ចិន៖បេសកកម្មត្រឡប់ដល់ផែនដីប្រកបដោយជោគជ័យរបស់អវកាសយានិកចំនួន ៣នាក់ពីស្ថានីយ៍អវកាសចិន
នៅថ្ងៃសុក្រ ទី១៧ កញ្ញា អវកាសយានិកចិនចំនួន ៣នាក់បានធ្វើដំណើរត្រឡប់ដល់ផែនដីវិញប្រកបដោយជោគជ័យ។ កាប់ស៊ុលដឹកអវកាសយានិកទាំង ៣នាក់បានចុះចតនៅលើវាលខ្សាច់ហ្គោប៊ី។ ការចុះចតនេះត្រូវបានគេថត និងផ្សាយផ្ទាល់តាមអ៊ីនធ័រនែតដោយមានពលរដ្ឋចិនជិត ៣០០លាននាក់តាមទស្សនា។ ព្រឹត្តិការណ៍មួយនេះត្រូវបានពលរដ្ឋ និងថ្នាក់ដឹកនាំចិនចាត់ទុកជាមោទនភាពជាតិ។ គួររម្លឹកថា អវកាសយានិកចិនចំនួន ៣នាក់បានទៅបំពេញបេសកកម្មរយៈពេល ៣ខែនៅលើស្ថានីយអវកាសរបស់ចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
នៅពេលចុះដល់ផែនដីវិញ អវកាសយានិកចិនទាំង ៣នាក់ត្រូវធ្វើចត្តាឡីសកដែលមិនជាប់ពាក់ព័ន្ធនឹងជំងឺកូវីដ១៩ ទេ។ តែជាចត្តាឡីសកដើម្បីឲ្យពួកគេរកឃើញឡើងវិញនូវភាពស៊ាំរបស់ផែនដី ព្រោះថា ភាពស៊ាំនេះបានចុះខ្សោយក្រោយពីពួកគេបានស្ថិតនៅលើអវកាសអស់រយៈពេល ៣ខែ នេះជាការបញ្ជាក់របស់លោកហ័ង វេហ្វេន អ្នកទទួលខុសម្នាក់នៃកម្មវិធីអវកាសស្នាក់នៅរបស់ចិន។ សម្រាប់ចិន បេសកកម្មរយៈពេល ៣ខែ នៅលើអវកាសជាការបំបែកកំណត់ត្រា និងជាការបោះជំហានថ្មីមួយទៀត។
ព្រឹត្តិការណ៍ត្រឡប់មកផែនដីវិញរបស់អវកាសយានិកចិនទាំង ៣រូបតាមរយៈកាប់ស៊ុលមួយនាថ្ងៃសុក្រ ទី១៧ កញ្ញាជាព្រឹត្តិការណ៍មួយដែលត្រូវបានគេថត និងផ្សាយផ្ទាល់តាមអ៊ីនធ័រនែតដោយមានការតាមទស្សនាពីពលរដ្ឋចិនចំនួន ២៩០លាននាក់។ ការចុះក្នុងចម្ងាយផ្លូវ ៣៩៣គីឡូម៉ែត្រ កាប់ស៊ុលបានធ្លាក់ចុះក្នុងល្បឿន ៧,៩គីឡូម៉ែត្រក្នុងមួយវិនាទី។ គឺនៅវេលាម៉ោង ១ និង ៣៤នាទីរសៀលម៉ោងក្នុងទីក្រុងប៉េកាំងដែលកាប់ស៊ុលបានទម្លាក់ខ្លួននៅលើវាលខ្សាច់ស្ថិតក្នុងខេត្តម៉ុងហ្គោលីខាងក្នុងរបស់ចិន។
គេត្រូវរង់ចាំអន្តរាគមន៍រួចរាល់របស់ក្រុមគ្រូពេទ្យទើបអវកាសយានិកទាំង ៣រូបអាចចេញពីកាប់ស៊ុលរបស់ពួកគេបាន។ ព្រឹត្តិការណ៍មួយនេះត្រូវបានពលរដ្ឋ និងថ្នាក់ដឹកនាំចិនចាត់ទុកជាមោទនភាពជាតិ។ គួររម្លឹកថា បេសកកម្មរបស់យានអវកាស Shenzhou-១២ ជាបេសកកម្មស្នាក់នៅទី១ របស់ចិនគិតតាំងពីជិត ៥ឆ្នាំកន្លងទៅ។ ក្រៅពីជាមោទនភាពជាតិ ជោគជ័យមួយនេះក៏ជាកិត្យានុភាពសម្រាប់គណបក្សកុម្មុយនិស្តចិនដែលបានប្រារព្ធខួប ១០០ឆ្នាំក្នុងឆ្នាំ ២០២១ នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ