ចិនកាត់ទោសមហាសេដ្ឋីម្នាក់ ដែលរិះគន់រដ្ឋាភិបាល ឲ្យជាប់ពន្ធនាគារ ១៨ឆ្នាំ
តុលាការចិន នៅថ្ងៃទី២៨កក្កដា បានសម្រេចកាត់ទោសមហាសេដ្ឋីចិនម្នាក់ ឲ្យជាប់ពន្ធនាគារ ១៨ឆ្នាំ ចំពោះបទល្មើសជាច្រើនករណី។ ក៏ប៉ុន្តែ មេធាវីការពារ មហាសេដ្ឋីរូបនេះ បានបញ្ជាក់ថា « តុលាការកាត់ក្តីមិនត្រឹមត្រូវ ហើយរំលោភបំពានសិទ្ធរបស់ជនជាប់ចោទ » ។ មហាសេដ្ឋីចិន រូបនេះ ត្រូវគេស្គាល់ថា ជាអ្នកមានលុយម្នាក់ ដែលតែងតែរិះគន់រដ្ឋអំណាចនិងមន្ត្រីមូលដ្ឋាន ចំពោះចំណាត់ការមិនល្អមួយចំនួន នាពេលកន្លងទៅ។
ចុះផ្សាយនៅថ្ងៃ៖
ស្តាប់ - ០២:១៣
មហាសេដ្ឋី លោក ស៊ិន ដាវូ (Sun Dawu) មានកេរ្តី៍ឈ្មោះខ្លាំងខាងឧស្សាហកម្មកសិកម្ម ។ បង្កើតជំនួញចិញ្ចឹមមាន់ និងជ្រូក នៅឆ្នាំ១៩៨៤ លោកចេះតែកាក់កប រហូតពង្រីកមុខរបបផ្នែកសុខាភិបាល និងទេសចរណ៍។ ជំនួញចេះតែមានលាព ក្រុមហ៊ុនរបស់លោក បានបង្កើតសាលារៀន និងមន្ទីរពេទ្យ បន្ថែមទៀត។ កេរ្តិ៍ឈ្មោះសេដ្ឋីរូបនេះ ល្បីរន្ទឺពាសពេញប្រទេស ពិសេសតំបន់ភាគខាងជើងប្រទេសចិន។
មហាសេដ្ឋីវ័យ៦៧ឆ្នាំនិងក្រុមគ្រួសារ ត្រូវកម្លាំងសមត្ថកិច្ចចិន ចាប់ឃុំខ្លួន នៅចុងឆ្នាំ២០២០ បន្ទាប់មានជម្លោះក្តីក្តាំ រឿងដីធ្លីកសិកម្មមួយកន្លែង នៅក្នុងខេត្តហឺប៉ី។ តុលាការចិន ថ្ងៃទី២៨កក្កដា បានកាត់ទោសរូបលោក ឲ្យជាប់ពន្ធនាគារចំនួន១៨ឆ្នាំ ហើយពិន័យជាប្រាក់បន្ថែម ចំនួន ៣,១១លានយ៉ន់ ប្រហែលស្មើនឹង ៤០៥ ០០០ អឺរ៉ូ។ លោកសេដ្ឋីចិននេះ បានជាប់បទចោទជាច្រើនករណី ដូចជា បទល្មើសចម្រាញ់រ៉ែខុសច្បាប់, កាន់កាប់ដីកសិកម្មខុសច្បាប់, ប្រមូលផ្តុំគ្នាបង្កការរាំងស្ទះដល់ស្ថាប័នរដ្ឋ ឬបទពិរុទ្ធ បង្កចលាចល ជាដើម។
លោកមហាសេដ្ឋី ធ្លាប់មានទំនាស់នឹងផ្លូវច្បាប់ម្តងហើយ កាលពីឆ្នាំ២០១៣ ដែលកាលណោះ លោកត្រូវតុលាការកាត់ទោសដាក់ពន្ធនាគារ ៤ឆ្នាំ ពីបទប្រមូលមូលនិធិសម្រាប់ក្រុមហ៊ុន ដោយខុសច្បាប់ គ្មានការអនុញ្ញាតពីធនាគារកណ្តាលចិន។ ប៉ុន្តែ ទោសកាលនោះ ត្រូវព្យួរ។
មុនពេលចាប់ខ្លួន នៅចុងឆ្នាំ២០២០ មហាសេដ្ឋីចិន ស៊ិន ដាវូ ធ្លាប់បានរិះគន់អាជ្ញាធរចិន ចំពោះចំណាត់ការជំងឺកូវីដ នៅពេលដែលមេរោគនេះរាតត្បាត ពីដំបូងៗឡើយ។ នាពេលកន្លងទៅ លោកក៏ធ្លាប់រិះគន់អាជ្ញធរចិន ដែលចាត់ការមិនបានត្រឹមត្រូវ ជុំវិញរឿងសម្លាប់ជ្រូករាប់លានក្បាល ព្រោះតែជំងឺផ្តាសាយជ្រូក។
ជាទូទៅ លោកសេដ្ឋីចិននេះ ត្រូវគេចាត់ទុកថា ជាមនុស្សមាត់ឆៅ និយាយត្រង់ និងជាអ្នករិះគន់ចំណុចប្រហោងរបស់រដ្ឋអំណាច។ ការកាត់ទោសលោកសេដ្ឋីកសិកម្ម នៅពេលនេះ ជាការសំពងព្រនង់បន្ថែមទៀត ចំពោះអ្នកមានលុយ នៅក្នុងវិស័យឯកជន ដែលប្រឆាំង ឬរិះគន់ ប្រព័ន្ធដឹកនាំកុម្មុយនីស្តចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ