កូរ៉េខាងជើងបដិសេធ មិនទទួលជំនួយវ៉ាក់សាំងប្រឆាំងកូវីដ១៩របស់ចិន ចំនួន៣លានដូស
យោងតាមការបញ្ជាក់ ពីអង្គការ Unicef របបផ្តាច់ការកូរ៉េខាងជើង បានបដិសេធ មិនទទួលវ៉ាក់សាំងបង្ការកូវីដ១៩ ចំនួន៣លានដូសដែលជាវ៉ាក់សាំងរបស់ចិនទេ។ កូរ៉េខាងជើង អះអាងថា គេមិនមានករណីឆ្លងកូវីដ១៩ទេ ហើយវ៉ាក់សាំងនោះគួរយកទៅឲ្យប្រទេសផ្សេង ដែលត្រូវការជាងនេះ ទើបជាការប្រសើរ។
ចុះផ្សាយនៅថ្ងៃ៖
ស្តាប់ - ០២:០៩
វ៉ាក់សាំងបង្ការកូវីដ១៩ របស់មន្ទីរពិសោធន៍ចិន Sinovac ចំនួនប្រមាណ៣លានដូស ដែលជាជំនួយរបស់រដ្ឋាភិបាលចិន ផ្តល់ឲ្យតាមរយៈយន្តការ Covax ត្រូវបានរបបផ្តាច់ការកូរ៉េខាងជើង បដិសេធមិនទទួលទេ។ នេះបើផ្អែកតាមប្រភពព័ត៌មាន ផ្តល់ឲ្យដោយអង្គការ Unicef កាលពីថ្ងៃព្រហស្បតិ៍ទី២កញ្ញា។
កូរ៉េខាងជើងបញ្ជាក់ថា ប្រទេសគេមិនត្រូវការវ៉ាក់សាំងទាំងនោះឡើយ ហើយវ៉ាក់សាំងនោះ គួរណាតែបង្វែរ ទៅឲ្យប្រទេសផ្សេង ដែលជួបបញ្ហាខ្វះវ៉ាក់សាំង ដើម្បីប្រយុទ្ធនឹងកូវីដវិញ ទើបជាការប្រសើរ។
យ៉ាងណាមិញ អ្នកនាំពាក្យអង្គការ Unicef បានបញ្ជាក់ប្រាប់ទីភ្នាក់ងារព័ត៌មានបារាំង AFP ថាគេនឹងបង្វែរ បញ្ជូនវ៉ាក់សាំងដែលកូរ៉េខាងជើងបដិសេធនោះ ទៅឲ្យប្រទេសផ្សេង ដែលកំពុងប្រឈមខ្លាំងនឹងការឆ្លងរាលដាលកូវីដ១៩។ អ្នកនាំពាក្យដដែលលើកឡើងថា កូរ៉េខាងជើងនៅតែបន្តទាក់ទងជាមួយយន្តការ Covax ដើម្បីអាចទទួលបានវ៉ាក់សាំងបង្ការកូវីដ១៩ ទៅថ្ងៃក្រោយទៀត។
គួរបញ្ជាក់ថា កូរ៉េខាងជើង តែងតែអះអាងជានិច្ចថា ក្នុងស្រុកខ្លួនគ្មានករណីឆ្លងកូវីដ១៩ទេ ដោយសារតែខ្លួន បានបិទព្រំដែនគ្រប់ច្រក បានយ៉ាងមានប្រសិទ្ធភាព។ តែយ៉ាងណាការបិទខ្ទប់ទាំងស្រុង របស់កូរ៉េខាងជើង កំពុងធ្វើឲ្យដង្ហើមសេដ្ឋកិច្ចនៃប្រទេសដ៏ក្រីក្រមួយនេះ កាន់តែលំបាកលំបិន។ កាលពីខែមិថុនា មេដឹកនាំកូរ៉េខាងជើង គីម ជុងអ៊ុន ខ្លួនឯងបានទទួលស្គាល់ថា កូរ៉េខាងជើងកំពុងប្រឈមនឹងបញ្ហាខ្វះស្បៀងអាហារ។
ដោយឡែក អ្នកជំនាញ មិនទុកចិត្តចំពោះការអះអាងរបស់កូរ៉េខាងជើង ថាគ្មានកូវីដនោះទេ។ កាលពីខែកក្កដា វិទ្យាស្ថានសិក្សាយុទ្ធសាស្ត្រ និងសន្តិសុខជាតិ ប្រចាំនៅកូរ៉េខាងត្បូង បានអះអាងថា កូរ៉េខាងជើងធ្លាប់បានប្រកែកមិនទទួលជំនួយវ៉ាក់សាំង AstraZeneca ពីយន្តការ Covax ម្តងរួចហើយ ដោយលើកហេតុផលថា មិនទុកចិត្តពីផលប៉ះពាល់លើសុខភាព។ យោងតាមអ្នកជំនាញនៃវិទ្យាស្ថាននេះ គឺកូរ៉េខាងជើងពុំមានហេដ្ឋារចនាសម្ព័ន្ធ ទូបង្កកធំៗដើម្បីអាចស្តុកទុកវ៉ាក់សាំង Pfizer ឬ Moderna ទេ។ ចំណែកវ៉ាក់សាំងរបស់ចិនវិញ គឺកូរ៉េខាងជើងមិនទុកចិត្តពីគុណភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ