដែលជាតិមួយមិនព្រមផ្តល់សេរីភាពឱ្យពលរដ្ឋខ្លួន ធ្វើដំណើរមក ទទួលពានរង្វាន់ណូបែលសន្តិភាព នៅអូស្លូនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ