អ្នកជំនាញចិនកំពុងចោទសួរអំពីប្រសិទ្ធភាពនៃយុទ្ធសាស្ត្រ “សូន្យកូវីដ”
គ្រាន់តែរកឃើញមានករណីវិជ្ជមានមេរោគកូវីដបំប្លែងខ្លួន “ដែលតា” ភ្លាម អាជ្ញាធរចិនបានចាត់វិធានការបិទខ្ទប់ និងកំរិតការធ្វើដំណើរយ៉ាងតឹងតែងភ្លាម ព្រមទាំង បានបើកយុទ្ធនាការធ្វើតេស្តទ្រង់ទ្រាយធំទាំងសង្កាត់ៗ ឬទាំងក្រុងៗតែម្តង។ ជាក់ស្តែង នៅទីក្រុងវ៉ូហាន ទីដែលមានផ្ទុះកូវីដករណីដំបូងគេបំផុតកាលពី ចុងខែធ្នូឆ្នាំ២០១៩ យុទ្ធនាការធ្វើតេស្តកូវីដ លើប្រជាពលរដ្ឋទាំងជាង១១លាននាក់ ទើបបានបិទបញ្ចប់នៅថ្ងៃអាទិត្យទី ៨ សីហាម្សិលមិញ។ ទន្ទឹមពេលជាមួយគ្នានេះ ក្រុមអ្នកជំនាញចិន បានអំពាវនាវឱ្យអាជ្ញាធរធ្វើការពិចារណាឡើងវិញអំពី យុទ្ធសាស្ត្រ “ហ្សេរ៉ូកូវីដ ឬ សូន្យកូវីដ” ដើម្បីសម្របខ្លួនរស់ជាមួយកូវីដ។
ចុះផ្សាយនៅថ្ងៃ៖
ស្តាប់ - ០២:០៤
ជាសំឡេងភាគតិចនៅឡើយទេ ប៉ុន្តែសំខាន់ក្នុងរង្វង់អ្នកវិទ្យាសាស្ត្រ។ បើតាមសារព័ត៌មាន South China Morning Post ក្រុមសកលវិទ្យាធិការ និងប្រធានមជ្ឈមណ្ឌលជាតិការពារនិងត្រួតពិនិត្យជំងឺ ដែលជាអ្នកជំនាញរោគរាតត្បាត បានជួបពិភាក្សាគ្នា កាលពីថ្ងៃអាទិត្យ ទី ៨ សីហា អំពីប្រសិទ្ធភាពនៃយុទ្ធសាស្ត្រ "ហ្សេរ៉ូកូវីដ" ដោយចង់ឱ្យអាជ្ញាធរប្តូរយុទ្ធសាស្ត្រដើម្បីសម្របខ្លួនរស់ជាមួយកូវីដ។
សម្រាប់អ្នកវិទ្យាសាស្ត្រក្រុមនេះ យុទ្ធសាស្ត្រ "០កូវីដ" ជាបន្ទុកដ៏ធ្ងន់ខ្លាំង និងពុំបានទាញប្រយោជន៍ពីការចាក់ថ្នាំបង្ការទេ។ ម្យ៉ាងវិញទៀត ករណីវិជ្ជមានកូវីដឆ្លងថ្មី ភាគច្រើនជាជំងឺស្រាល ដែលមិនគួរណាក្លាយជាសម្ពាធនិងបង្កភាពស្លន់ស្លោដល់សង្គម ដូចអ្វីដែលមានកើតឡើងនៅតាមខេត្តក្រុង និងនៅវូហាន មួយខែកន្លងមកនេះទេ។
សូមបញ្ជាក់ថា ប៉ុន្មានសប្តាហ៍ចុងក្រោយនេះ ភូមិឋាន សង្កាត់ក្រុងខ្លះ ត្រូវបិទខ្ទប់ ប្រជាជនផ្អើលឆោទៅវិញឥវ៉ាន់មកស្តុកទុក ... មានសណ្ឋានដូចផ្ទុះកូវីដដំបូង។ នេះមិននិយាយអំពីការដាក់ទណ្ឌកម្ម លើអ្នកទទួលត្រូវខេត្តជាងសាមសិបនាក់ ពីបទគ្រប់គ្រងស្ថានការណ៍មិនបានបណ្តោយឱ្យមានករណីឆ្លងកូវីដផង។
ប៉ុន្តែអតីតរដ្ឋមន្ត្រីក្រសួងសុខាភិបាលចិន មិនគាំទ្រដាច់ខាត ការប្តូរយុទ្ធសាស្ត្រមករៀនរួមរស់ជាមួយកូវីដ។ លោកជឿជាក់ជានិច្ចថាចិននឹងអាចលុបបំបាត់កូវីដបាន ហើយអាចដើរចេញវិបត្តិកូវីដ តាមរយៈយុទ្ធសាស្ត្រ "គ្មានកូវីដសោះឬសូន្យកូវីដ"។
យុទ្ធសាស្ត្រ ដែលជាវិធានការយ៉ាងតឹងតែង។ ការបិទខ្ទប់ កំរិតការធ្វើដំណើរ ដាក់ពណ៌ឱ្យតំបន់មួយទៅតាមស្ថានភាពមានករណីវិជ្ជមានជាតំបន់ក្រហម ឬលឿងទុំ ដែលអាចត្រលប់មកជាតំបន់បៃតង(ធម្មតា)វិញដរាបលែងមានករណីវិជ្ជមានសោះរយៈពេល១៤ថ្ងៃ លើកពេលបើកបវេសនកាល នៅប៉េកាំង ឬបន្តបិទទ្វារទីកន្លែងវប្បធម៌ជាបណ្តោះអាសន្នទៀតសិន ... ចិនធ្វើគ្រប់យ៉ាងទាំងអស់ដើម្បីការពារនិងទប់ស្កាត់មិនឱ្យមានករណីវិជ្ជមានកូវីដក្នុងទឹកដីខ្លួនជាថ្មី ជាពិសេសគឺនៅរដ្ឋធានីប៉េកាំងតែម្តង។
វិធានការនេះ បានកំរិតការចម្លងកូវីដបំប្លែងខ្លួនដែលតា ឱ្យមានត្រឹម៦០០នាក់ (៨១នាក់ក្នុងមួយថ្ងៃអាទិត្យទី៨សីហា) ក្នុងមួយខែ និងគ្មានស្លាប់ម្នាក់សោះក្នុងរលកចម្លងថ្មីនេះ។ ដូច្នេះ គំនិត ចង់ប្តូរផ្លាស់យុទ្ធសាស្ត្រ "០កូវីដ" ពិតជាពិបាកទទួលណាស់សម្រាប់អាជ្ញាធរចិនដែលស្រមៃចង់រៀបចំកីឡាអូឡាំពិករដូវរងារចុងឆ្នាំ២០២២ដោយមានទស្សនិជនចូលរួមយ៉ាងច្រើននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ