អង្គការសិទ្ធមនុស្សអំពាវនាវ ឲ្យសិង្ហបុរីកុំប្រហារជីវិតអ្នកទោសម្នាក់ ដែលមានបញ្ហាសរសៃប្រសាទ
អជ្ញាធរតុលាការសិង្ហបុរី នឹងកាត់ទោសប្រហារជីវិត អ្នកទោសម្នាក់ ជាជនជាតិម៉ាឡេស៊ី ដែលជាប់ចោទ កាន់កាប់គ្រឿងញៀន នៅថ្ងៃពុធ សប្តាហ៍ក្រោយ។ ក៏ប៉ុន្តែមេធាវី របស់ជននេះ បានអះអាងថា ជននេះមានបញ្ហាជំងឺសរសៃប្រសាទ មិនដឹងខុសត្រូវទេ។ អង្គការសិទ្ធិមនុស្ស បានអំពាវនាវ ឲ្យអាជ្ញាធរសិង្ហបុរី ត្រូវតែលុបចោល ការប្រហារជីវិតនេះ ព្រោះវាជារឿងអមនុស្សធម៌។
ចុះផ្សាយនៅថ្ងៃ៖
ស្តាប់ - ០២:៣៣
បុរសជនជាតិម៉ាឡេស៊ី ឈ្មោះ Nagaenthran K. Dharmalingam បច្ចុប្បន្នអាយុ៣៣ឆ្នាំ ត្រូវបានអាជ្ញាធរសិង្ហបុរី ចាប់ឃាត់ខ្លួន នៅឆ្នាំ២០០៩ បន្ទាប់ពីបានរកឃើញថា ជននេះមានកាន់កាប់គ្រឿងញៀន ហេរ៉ូអ៊ីន ចំនួន ៤៣ក្រាម ពោលគឺប្រមាណជា៣ស្លាព្រៀបាយ ក្នុងពេលធ្វើដំណើរមកដល់សិង្ហបុរី។
បន្ទាប់ពីត្រូវបានកាត់ទោស និងជាប់ឃុំអស់រយៈពេលជាង១០ឆ្នាំ អាជ្ញាធរសិង្ហបុរី គ្រោងនឹងកាត់ទោសប្រហារជីវិតជននេះ ដោយព្យួរក នៅថ្ងៃពុធ ទី១០វិច្ឆិកា។ វានឹងជាការកាត់ទោសប្រហារជីវិតអ្នកទោស លើកទី១ បើគិតពីឆ្នាំ២០១៩មក។ សម្រាប់អាជ្ញាធរសិង្ហបុរី ទោសប្រហារជីវិត គឺមានសារសំខាន់ណាស់ សំរាប់បំភ័យ បន្លាច ពួកឧក្រិដ្ឋជននានា។
តែយ៉ាងណា គម្រោងកាត់ទោសប្រហារជីវិត បុរសម៉ាឡេស៊ី ឈ្មោះ Nagaenthran K. Dharmalingam នេះ កំពុងតែធ្វើឲ្យសិង្ហបុរី រងការចោទប្រកាន់ជាខ្លាំង។ ក្រុមអ្នកប្រឆាំងការប្រហារជីវិតនេះ បានលើកឡើងថា ជននេះជាមនុស្សខ្សោយបញ្ញា មានបញ្ហាសរសៃប្រសាទ ហើយជាមនុស្សញៀនស្រា មិនដឹងខុសត្រូវ ថែមទៀតផង នៅក្នុងអំឡុងពេលប្រព្រឹត្តិបទល្មើស។ លោកស្រី Rachel Chhoa-Howard តំណាងអង្គការ Amnesty International បានលើកឡើងថា យោងតាមសាក្សីជាច្រើន អះអាងថា ជនជាប់ចោទមិនទាំងយល់ ថាខ្លួននឹងត្រូវគេព្យួរកសម្លាប់ នៅសប្តាហ៍ក្រោយនេះផងទេ។
មេធាវីរបស់បុរសម៉ាឡេស៊ី ដែលប្រឈមនឹងការប្រហារជីវិតនេះ បានអះអាងថា កូនក្តីលោក ថ្វីបើមានអាយុជាង៣០ឆ្នាំមែន តែមានសតិស្មារតី ដូចក្មេងអាយុក្រោម១៨ឆ្នាំ។ លោកបញ្ជាក់ថា នៅថ្ងៃចន្ទសប្តាហ៍ក្រោយ លោកនឹងដាក់ពាក្យបណ្តឹងមួយទៀត ដើម្បីទាមទារឲ្យលុបចោលការប្រហារជីវិតនេះ ព្រោះវាជាអំពើផ្ទុយនឹងរដ្ឋធម្មនុញ្ញសិង្ហបុរី។ សម្រាប់លោក ការប្រហារជីវិតមនុស្សម្នាក់ ដែលមានបញ្ហាសរសៃប្រសាទ វាគឺជារឿងមិនសមហេតុផល គ្មានមនសិកា និងជារឿងចចេសរឹងរូស ធ្វើឲ្យតែបាន របស់អាជ្ញាធរប្រទេសមួយ។ ដូចគ្នាដែរ អង្គការ Human Rights Watch បានលើកឡើងថាការប្រហារជីវិត អ្នកទោសម្នាក់ ដែលគ្នាមានជំងឺសសៃប្រសាទ វាគឺជារឿងអនុស្សធម៌ និងផ្ទុយពីច្បាប់អន្តរជាតិ និងជាអំពើព្រៃផ្សៃ ហួសប្រមាណពេកណាស់។
យ៉ាងណាក៏ដោយ រដ្ឋមន្ត្រីក្រសួងមហាផ្ទៃសិង្ហបុរី បានអះអាងថា នៅក្នុងពេលបើកសវនាកាជំនំជំរះក្តី ជនឈ្មោះ Nagaenthran K. Dharmalingam មិនត្រូវបានសមត្ថកិច្ចសង្កេតឃើញ ឬធ្វើកោសល្យវិច្ច័យឃើញថា មានបញ្ហាសរសៃប្រសាទទេ។ ដូច្នេះ ការប្រហារជីវិត គឺត្រូវតែអាចធ្វើទៅបាន តាមការកំណត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ