អាមេរិកនិងជប៉ុន រួមគ្នាបញ្ចុះបញ្ចូលចិន ឲ្យចូលរួមកាន់តែច្រើន ក្នុងការកាត់បន្ថយឧស្ម័នកាបូនិក
លោកចន ឃែរី ប្រេសិតពិសេសរបស់រដ្ឋាភិបាលអាមេរិក ទទួលបន្ទុកកិច្ចការអាកាសធាតុ បានទៅជួបរដ្ឋមន្ត្រីការបរទេសជប៉ុន នៅទីក្រុងតូក្យូ នៅថ្ងៃអង្គារនេះ មុននឹងទៅជួបភាគីចិន នៅទីក្រុងធានជីង។ ជប៉ុន និង អាមេរិក បានរួមគ្នាសន្យាថា នឹងស្នើសុំទៅចិន ឲ្យបន្ថែមការប្រឹងប្រែង ក្នុងការកាត់បន្ថយឧស្ម័នកាបូនិក ដើម្បីចូលរួមកាត់បន្ថយកំដៅផែនដី។ ដំណើរទៅជួបនិយាយ របស់លោកចន ឃែរី នៅជប៉ុននិងនៅចិននេះ គឺដើម្បីត្រៀមរៀបចំ សន្និសីទអន្តរជាតិស្តីពីអាកាសធាតុ COP26 ដែលនឹងបើកនៅខែវិច្ឆិកាខាងមុខ ខណៈដែល អាមេរិក ចិន ជប៉ុន គឺជាប្រទេសបញ្ចេញឧស្ម័នកាបូនិក ច្រើនជាងគេបំផុត។
ចុះផ្សាយនៅថ្ងៃ៖
ស្តាប់ - ០២:៣៨
យោងតាមលិខិតរបស់ក្រសួងការបរទេសអាេមរិក លោក ចន ឃែរី បានជួបនិយាយជាមួយភាគីជប៉ុន ដើម្បីលើកឡើងអំពីការប្រឹងប្រែងចូលរួម ទាំងទ្វេរភាគី និងពហុភាគី ក្នុងយុទ្ធនាការកាត់បន្ថយកំដៅផែនដី។ ចេញពីក្រុងតូក្យូ លោក ចន ឃែរី នឹងបន្តដំណើរទៅជួបលោក រដ្ឋមន្ត្រីការបរទេសចិន នៅទីក្រុងធានជីង។
នៅក្នុងសន្និសីទកាសែត ក្រោយជួបជាមួយលោក ចន ឃែរី លោក Toshimitsu Motegi រដ្ឋមន្ត្រីការបរទេសជប៉ុន បានបញ្ជាក់ថា ជប៉ុន និងអាមេរិកនឹងរកវិធីបញ្ចុះបញ្ចូល សុំឲ្យរដ្ឋាភិបាលចិន ចូលរួមឲ្យបានច្រើនជាងនេះ។ លោករដ្ឋមន្ត្រីការបរទេសជប៉ុន បន្ថែមថា ចិនគឺជាប្រទេសបញ្ចេញឧស្ម័នកាបូនិកច្រើនជាងគេបង្អស់ ហើយក៏ជាមហាអំណាចសេដ្ឋកិច្ចលំដាប់ទី២ទៀត។ ដូច្នេះ វាជារឿងចាំបាច់ ដែលយើងត្រូវរំលឹក ឲ្យចិនបានយល់ដឹង ពីទំនួលខុសត្រូវរបស់ខ្លួន ទាក់ទិននឹងវិបត្តិអាកាសធាតុ។
គួរបញ្ជាក់ថា សន្និសីទអន្តរជាតិស្តីពីអាកាសធាតុ នឹងចាប់ផ្តើមបើកនៅខែវិច្ឆិកា នៅទីក្រុងហ្កាសកូវ តំបន់អេកូស។ លោក ចន ឃែរី កំពុងតែព្យាយាមបញ្ចុះបញ្ចូល ឲ្យប្រទេសធំៗ ដែលបញ្ចេញឧស្ម័នកាបូនិកច្រើនបំផុតនោះ ឲ្យចូលរួមប្រឹងប្រែងបន្ថែមទៀត នៅក្នុងការទប់សីតុណ្ហភាពផែនដី។
ក្នុងនាមជាប្រទេសបញ្ចេញឧស្ម័នកាបូនិកច្រើនលំដាប់ទី៣ ជប៉ុនបានប្តេជ្ញាថានឹងឈានទៅសម្រេច កម្មវត្ថុអព្យាក្រិត្យភាពកាបូន នៅឆ្នាំ២០៥០។ តែយ៉ាងណា ជប៉ុនកំពុងតែងាកទៅប្រើប្រាស់ថាមពលធ្យូងថ្ម ជំនួសឲ្យថាមពលនុយក្លេអ៊ែរ បន្ទាប់ពីជួបមហន្តរាយនុយក្លេអ៊ែរ Fukushima ដោយសាររលកយក្សស៊ូណាមី នៅឆ្នាំ២០១១។ ចំណែកចិនវិញ បានកំណត់អព្យាក្រិត្យភាពកាបូននៅឆ្នាំ២០៦០។ តែយ៉ាងណាចិនទើបតែបានប្រកាសពីការប្រឹងប្រែងបន្ថែម ដោយដំឡើងភាគរយនៃការកាត់បន្ថយឧស្ម័នកាបូនិក ពី២៦% ទៅ៤៦% នៅរវាងឆ្នាំ២០៣០។ ការប្រឹងប្រែងរបស់ចិននេះ ត្រូវបានលោកចន ឃែរីអបអរផងដែរ។
ទោះជាយ៉ាងនេះក្តី ការសន្យារបស់ប្រទេសធំៗ ហាក់ដូចជានៅឆ្ងាយ មិនទាន់គ្រប់គ្រាន់ទេក្នុងការទប់ការកើនសីតុណ្ហភាពផែនដី។ យោងតាមរបាយការណ៍របស់អ្នកជំនាញអាកាសធាតុ នៃអង្គការសហប្រជាជាតិ (Giec) ផែនដីយើង នឹងឡើងកំដៅចំនួន ១.៥°c នៅរវាងឆ្នាំ២០៣០ បើប្រៀបធៀបទៅនឹងកម្រិតសម័យបុរេឧស្សាហកម្ម។ ពោលគឺការកើនឡើងនេះលឿនរហ័ស ជាងការរំពឹងស្មានទុក ដល់ទៅ១០ឆ្នាំ។ អ្នកជំនាញអះអាងថា មនុស្សគឺជាដើមហេតុនៃបញ្ហានេះ។ ដូច្នេះប្រសិនបើចង់កាត់បន្ថយផលប៉ាល់ពាល់ផ្នែកអាកាសធាតុ គឺត្រូវតែមនុស្សខ្លួនឯង ប្រឹងប្រែងកាត់បន្ថយឧស្ម័នកាបូនិក ឲ្យបានច្រើនបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ