ហុងកុង ៖ សកម្មជនប្រជាធិបតេយ្យ តូនីជុង ប្រឈមនឹងការជាប់ទោសអស់មួយជីវិត ពីបទបះបោរ
នៅថ្ងៃពុធទី ៣ វិច្ឆិកា២០២១នេះ តុលាការហុងកុង បានបើកសវនាការកាត់ក្តីសំណុំរឿងទីបួន លើយុវសកម្មជន តូនី ជុង Tony Chung អាយុ២០ ឆ្នាំ ពីបទបះបោរចង់ផ្តាច់ទឹកដី។ ស្របតាមច្បាប់សន្តិសុខជាតិហុងកុងថ្មី ដែលចិនតាក់តែងឱ្យ សកម្មជនប្រជាធិបតេយ្យរូបនេះ អាចនឹងត្រូវជាប់ទោសក្នុងពន្ធនាគារអស់មួយជីវិត។
ចុះផ្សាយនៅថ្ងៃ៖
ស្តាប់ - ០១:៥៤
តូនី ជុងជាសកម្មជនវ័យក្មេងជាងគេបំផុត ដែលត្រូវតុលាការកាត់ទោសស្របតាមច្បាប់សន្តិសុខជាតិតាក់តែងឡើងដោយប៉េកាំង និងត្រូវបានចៅក្រម ព្រមានមិនឱ្យនិយាយ “អំពី នយោបាយ” នៅក្នុងអង្គសវនាការទេ។
បើតាមបទចោទប្រកាន់ ចលនានិស្សិតបង្កើតឡើងកាលពីឆ្នាំ២០១៦ ដើម្បីទាមទារឯករាជ្យហុងកុង Studen Localism ដែលមាន តូនី ជុង ប្រធាន ចង់ផ្តាច់ហុងកុងឱ្យចេញផុតពីក្រញាំរបបកុម្មុនិស្តចិន និងស្ថាបនាសាធារណរដ្ឋហុងកុងមួយ តាមរយៈការផ្សព្វផ្សាយសារតាមប្រព័ន្ធសង្គមទាមទារឯករាជ្យ និងដោយអំពាវនាវឱ្យមានបាតុកម្ម។ ចលនានិស្សិតក្រុមនេះបានថែមទាំងសុំឱ្យអាមេរិកអនុម័តច្បាប់ដាក់ទណ្ឌកម្មហុងកុងនិងចិនទៀត។ នេះបើតាមពាក្យចោទ របស់រដ្ឋអាជ្ញា។
បន្ថែមពីលើបទចោទប្រកាន់បះបោរចង់ផ្តាច់ទឹកដី នៅថ្ងៃពុធនេះ តូនី ជុង ត្រូវជាប់ចោទបានប្រព្រឹត្តបទល្មើសលាងលុយទៀត។ ហើយបើទោះបីជាច្បាប់សន្តិសុខជាតិហុងកុងថ្មី ទើបចូលជាធរមាននៅថ្ងៃខែមិថុនា២០២០ក្តី ក៏រដ្ឋអាជ្ញាបានលើកឡើងអំពីបទល្មើសជាច្រើនរបស់តូនី ជុង កាលពីមុនមានច្បាប់ទៅទៀត។
សូមរំលឹកថា សកម្មជន តូនី ជុង ត្រូវបានប៉ូលិសស៊ីវិលហុងកុងចាប់ខ្លួន នៅក្បែរស្ថានទូតអាមេរិកប្រចាំហុងកុង កាលពីខែតុលាឆ្នាំកន្លងទៅ និងឃុំទុក ហើយត្រូវបានតុលាការកាត់ទោស កាលពីចុងឆ្នាំមុនឱ្យជាប់ពន្ធនាគារបួនខែពីបទបំផ្លាញទង់ជាតិ និងប្រមូលផ្តុំធ្វើបាតុកម្មដោយខុសច្បាប់។
ក្រោមគំនាបយ៉ាងតឹងតែងរបស់ចិនលើហុងកុង សកម្មជនប្រជាធិបតេយ្យហុងកុងជាច្រើនបាននាំគ្នារត់ភៀសខ្លួនទៅបរទេស។ អ្នកចេញមិនទាន់ ត្រូវបានអាជ្ញាធរចាប់ខ្លួន និងចោទប្រកាន់អំពីបទធ្វើវិទ្ធង្សនា ឬស៊ុំគ្រលំជាមួយបរទេស។ តាមរយៈច្បាប់សន្តិសុខថ្មី ក្នុងចំណោមសកម្មជនប្រជាធិបតេយ្យជាង១៥០នាក់ដែលចាប់ខ្លួនបាន បួននាក់បានកាត់ទោសរួចហើយ ពាក់កណ្តាលរងការចោទប្រកាន់ជាផ្លូវការ និងគ្មាននរណាម្នាក់អាចសុំនៅក្រៅឃុំបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ