ប្អូនស្រីរបស់គីម ជុងអ៊ុនថាជំនួបកំពូលអន្តរកូរ៉េអាចនឹងប្រព្រឹត្តទៅបានបើមានការគោរពគ្នា
ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើងគីម ជុងអ៊ុន បានចេញមុខនិយាយកាលពីថ្ងៃសៅរ៍ ២៥ កញ្ញាម្សិលមិញថា ទីក្រុងព្យុងយ៉ាងមានឆន្ទៈចង់ពិចារណារៀបចំជំនួបកំពូលអន្តរកូរ៉េជាមួយស៊េអូល។ ប៉ុន្តែជំនួបនេះអាចនឹងកើតឡើងបានលុះត្រាតែមានគោរពគ្នាទៅវិញទៅមក និងគ្មានភាពលម្អៀងណាមួយរវាងប្រទេសទាំងពីរ។
ចុះផ្សាយនៅថ្ងៃ៖
ស្តាប់ - ០២:៣៩
សេចក្តីថ្លែងការណ៍កាលពីថ្ងៃសៅរ៍គឺការចេញមុខជាលើកទីពីររបស់លោកស្រី គីម យ៉ូជុង ប្អូនស្រីដ៏មានឥទ្ធិពលនិងជាទីប្រឹក្សាដ៏សំខាន់របស់មេដឹកនាំកូរ៉េខាងជើងក្នុងរយៈពេលពីរថ្ងៃជាប់ៗគ្នា។
កាលពីថ្ងៃសុក្រ លោកស្រី យ៉ូជុង បានប្រាប់ទីក្រុងសេអ៊ូលឲ្យបញ្ចប់នូវគ្រប់គោលនយោបាយអរិភាពរបស់ខ្លួនចំពោះទីក្រុងព្យុងយ៉ាង ក្រោយពេលដែលប្រធានាធិបតីកូរ៉េខាងត្បូងលោកមូន ចែអ៊ីន អំពាវនាវឲ្យមានការប្រកាសបញ្ចប់ជាផ្លូវការនូវស្ថានភាពសង្គ្រាមជាមួយកូរ៉េខាងជើង។
ជំនួបកំពូលអន្តរកូរ៉េរវាងមេដឹកនាំកូរ៉េខាងជើង គីម ជុងអ៊ុន និងលោក មូន ចែអ៊ីន ប្រធានាធិបតីកូរ៉េខាងត្បូងអាចនឹងប្រព្រឹត្តធ្វើទៅបាន លុះត្រាតែការគោរពគ្នាទៅវិញទៅមក និងភាពស្មើភាពគ្នាត្រូវបានធានា។ នេះគឺការលើកឡើងរបស់លោកស្រី គីម យ៉ូជុង ដែលត្រូវបានដកស្រង់ដោយទីភ្នាក់ងារសារព័ត៌មាន KCNA។
បន្ថែមលើនេះ ប្អូនស្រីរបស់គីម ជុងអ៊ុនបានលើកឡើងដែរថាកិច្ចប្រជុំកំពូល ក៏ដូចជាការពិភាក្សាអំពីសេចក្តីប្រកាសបញ្ចប់សង្គ្រាមអាចត្រូវបានរៀបចំឡើងនៅវេលាកំណត់ណាមួយ តាមរយៈការពិភាក្សារលូតល្អរវាងប្រទេសទាំងពីរ។ តែវាមិនមែនកើតឡើង តាមរយៈការរិះគន់ចាប់កំហុសនិងធ្វើសង្គ្រាមពាក្យសំដីនឹងគ្នាទៅវិញទៅមកឡើយ។
លោកស្រី ក៏បានបញ្ជាក់ពីការអំពាវនាវរបស់ព្យុងយ៉ាងជាថ្មី ឲ្យកូរ៉េខាងត្បូងទម្លាក់ចោលនូវ ស្តង់ដារពីរមិនស្មើគ្នាដែលលោកស្រីចង់សំដៅដល់ការរិះគន់របស់លោក មូន ចែអ៊ីន ចំពោះការបាញ់សាកល្បងមីស៊ីលរបស់កូរ៉េខាងជើង ខណៈដែលកូរ៉េខាងត្បូងខ្លួនឯងក៏បានបាញ់សាកល្បងមីស៊ីលបាលីស្ទិកពីនាវាមុជទឹកដែរ កាលពីសប្តាហ៍មុន។
គួររំឭកថា សង្គ្រាមកូរ៉េឆ្នាំ ១៩៥០-៥៣ បានបញ្ចប់ដោយបទឈប់បាញ់ មិនមែនសន្ធិសញ្ញាសន្តិភាពទេ។ មកទល់នឹងពេលនេះ សន្ធិសញ្ញាសន្តិភាពនេះនៅតែមិនទាន់ត្រូវបានភាគីជម្លោះចុះហត្ថលេខា ដែលជាហេតុធ្វើឲ្យឧបទ្វីបកូរ៉េនៅតែស្ថិតក្នុងស្ថានភាពសង្រ្គាមរហូតមកទល់នឹងពេលបច្ចុប្បន្ននេះបើនិយាយតាមផ្លូវច្បាប់។
មួយវិញទៀត ទំនាក់ទំនងរវាងកូរ៉េខាងជើងនិងកូរ៉េខខាងត្បូង ត្រូវបានកាត់ផ្តាច់ទៅទៀត ក្រោយជំនួបពូលលើកទី២ រវាងអាមេរិក-ខាងជើង នៅទីក្រុងហាណូយកាលពីខែកុម្ភៈ ឆ្នាំ ២០១៩ ទទួលបរាជ័យដោយសារតែប្រធានាធិបតីអាមេរិកដូណាល់ ត្រាំ និងគីម ជុងអ៊ុនមិនត្រូវរ៉ូវគ្នានិងមិនអាចសម្រេចកិច្ចព្រមព្រៀងជាមួយគ្នាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ