អង្គការមនុស្សធម៌៖ប្រជាជនអាហ្វហ្កានីស្ថានកំពុងត្រូវការជំនួយមនុស្សធម៌គ្រប់ផ្នែក
នៅក្នុងប្រទេសអាហ្វហ្កានីស្ថាន ខណៈដែលស្ថានការណ៍របស់ប្រទេសកំពុងស្ថិតក្នុងភាពច្របូកច្របល់នៅក្រោយការវាយចូលក្រុងកាប៊ូលរបស់ពួកតាលីបង់ អង្គការមនុស្សធម៌ឈ្មោះ « Action contre la faim » បានសម្តែងក្តីបារម្ភពីវិបត្តិមនុស្សធម៌ដែលប្រជាជនអាហ្វហ្កានីស្ថានកំពុងប្រឈម។ លោក Thomas Nobre នាយករងអង្គការ « Action contre la faim » បានរៀបចំពីជំនួយមនុស្សធម៌ដែលប្រជាជនអាហ្វហ្កានីស្ថានត្រូវការ និងពីការរៀបចំជំនួយនៅនឹងកន្លែង។ ទន្ទឹមគ្នានេះ លោក Thomas ក៏បានបញ្ជាក់ពីការលំបាកដែលអង្គការរបស់លោកកំពុងជួបប្រទះដែរ។
ចុះផ្សាយនៅថ្ងៃ៖
ស្តាប់ - ០១:២៦
« តម្រូវការមាននៅក្នុងគ្រប់ផ្នែកទាំងអស់ ទោះជាផ្នែកទឹកស្អាត ផ្នែកសុខភាព ឬមួយក៏ស្បៀងអាហារជាដើម។ បន្ទាប់មក អង្គការរបស់យើងត្រូវចូលរួមជួយទំនុកបម្រុងដល់ប្រជាជនបម្លាស់ទីដែលបានភៀសខ្លួនគេចពីជម្លោះប្រដាប់អាវុធនៅក្នុងខេត្តកំណើតរបស់ពួកគេ។ ប្រជាជនបម្លាស់ទីទាំងនេះត្រូវការជំនួយ និងការគាំទ្រចាំបាច់ដើម្បីកសាងភាពធន់ដែលកំពុងមានភាពផុយស្រួយខ្លាំងនៅអាហ្វហ្កានីស្ថាន។
ក៏ប៉ុន្តែ យើងមិនដឹង និងមិនអាចមើលឃើញពីស្ថានការណ៍នៅតាមខេត្តមួយចំនួនដែលកំពុងស្ថិតក្រោមការកាន់កាប់របស់ពួកតាលីបង់ និងខេត្តមួយចំនួនទៀតដែលការប្រយុទ្ធកំពុងបន្តមាន។ ការរៀបចំគម្រោងផ្តល់ជំនួយមានការលំបាកខ្លាំងណាស់ បួករួមទាំងការលំបាកក្នុងផ្នែកទូរគមនាគមន៍ និងផ្នែកដឹកជញ្ជូនតាមផ្លូវអាកាសក្នុងស្រុក។ នៅពេលដែលអាកាសយានដ្ឋានស្ថិតក្រោមការគ្រប់គ្រងរបស់ពួកតាលីបង់ តើយន្តការមួយណាដែលនឹងត្រូវអនុវត្ត?។
សំណួរដូចគ្នានេះក៏ចោទឡើងសម្រាប់រូបភាពអនាគតរដ្ឋបាលថ្មីដែរ តើរដ្ឋបាលប្រភេទណាដែលនឹងត្រូវបង្កើតឡើងនៅតាមបណ្តាខេត្ត?។ ដូច្នេះឃើញថា យើងគ្មានភាពច្បាស់លាស់អ្វីទាំងអស់ដើម្បីអនុវត្តគម្រោងរបស់យើងឲ្យមានប្រសិទ្ធិភាព »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ