ចិន រងគ្រោះមហន្តរាយទឹកជំនន់ដ៏កំណាចបំផុត ទំនប់ទឹកធំមួយចាប់ប្រេះ
គ្រោះមហន្តរាយទឹកជំនន់ដ៏កំណាចបំផុត កំពុងគំរាមកំហែងប្រទេសចិន។ ខេត្តហឺណាន់ Henan ដែលស្ថិតនៅភាគកណ្តាលនៃប្រទេសកំពុងរងគ្រោះទឹកជំនន់ធ្ងន់ធ្ងរក្រៃលែង។ នេះបើតាមប្រសាសន៍របស់លោកប្រធានាធិបតីចិន ស៊ី ជិនពីង។ ក្នុងថ្ងៃអង្គារម្សិលមិញ ទឹកភ្លៀងបានធ្លាក់ដូចគេហែកមេឃ បង្កជាមហន្តរាយនិងភាពស្លន់ស្លោយ៉ាងខ្លាំង។ ក្នុងរយៈពេលតែបីថ្ងៃ កម្ពស់ទឹកធ្លាក់មានកំរិតស្មើនឹងភ្លៀងធ្លាក់មួយឆ្នាំ។ ស្ថិតក្នុងស្ថានភាពអាសន្ន ក្រុងចឹងចូវ Zhengzhou បានហៅទាហានជាច្រើនមកជួយ។ ម្យ៉ាងទៀត ទំនប់ទឹកដ៏ធំនិងសំខាន់របស់ខេត្តមានស្នាមប្រេះ អាចនឹងធ្លាយដាច់ នៅគ្រប់ពេល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ភ្នាក់ងារឧតុនិយម បានប្រកាសអាសន្នទឹកជំនន់កំរិតខ្ពស់បំផុត នៅខេត្តហឺណាន់ ដែល ទឹកភ្លៀងបានជន់លិចផ្លូវថ្នល់ ផ្លូវហាយវ៉េ ស្ថានីយ៍រថភ្លើង ចំការដំណាំរុក្ខជាតិស៊ីផ្លែ វាលស្រែវាលស្រូវ ស្ទើរគ្មានសល់។ ចរាចរណ៍ផ្លូវថ្នល់-ផ្លូវដែកជួបការរអាក់រអួលយ៉ាងខ្លាំង។ នៅថ្ងៃអង្គារទី ២០កក្កដា ប្រព័ន្ធរថភ្លើងក្រោមដី ត្រូវកាត់ផ្តាច់ដោយលំហូរទឹកភក់បុកចូលជន់លិចដល់ក្នុងរថភ្លើងដែលកំពុងធ្វើបើកបរ បង្កឱ្យអ្នកដំណើរភ័យស្លន់ស្លោ និងស្លាប់យ៉ាងហោច១២នាក់។ ក្នុងតែមួយប៉ប្រិចភ្នែកទឹកបានឡើងដល់ត្រឹមក ...
គ្មានទេសេវាទូរស័ព្ទ អគ្គីសនី នៅតាមផ្លូវ មានតែទឹកភក់ហូរនាំកង់ម៉ូតូ ឡាននិងវត្ថុជាច្រើនផ្សេងទៀត ដោយកម្លាំងទឹកកាលពីម្សិល។ មកទល់នឹងព្រឹកថ្ងៃពុធទី ២១កក្កដា ២០២១នេះ ទឹកភ្លៀងដ៏ធំកំណាចខ្លាំងមិនធ្លាប់មានគិតតាំងពី៦០ឆ្នាំមក នៅបន្តជន់លិចក្រុង។ ពលរដ្ឋជាង១សែននាក់ត្រូវជម្លៀសពីគេហដ្ឋាន និង៣៦០០០នាក់ ជាអ្នករងគ្រោះដោយផ្ទាល់ពីទឹកជំនន់។ នេះបើតាមតួលេខរបស់សាលាក្រុងចឹងចូវ។ ទឹកជំនន់នេះ បានថែមទាំងបង្កឱ្យមានការហូរបាក់ដី រលំផ្ទះ បាក់ជញ្ជាំងអាគារ នៅតំបន់ជិតខាងនិងស្លាប់មនុស្សបន្ថែម៤នាក់ផ្សេងទៀត។
បើតាមសារព័ត៌មានផ្លូវការ ប្រតិបត្តិការសង្គ្រោះក្រុងហឺណាន់ បានជំនួយបន្ថែមពីក្រុមអ្នកពន្លត់អគ្គីភ័យ ប្រមាណ១៨០០នាក់ មកពី៧ខេត្តជិតខាងផង និងទាហានទ័ពអាកាស នៃកងកម្លាំងសង្គ្រោះបន្ទាន់ ជាង១៣០នាក់ផង ព្រមទាំងកងកម្លាំងវិស្វកម្មទៀត។
រដ្ឋាភិបាលក៏បានបញ្ចេញទាហានយ៉ាងច្រើនមកដាក់ពង្រាយនៅតាមបណ្តោយខ្សែទឹកក្នុងតំបន់ ដើម្បីលើកទំនប់ ដោយប្រើបាវខ្សាច់ ជាពិសេសនៅតំបន់ជិតទំនប់ទឹក អៀហឺតាន Yihetan។ បើតាមសេចក្តីថ្លែងការណ៍របស់អគ្គមេបញ្ជាការតំបន់នៃកងទ័ពយោធាប្រជាជនចិន កាលពីថ្ងៃអង្គារ ទី២០កក្កដា ទំនប់ទឹកអៀហឺតាន ដែលនៅជិតក្រុងចាស់ លឿយ៉ាន Luoyangមានស្នាមប្រេះប្រវែង២០ម៉ែត្រ និងអាចដាច់ធ្លាយ បានគ្រប់ពេល។ កងទ័ពកំពុងព្យាយាមបង្វៀងមុខទឹក។
ចិនតែងរងគ្រោះទឹកជំនន់ជាញឹកញយនៅរដូវវស្សា ដោយពេលខ្លះគ្រោះមហន្តរាយនេះបានផ្តាច់ជីវិតមនុស្សអស់ជាច្រើន និងជាច្រើនពាន់នាក់ផងកាលពីឆ្នាំ១៩៩៨ នៅតំបន់ទំនាបទន្លេយ៉ង់សេ។ ចំណែកក្រុងហឺណាន់ និងក្រុងលឿយ៉ាន ដែលនៅជាប់ទន្លេលឿង ក៏ធ្លាប់មានប្រវត្តិរងគ្រោះទឹកជំនន់ស្លាប់មនុស្សច្រើនដែរ។ ហើយបើតាមអ្នកវិទ្យាសាស្ត្រ ជាមួយនឹងការប្រែប្រួលអាកាសធាតុ គ្រោះទឹកជំនន់នឹងកាន់តែកំណាចឡើងៗ នៅចិន ក៏ដូចជានៅលើពិភពលោកទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ