ឥណ្ឌានឹងនាំចេញវ៉ាក់សាំងកូវីដ៨លានដូសក្នុងខែតុលាខាងមុខ
ប្រទេសឥណ្ឌានឹងនាំចេញវ៉ាក់សាំងបង្ការកូវីដចំនួន៨ លានដូសនៅត្រឹមចុងខែតុលាខាងមុខ បន្ទាប់ពីបញ្ចប់វិធានការបិទខ្ទប់ការនាំចេញថ្នាំបង្ការមួយរយៈរួចមក។ នេះបើយោងទៅតាមការឲ្យដឹងពីមន្ត្រីជាន់ខ្ពស់នៃក្រសួងការបរទេសឥណ្ឌាម្នាក់នៅថ្ងៃសៅរ៍ ទី ២៥ ខែកញ្ញា ឆ្នាំ២០២១។
ចុះផ្សាយនៅថ្ងៃ៖
ស្តាប់ - ០២:១២
នៅក្នុងកិច្ចប្រជុំមេដឹកនាំបក្សសម្ព័ន្ធចតុភាគី ជាមួយសហរដ្ឋអាមេរិក ជប៉ុន និងអូស្ត្រាលី ក្នុងទីក្រុងវ៉ាស៊ីនតោន នាយករដ្ឋមន្ត្រីឥណ្ឌាលោក ណារិនដ្រា ម៉ូឌី បានសន្យាថាប្រទេសឥណ្ឌានឹងផ្តើមបន្តណើរការនាំចេញវ៉ាក់សាំងកូវីដទៅក្រៅប្រទេសឡើងវិញ។
បើតាមរដ្ឋមន្ត្រីការបរទេសឥណ្ឌា លោកហាស វ៉ាដាន ស៊ីងឡា (Harsh Vardhan Shringla) វ៉ាក់សាំងដែលឥណ្ឌា នឹងនាំចេញឆាប់ៗនេះ គឺ Johnson & Johnson ដែលជាប្រភេទវ៉ាក់សាំងត្រូវការចាក់តែមួយដូស។ ហើយភាគច្រើននៃវ៉ាកសាំងទាំងនេះនឹងត្រូវដឹកបញ្ជូនទៅកាន់បណ្តាប្រទេសអាស៊ីប៉ាស៊ីហ្វិក។
កាលពីថ្ងៃសៅរ៍ម្សិលមិញ លោករដ្ឋមន្ត្រីការបរទេសឥណ្ឌាបានប្រាប់ក្រុមអ្នកកាសែតថាដំណើរដឹកបញ្ជូនវ៉ាក់សាំងទៅកាន់តំបន់ឥណ្ឌូប៉ាស៊ីហ្វិកនឹងធ្វើឡើងយ៉ាងឆាប់រហ័ស និងអាចរួចរាល់នៅចុងខែតុលាខាងមុខ។
គួរជម្រាបជូនថា ឥណ្ឌាគឺជាប្រទេស ផលិតវ៉ាក់សាំងធំបំផុតមួយនៅលើពិភពលោក និងបានសន្យាកាលពីដើមឆ្នាំ ២០២១នេះថា នឹងនាំចេញវ៉ាក់សាំងប្រឆាំងកូវីដឲ្យបានដល់មួយពាន់លានដូស នៅត្រឹមខែធ្នូ ឆ្នាំ ២០២២។
ក៏ប៉ុន្តែ ដោយសាររងគ្រោះខ្លាំងពីរលកឆ្លងកូវីដនៅក្នុងស្រុក រដ្ឋាភិបាលក្រុងញូវដែលីកាលពីខែឧសភាបានប្រកាសផ្អាកការនាំចេញវ៉ាកសាំងដើម្បីផ្តល់អាទិភាពដល់ការចាក់វ៉ាក់សាំងជូនប្រជាជនខ្លួនវិញ។
ក្រោយមកទៀត ដោយមើលឃើញថាករណីឆ្លងនិងការស្លាប់ដោយសារជំងឺកូវីដបានថយចុះ ទើបរដ្ឋអំណាចឥណ្ឌាសម្រេចលុបចោលវិធានការហាមឃាត់ការនាំចេញវ៉ាក់សាំងរបស់ខ្លួននៅសប្តាហ៍នេះ។
គួររំឭកថា ប្រទេសឥណ្ឌាបានរងគ្រោះពីរលកឆ្លងកូវីដយក្ស និងខ្វះខាតវ៉ាក់សាំងខ្លាំង នៅចន្លោះខែមីនា និងខែឧសភា ដែលកាលណោះមានប្រជាជនឥណ្ឌារាប់លានអ្នកបានឆ្លងកូវីដ ហើយមានស្លាប់យ៉ាងហោច ២៥ ម៉ឺននាក់។
បច្ចុប្បន្ននេះ មានវ៉ាក់សាំងចំនួនជិត ៨៤០ លានដូស ត្រូវបានអាជ្ញាធរឥណ្ឌា ចាក់ជូនប្រជាជន។ មានប្រជាជនពេញវ័យឥណ្ឌាជិតពាក់កណ្តាល បានចាក់វ៉ាក់សាំងមួយដូស ហើយមាន១៦ %បានទទួលការចាក់វ៉ាក់សាំងបង្ការកូវីដដូសទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ