សកម្មជនសិទ្ធិមនុស្សអាហ្វហ្កានីស្ថាន៖ការសម្រេចរបស់អាមេរិក និងសហគមន៍អន្តរជាតិជាការសម្រេចដ៏អាក្រក់
នៅក្នុងប្រទេសអាហ្វហ្កានីស្ថាន អាកាសយានដ្ឋានក្រុងកាប៊ុលកំពុងបន្តកកកុញដោយមនុស្សជាច្រើនរយនាក់ដែលកំពុងព្យាយាមចូលក្នុងអាកាសយានដ្ឋាន។ ទន្ទឹមគ្នានេះ ប្រតិបត្តិការជម្លៀសជនបរទេស និងប្រជាជនអាហ្វហ្កានីស្ថានក៏កំពុងបន្តមានយ៉ាងសកម្ម ខណៈដែលប្រធានាធិបតីអាមេរិកលោកចូ បៃដិនបានរក្សាទុកថ្ងៃទី៣១ សីហាជាថ្ងៃនៃការដកទ័ពអាមេរិកទាំងអស់ចេញពីទឹកដីអាហ្វហ្កានីស្ថាន។ ការសម្រេចចិត្តរបស់លោកបៃដិនយ៉ាងដូចនេះបានធ្វើឲ្យប្រជាជនអាហ្វហ្កានីស្ថានភាគច្រើនមានការព្រួយបារម្ភជាពន់ពេក ពិសេសក្រុមសកម្មជនសិទ្ធិមនុស្ស។ សកម្មជនសិទ្ធិមនុស្សម្នាក់ដែលសុំលាក់អត្តសញ្ញាណបានយល់ឃើញថា អវត្តមានកម្លាំងបរទេសនៅអាហ្វហ្កានីស្ថាននឹងនាំផលវិបាកធំៗដល់ប្រទេស និងប្រជាជនអាហ្វហ្កានីស្ថានជាថ្មី។ តាមសកម្មជនសិទ្ធិមនុស្សរូបនេះដដែល ការសម្រេចចិត្តរបស់អាមេរិក និងសហគមន៍អន្តរជាតិជាការសម្រេចចិត្តដ៏អាក្រក់។
ចុះផ្សាយនៅថ្ងៃ៖
ស្តាប់ - ០១:៤៣
« គឺជាបញ្ហាធំមួយសម្រាប់អាមេរិក និងសហគមន៍អន្តរជាតិ។ ពួកគេបានស្ថិតនៅក្នុងប្រទេសអាហ្វហ្កានីស្ថានអស់រយៈពេល ២០ឆ្នាំ។ ពួកគេបានគ្រប់គ្រងប្រទេស និងបានជួយយើង។ សេចក្តីសម្រេចដកទ័ពរបស់ពួកគេជាសេចក្តីសម្រេចអាក្រក់។ ពួកគេមិនបានកំចាត់ពួកតាលីបង់ឲ្យដល់ឫសគល់ មិនបានកំចាត់ភេរវនិយម និងមិនបានបំបាត់ភាពរើសអើងពូជសាសន៍ដែលកំពុងមានវត្តមានខ្លាំងនៅក្នុងទឹកដីអាហ្វហ្កានីស្ថានឡើយ។ ពួកគេមិនបានប្រយុទ្ធប្រឆាំងទេ ហើយបញ្ហាធំទាំងអស់នេះនឹងត្រឡប់មកវិញជាថ្មីនៅក្នុងប្រទេសអាហ្វហ្កានីស្ថាន។
យើងត្រូវការកម្លាំងទ័ពអាមេរិក។ បើពួកគេចាកចេញអស់ទៅ មានមនុស្សយ៉ាងច្រើននឹងទទួលរងគ្រោះដោយអំពើភេរវកម្ម។ យើងកំពុងទទួលរងទុក្ខ និងការឈឺចាប់ដោយទង្វើនេះរួចទៅហើយ។ យើងមិនដឹងថា តើយើងនឹងក្លាយទៅជាយ៉ាងណាទេ។ ខ្ញុំជាសកម្មជនសិទ្ធិមនុស្សម្នាក់ ហើយពួកតាលីបង់បានព្រមានខ្ញុំដោយសួរខ្ញុំថា ហេតុអ្វីបានជាខ្ញុំផ្សព្វផ្សាយព័ត៌មានប្រឆាំងនឹងពួកគេនៅលើបណ្តាញសង្គមហ្វេសប៊ុក។ អ៊ីចឹងហើយបានជាពេលនេះ ខ្ញុំបានលាក់ខ្លួន ខ្ញុំកំពុងរស់នៅក្នុងជីវិតអាថ៌កំបាំង។
ខ្ញុំមិនដឹងថា តើនឹងត្រូវធ្វើអ្វីទេ។ ពួកតាលីបង់សម្លាប់ក្រុមសកម្មជនសិទ្ធិមនុស្ស សម្លាប់មនុស្ស។ ពួកតាលីបង់ហាមឃាត់ស្រ្តីមិនឲ្យទៅធ្វើការ មិនឲ្យទៅសាលារៀន និងមិនឲ្យទៅសកលវិទ្យាល័យ។ ពួកគេមិនជឿលើសិទ្ធិមនុស្សទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ