ទីផ្សារហិរញ្ញវត្ថុអាស៊ីធ្លាក់ចុះក្រោយចិនប្រកាសបន្តរឹតបន្តឹងការត្រួតពិនិត្យក្រុមហ៊ុនជាច្រើន
ទីផ្សារហិរញ្ញវត្ថុអាស៊ីភាគច្រើនបានធ្លាក់ចុះនៅថ្ងៃព្រហស្បតិ៍ ទី១២ សីហានេះ បន្ទាប់ពីចិនប្រកាសថានឹងបន្តរឹតបន្តឹងការត្រួតពិនិត្យលើក្រុមហ៊ុនក្នុងវិស័យសំខាន់ៗជាច្រើនក្នុងរយៈពេលជាច្រើនឆ្នាំទៅមុខទៀត។
ចុះផ្សាយនៅថ្ងៃ៖
ស្តាប់ - ០២:០៨
អស់រយៈពេលជាច្រើនសប្តាហ៍មកហើយដែលទីផ្សារហិរញ្ញវត្ថអាស៊ីជាច្រើនបានរងផលប៉ះពាល់ពីវិធានការរឹតបន្តឹងការត្រួតពិនិត្យរបស់អាជ្ញាធរចិន លើក្រុមហ៊ុនក្នុងវិស័យជាច្រើនរួមមានវិស័យបច្ចេកវិទ្យាអ៊ីនធ័រនែតជាដើម។
ភាគហ៊ុននៅហុងកុង សៀងហៃ តូក្យូ សេអ៊ូល វ៉េលីងតុន តៃប៉ិ និងម៉ានីល បានធ្លាក់ចុះ បើទោះបីជាទីផ្សារភាគហ៊ុនដ៏ធំរបស់អាមេរិក (Wall Street) មានការកើនឡើងក៏ដោយ។ ក្រុមអ្នកលេងភាគហ៊ុនបានប៉ាន់ស្មានថាតម្លៃទីផ្សារភាគហ៊ុនអាមេរិកបានល្អប្រសើរវិញ ក្រោយពេលមានការធ្លាក់ចុះនៃអតិផរណាដែលជាបន្ធូរបន្ធយសម្ពាធខ្លះទៅលើធនាគារកណ្តាលអាមេរិក។
នៅអាស៊ី វិធានការរឹតត្បិតរបស់អាជ្ញាធរចិនបានជះឥទ្ធិពលអាក្រក់ដល់ទីផ្សារហិរញ្ញវត្ថុ។ ក្រុមអ្នកវិនិយោគិនអាស៊ីកំពុងសម្លឹងមើលប្រទេសចិនដោយប្រយ័ត្នប្រយែង បន្ទាប់ពីរដ្ឋាភិបាលក្រុងប៉េកាំងប្រកាសពីវិធានការថ្មីៗដើម្បីបន្តរឹតបន្តឹងការត្រួតពិនិត្យលើ ក្រុមហ៊ុនជាច្រើនរួមមានទាំងក្រុមហ៊ុនដែលប្រើប្រាស់បច្ចេកវិទ្យាអ៊ីនធ័រនែត និងលក់ភាគហ៊ុនលើទីផ្សារអន្តរជាតិ។
កាលពីថ្ងៃពុធម្សិលមិញ ក្រុមប្រឹក្សារដ្ឋរបស់ចិនបានបង្ហាញពីការជំរុញរបស់រដ្ឋាភិបាល ក្នុងការធ្វើនិយ័តកម្មផ្នែកសេដ្ឋកិច្ចដែលនឹងបន្តក្នុងរយៈពេល ៥ ឆ្នាំខាងមុខទៀត។ សេចក្តីថ្លែងការណ៍មួយដែលចេញដោយក្រុមប្រឹក្សានិងគណៈកម្មាធិការកណ្តាលរបស់បក្សកុម្មុយនិស្តបាននិយាយថាវិស័យជាច្រើនរួមទាំងការបង្រៀនឯកជន ម្ហូបអាហារ និងថ្នាំសង្កូវផងក៏នឹងត្រូវអនុវត្តច្បាប់ត្រួតពិនិត្យតឹងរ៉ឹងជាងមុនដែរ។
សេចក្តីថ្លែងការណ៍នេះ បានបង្កឲ្យក្រុមអ្នករកស៊ីមានការព្រួយបារម្ភខ្លាំង ពីព្រោះតែមិនដឹងថា មន្រ្តីចិននឹងបញ្ចប់វិធានការរឹតបន្តឹងនេះនៅពេលណានោះទេ។ ពាក់ព័ន្ធរឿងនេះ លោក Graham Webster ដែលជាអ្នកដឹកនាំគម្រោង DigiChina នៅមជ្ឈមណ្ឌលគោលនយោបាយអ៊ីនធ័រនែតរបស់សាកលវិទ្យាល័យស្ទែនហ្វដ បាននិយាយថាគេមិនវាយតម្លៃដឹងនោះទេពីទំហំនៃប៉ះពាល់លើទីផ្សារភាគហ៊ុនដោយគ្រាន់តែសំអាងលើ ឯកសារមួយ ឬឯកសារមួយចំនួនផ្សេងទៀតនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ