ចិនបដិសេធមិនឱ្យអង្គការសុខភាពពិភពលោកបន្តការអង្កេតរកប្រភពកូវីដ១៩
ប៉េកាំងមិនពេញចិត្តការស្រាវជ្រាវរបស់អ្នកជំនាញអង្គការសុខភាពពិភពលោក និងមិនអាចទទួលយកបានឡើយនូវរាល់ការសង្ស័យដែលថាមេរោគកូវីដ១៩ ទំនងជាអាចធ្លាយចេញពីមន្ទីរពិសោធន៍ចិន។ នៅថ្ងៃព្រហស្បតិ៍ទី ២២កក្កដា២០២១នេះ អនុរដ្ឋមន្ត្រីក្រសួងសុខាភិបាលចិន បានបរិហារអង្គការសុខភាពពិភពលោកថា ក្រអឺតក្រទម និង ប្រកាសច្រានចោលសំណើសុំអង្កេតរកប្រភពដើមនៃជំងឺកូវីដ១៩ នៅក្នុងផ្ទៃប្រទេសខ្លួន។
ចុះផ្សាយនៅថ្ងៃ៖
ស្តាប់ - ០១:៥១
កាលពីសប្តាហ៍មុន នាយកអង្គការសុខភាពពិភពលោក Tedros Adhanom Ghebreyesus បានស្នើសុំធ្វើសវនកម្មមន្ទីរពិសោធន៍នៅក្នុងតំបន់ដែលមានលេចមេរោគកូរ៉ូណាវីរុសដំបូងគេ ពោលគឺមន្ទីរពិសោធន៍នៅក្រុងវ៉ូហាន ដែលជាកន្លែងផ្ទុះជំងឺកូវីដ១៩មុនគេ កាលពីខែធ្នូ២០១៩។
ប៉ុន្តែចិនមិនទទួលស្វាគមន៍សំណើនេះទេ។ នៅក្នុងសន្និសីទកាសែត លោក ហ្សេង យៀស៊ីន អនុរដ្ឋមន្ត្រីក្រសួងសុខាភិបាលចិន បានសម្តែងការភ្ញាក់ផ្អើលយ៉ាងខ្លាំងចំពោះសំណើ សុំបន្តការអង្កេតរកប្រភពដើមនៃជំងឺកូវីដ១៩ របស់អង្គការសុខភាពពិភពលោក ដោយបានបន្ទោសថា អង្គការសុខភាពពិភពលោកគ្មានឆន្ទៈល្អ មិនចេះគោរព និងមានភាពក្រអឺតក្រទមដាក់វិទ្យាសាស្ត្រណាស់។
ចិនបានបដិសេធដាច់ខាត តាំងពីដំបូង និងជារហូតមក ថា គ្មានទេការលេចធ្លាយមេរោគកូវីដចេញពីមន្ទីរពិសោធន៍ចិនណាមួយ ឬក៏មន្ទីរពិសោធន៍របស់វិទ្យាស្ថានស្រាវជ្រាវមេរោគវ៉ូហាន ដូចជំនឿរបស់ប្រទេសមួយចំនួននោះឡើយ។ អ្នកទទួលខុសត្រូវវិទ្យាស្ថាន ក៏បានចេញមុខមកធានាអះអាងជាថ្មី នៅថ្ងៃព្រហស្បតិ៍ទី ២២កក្កដានេះថា គ្មានហេតុការណ៍លេចធ្លាយ ឬគ្រោះថ្នាក់អ្វី បានកើតឡើងសោះនៅក្នុងស្ថាប័ន។
ផ្ទុយទៅវិញ អាជ្ញាធរចិនក៏ដូចជាប្រព័ន្ធឃោសនាព័ត៌មានចិនទាំងឡាយ តែងតែចង្អុលមុខ ចោទបកវិញថា មេរោគកូវីដ១៩ ទំនងជាបានធ្លាយចេញពីមន្ទីរពិសោធន៍អាមេរិក ឈ្មោះ Fort Detrick ដែលមានទីតាំងស្ថិតនៅជិតទីក្រុងវ៉ាស៊ីងតោន និងដែលកំពុងសិក្សាស្រាវជ្រាវប្រឆាំងនឹងភេរវកម្មជីវសាស្ត្រ។ បើតាមសារព័ត៌មាន បែបជាតិនិយមចិន Global Times មានពលរដ្ឋចិនប្រមាណ៥លាននាក់ បានចុះហត្ថលេខាលើញត្តិមួយទាមទារឱ្យបើកអង្កេតមន្ទីរពិសោធន៍Fort Detrickវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ