កូវីដ១៩ ៖ឥណ្ឌាចាក់វ៉ាក់សាំងបាន១ពាន់លានដូស
គិតមកដល់ត្រឹមថ្ងៃព្រហស្បតិ៍ទី ២១ តុលា ២០២១ ឥណ្ឌាបានចាក់វ៉ាក់សាំងប្រឆាំងកូវីដ១៩ បានចំនួន ១ពាន់លានដូសហើយ។ នេះបើតាមសេចក្តីប្រកាសរបស់ក្រសួងសុខាភិបាលឥណ្ឌា។ ឥណ្ឌាជាប្រទេសជាប់លំដាប់ទីពីរ ដែលបានចាក់ថ្នាំបង្ការបានច្រើនជាងគេ ដល់កំរិត១ពាន់លាននាក់ បន្ទាប់ពីចិន ដែលចាក់បានដល់ទៅ២,៣ពាន់លានដូស (បើតាមប៉េកាំង)។
ចុះផ្សាយនៅថ្ងៃ៖
ស្តាប់ - ០២:០២
បើតាមតួលេខរបស់រដ្ឋាភិបាល បីភាគបួននៃប្រជាពលរដ្ឋពេញវ័យឥណ្ឌា បានទទួលវ៉ាក់សាំងចំនួន១ដូសរួចហើយ និងប្រមាណ៣០%បានទទួលថ្នាំបង្ការ គ្រប់២ដូស។ ចំណែកយុវជនឥណ្ឌាអាយុក្រោម១៨ឆ្នាំ ដែលតំណាងឱ្យ៤០%នៃប្រជាជនសរុប១,៣លាននាក់វិញ ពុំទាន់បានចាក់ថ្នាំបង្ការនៅឡើយទេ។
ប៉ុន្តែនៅថ្ងៃនេះ ឥណ្ឌាអបអរការចាក់វ៉ាក់សាំងបានដល់ដូសទី១ពាន់លាន។ បន្ទាប់ពីមានយុទ្ធនាការចាក់ថ្នាំបង្ការយឺតយ៉ាវខ្លាំងនៅពេលចាប់ផ្តើមដំបូង កាលពីខែមករា ឥណ្ឌាពេលនេះចាក់វ៉ាក់សាំងបានក្នុងល្បឿន៨លានដូសក្នុងមួយថ្ងៃ។
នាយករដ្ឋមន្ត្រីឥណ្ឌា បានថ្លែងអរគុណបុគ្គលិកសុខាភិបាល និងបានធ្វើសេចក្តីប្រកាសពិសេស តាមអាកាសយានដ្ឋាននិងអយស្ម័យយាន អបអរការឆ្លងដំណាក់កាលដ៏សំខាន់មួយនេះ។
សូមបញ្ជាក់ថា កាលពីខែមេសានិងឧសភា ឥណ្ឌារងការរាតត្បាតយ៉ាងខ្លាំងក្លា ដោយមានករណីឆ្លងថ្មីជាង៤សែននិងស្លាប់ជាងបួនពាន់ក្នុងមួយថ្ងៃៗ។ មន្ទីរពេទ្យ មណ្ឌលសុខភាព ណែនចាល់ ខ្វះសព្វខ្វះគ្រប់ខ្វះទាំងអុកស៊ីហ្សែនសម្រាប់សង្គ្រោះព្យាបាលអ្នកជំងឺ សូម្បីកន្លែងបូជាសពក៏ចាល់ដែរ។ ជាផ្លូវការ ឥណ្ឌារាប់មានអ្នកឆ្លងកូវីដ១៩សរុបចំនួន៣៤លាននាក់ និងស្លាប់៤៥២០០០នាក់។
ឥលូវករណីឆ្លងថ្មីបានធ្លាក់ចុះក្រោម១៥០០០នាក់ក្នុងមួយថ្ងៃ ហើយសកម្មភាពទូទៅក្នុងប្រទេសវិលត្រលប់មកស្ទើរដូចធម្មតាវិញ។ ជាងនេះទៅទៀត កាលពីដើមសប្តាហ៍ ប៊ុមបេ ក្រុងសេដ្ឋកិច្ចរបស់ឥណ្ឌា លែងមានអ្នកស្លាប់ដោយកូវីដសោះ ពេញមួយថ្ងៃ។ អាជ្ញាធរបានលើបម្រាមទាំងឡាយ និងអនុញ្ញាតឱ្យប្រជាពលរដ្ឋអាចជួបជុំប្រារព្វពិធីបុណ្យសាសនាផ្សេង ជាលើកទីមួយ គិតចាប់តាំងពីកូវីដ១៩បានផ្ទុះឡើង។
ដើម្បីបញ្ចៀសរលកចម្លងថ្មី រដ្ឋាភិបាលឥណ្ឌាបានណែនាំពលរដ្ឋឱ្យទៅចាក់ថ្នាំបង្ការឱ្យបានគ្រប់ដូស។ ចំណែកអាជ្ញាធរសុខភិបាល ទើបចេញអនុសាសន៍ឱ្យប្រើថ្នាំបង្ការCovaxin ថ្នាំបង្ការមួយក្នុងចំណោមថ្នាំបង្ការទាំង៧ដែលធ្វើចរាចរណ៍នៅឥណ្ឌា សម្រាប់យកទៅចាក់លើក្មេងក្រោមអាយុ១៨ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ