ក្រោមវិធានការរឹតបន្តឹងវិស័យអ៊ីនធ័រនែត Yahoo ដើរចេញពីចិន
ក្រុមហ៊ុនសេវាកម្មអ៊ីនធ័រនែតអាមេរិក Yahoo បានប្រកាសនៅថ្ងៃអង្គារ ទី២ វិច្ឆិកា ពីការចាកចេញរបស់ខ្លួនពីប្រទេសចិន។ តាមរយៈសេចក្តីប្រកាសនេះ Yahoo បានក្លាយជាក្រុមហ៊ុនបច្ចេកវិទ្យាចុងក្រោយដែលសម្រេចដើរចេញពីចិន ក្រោយអាជ្ញាធរទីក្រុងប៉េកាំងបង្កើនវិធានការរឹតបន្តឹងលើក្រុមហ៊ុនបច្ចេកវិទ្យា។
ចុះផ្សាយនៅថ្ងៃ៖
ស្តាប់ - ០២:០៣
ការសម្រេចដើរចេញរបស់ Yahoo នេះ ធ្លាក់មកនៅប៉ុន្មានថ្ងៃបន្ទាប់ពីក្រុមហ៊ុនហ្គេមយក្សរបស់អាមេរិក Epic Games បាននិយាយថានឹងបិទហ្គេមដ៏ពេញនិយមរបស់ខ្លួនឈ្មោះថា "Fortnite" នៅក្នុងប្រទេសចិន ក្រោយមានការដាក់បម្រាមយ៉ាងតឹងរ៉ឹង លើទីផ្សារហ្គេមដ៏ធំបំផុតរបស់ពិភពលោក។
ទីក្រុងប៉េកាំងបានផ្តើមវិធានរឹតបន្តឹងលើការត្រួតពិនិត្យលើក្រុមហ៊ុនបច្ចេកវិទ្យា ដើម្បីគ្រប់គ្រង់ពីប្រភពចំណូលរបស់ពួកគេ។ វិធានការនេះបានធ្វើឲ្យក្រុមហ៊ុនជាច្រើនជួបទុកលំបាក។
ចំណាត់ការរបស់អាជ្ញាធរចិនបានរុញច្រានឲ្យក្រុមហ៊ុនដែលមានមូលដ្ឋាននៅអាមេរិកមួយចំនួន សម្រេចដកចេញនូវផលិតផលសំខាន់ៗរបស់ពួកគេចេញពីប្រទេសចិនក្នុងប៉ុន្មានសប្តាហ៍ថ្មីៗនេះ។ ឧទាហរណ៍ដូចជា ក្រុមហ៊ុន Microsoft ជាដើមដែលកាលពីខែតុលាកន្លងទៅ បានប្រកាសបិទបណ្តាញទំនាក់ទំនងសង្គម LinkedIn ដែលជាបណ្តាញផ្តោតលើអាជីពការងាររបស់ខ្លួន។
ដោយឡែកនៅក្នុងសេចក្តីថ្លែងការណ៍មួយ ក្រុមហ៊ុន Yahoo បាននិយាយថាដោយហេតុកំពុងប្រឈមកាន់តែខ្លាំងទៅនឹងបរិយាកាសធុរកិច្ច និងផ្លូវច្បាប់ នៅក្នុងប្រទេសចិន សេវាកម្មរបស់ Yahoo នឹងលែងអាចចូលប្រើបានទៀតពីចិនដីគោក ចាប់ពីថ្ងៃទី ១ ខែវិច្ឆិកា ឆ្នាំ២០២១ នេះតទៅ។ បន្ថែមលើនេះក្រុមហ៊ុនថាខ្លួននៅតែប្តេជ្ញាគោរពសិទ្ធិរបស់អ្នកប្រើប្រាស់ និងបានអរគុណចំពោះការគាំទ្ររបស់ពួកគេ។
គួររំឭកថា ក្រុមហ៊ុនបច្ចេកវិទ្យាបរទេសនៅក្នុងប្រទេសចិនបានធ្លាក់ក្នុងស្ថានភាពលំបាក ដោយសារអាជ្ញាធរបង្ខំពួកគេឲ្យអនុវត្តតាមច្បាប់ក្នុងស្រុកដ៏តឹងរ៉ឹងនិងការត្រួតពិនិត្យរបស់រដ្ឋាភិបាលចិន។
Yahoo នៅចិនមានវត្តមានតាំងពីឆ្នាំ ១៩៩៩។ សេចក្តីថ្លែងការណ៍ចុងក្រោយរបស់ Yahoo បានទៅបន្ថែមទម្ងន់លើការតវ៉ារបស់ ក្រុមហ៊ុន Microsoft ដែលបាននិយាយកាលខែមុនថាខ្លួនប្រឈមមុខនឹងបរិយាកាសប្រតិបត្តិការដ៏លំបាក និងត្រូវអនុវត្តទៅតាមបទបញ្ជាជាច្រើនរបស់អាជ្ញាធរចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ