ចិន៖អវកាសយានិកចំនួន ៣នាក់ទៅដល់ស្ថានីយ៍អវកាស និងស្ថិតនៅទីនោះចំនួន ៦ខែ
នៅក្នុងប្រទេសចិន អវកាសយានិកចិនចំនួន ៣នាក់ ក្នុងនោះមានស្រ្តីម្នាក់បានទៅដល់ស្ថានីយ៍អវកាសប្រកបដោយជោគជ័យនាថ្ងៃសៅរ៍ ទី១៦ តុលា។ កម្មវត្ថុរបស់អវកាសយានិកចិនទាំង ៣នាក់ពេលនេះ គឺបន្តបេសកកម្មសាងសង់ស្ថានីយ៍អវកាសចិន។ តាមគម្រោង ពួកគេទាំង ៣នាក់នឹងស្ថិតនៅលើអាកាសរយៈពេល ៦ខែ ពោលច្រើនជាងបេសកកម្មរបស់អវកាសយានិកចំនួន ៣នាក់កាលពីពាក់កណ្តាលខែមិថុនាកន្លងទៅដែលមានរយៈពេលតែ ៣ខែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:០៥
គឺតាមរយៈយានស្ហ៊ីនចូវទី ១៣ ដែលអវកាសយានិកចិនចំនួន ៣នាក់ថ្មីបានទៅដល់ស្ថានីយអវកាសដែលចិនកំពុងសាងសង់។ អវកាសយានិកថ្មីទាំង ៣នាក់មានបុរសពីរនាក់អាយុ ៥៥ឆ្នាំ និង ៤១ឆ្នាំ រួមទាំងស្រ្តីម្នាក់អាយុ ៤១ឆ្នាំ។ នៅក្នុងបេសកកម្មរយៈពេល ៦ខែ អវកាសយានិកថ្មីទាំង ៣នាក់នឹងបន្តការសាងសង់ស្ថានីយ៍អវកាស ផ្ទៀងផ្ទាត់លើសម្ភារៈបរិក្ខារផ្សេងៗ និងធ្វើការពិសោធន៍វិទ្យាសាស្រ្តមួយចំនួន ពិសេសស្វែងរក និងស្វែងយល់លើព័ត៌មានស្តីពីការសម្របខ្លួនរយៈពេលយូរនៅលើអាកាស។ បន្ទាប់មក ពួកគេក៏អាចចេញក្រៅស្ថានីយ៍អវកាសចំនួន ២ ឬ ៣ដងនៅក្នុងបេសកកម្មរយៈពេល ៦ខែរបស់ខ្លួនដែរ។
គួរបញ្ជាក់ថា ស្ថានីយ៍អវកាសដែលចិនកំពុងសាងសង់ខ្លួនឯងមានកម្ពស់ពីផែនដីពី ៣៥០ ទៅ ៤០០គីឡូម៉ែត្រ និងត្រូវផ្គុំឡើងដោយម៉ូឌុលចំនួន ៣ខុសគ្នា។ តែមកដល់ពេលនេះ គឺទើបមានម៉ូឌុលមួយឈ្មោះ « ធានហ័រ » ដែលបានបាញ់ទៅដាក់ក្នុងគន្លងតារាវិថី។ គឺម៉ូឌុល « ធានហ័រ » នេះឯងដែលអវកាសយានិកថ្មីទាំង ៣នាក់ត្រូវស្នាក់នៅរយៈពេល ៦ខែ។ នេះជារយៈពេលមួយយូរដែលចិនមិនធ្លាប់បានសាកល្បង ព្រោះបេសកម្មចុងក្រោយមានរយៈពេលតែ ៣ខែប៉ុណ្ណោះ។ លោក Erik Seedhouse សាស្រ្តាចារ្យជំនាញបេសកកម្មអវកាសអាមេរិកបានពន្យល់ថា ហេតុផលនៃការពន្យារពេលស្នាក់នៅ គឺដើម្បីទាញយកបទពិសោធន៍ពីបេសកកម្មរយៈពេលយូរ។
សូមជម្រាបថា អនាគតស្ថានីយ៍អវកាសចិនឈ្មោះធានកុងនឹងគ្រោងសាងសង់រួចនាដំណាច់ឆ្នាំ ២០២២។ តែចាប់ពីពេលនេះទៅដំណាច់ឆ្នាំ ២០២២ ចិនត្រូវមានបេសកកម្មអវកាសចំនួន ១១ ដង។ បើសរុបទៅ បេសកម្មបញ្ជូនអវកាសយានិកថ្មីចំនួន ៣នាក់តាមរយៈយានស្ហ៊ីនចូវទី ១៣ ពេលនេះ គឺទើបជាបេសកកម្មទី៥ ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ