ចិនប្រកាសថាបានចាក់វ៉ាក់សាំងបង្ការកូវីដជូនប្រជាជនបានដល់ ១ពាន់លានដូស
អាជ្ញាធរសុខាភិបាលចិននៅថ្ងៃអាទិត្យ ២០ មិថុនា បានប្រកាសថាចាក់វ៉ាក់សាំងប្រឆាំងកូវីដជូនប្រជាជនបានរហូតដល់ទៅចំនួន ១ ពាន់លានដូស។ ១ពាន់លានដូសគឺស្មើនឹងប្រមាណ ៤០% នៃវ៉ាក់សាំងសរុបទាំងអស់ដែលត្រូវបានគេចាក់ជូនប្រជាជននៅទូទាំងពិភពលោក គិតរហូតមកទល់ពេលនេះ។
ចុះផ្សាយនៅថ្ងៃ៖
ស្តាប់ - ០២:៣៥
គិតត្រឹមថ្ងៃអាទិត្យទី ២០ មិថុនា ឆ្នាំ២០២១នេះ ចំនួនអ្នកស្លាប់ដោយសារកូវីដសរុបទាំងអស់នៅទូទាំងពិភពលោកកើនដល់ជាង ៣ លាន ៨សែននាក់ ហើយមានប្រទេសជាច្រើននៅបន្តរងគ្រោះ និងកំពុងប្រឹងប្រែងប្រយុទ្ធប្រឆាំងនឹងការឆ្លងរាតត្បាតកូវីដនៅឡើយ។ យ៉ាងណាក៏ដោយ យុទ្ធនាការចាក់វ៉ាក់សាំងនៅក្នុងប្រទេសមួយចំនួន បានឲ្យអនុញ្ញាតប្រទេសទាំងនោះអាចផ្តើមមានសកម្មភាពធម្មតាឡើងវិញជាបណ្តើរៗហើយ។
ចិនស្ថិតក្នុងចំណោមក្រុមប្រទេសដែលបានចាក់វ៉ាក់សាំងកូវីដជូនប្រជាជនក្នុងចំនួនដ៏ច្រើនគួរឲ្យកត់សម្គាល់។ កាលពីថ្ងៃអាទិត្យម្សិលមិញ អាជ្ញាធរសុខាភិបាលចិនថាបានចាក់ថ្នាំបង្ការប្រឆាំងនឹងកូវីដ១៩ ជូនប្រជាពលរដ្ឋបានដល់ ១ពាន់លានដូស។ សេចក្តីប្រកាសនេះធ្វើឡើងក្រោយ តួលេខនៃការចាក់ថ្នាំបង្ការកូវីដសកលបានកើនឡើងលើស ២,៥ ពាន់លានដូស និងនៅខណៈដែលចំនួនអ្នកស្លាប់ដោយសារជំងឺកូវីដនៅក្នុងប្រទេសប្រេស៊ីលកើនដល់កន្លះលាននាក់។
អាជ្ញាធរចិនបានកំណត់គោលដៅប្រកបដោយមហិច្ឆតាដោយចង់ចាក់វ៉ាក់សាំងពេញលេញជូនប្រជាជនឲ្យបាន ៤០ % នៃប្រជាជនចិនសរុបទាំងអស់ចំនួនប្រមាណ ១,៤ ពាន់លាននាក់នៅចុងខែមិថុនានេះ។
ជោគជ័យរបស់ចិនក្នុងយុទ្ធនាការចាក់វ៉ាក់សាំងប្រឆាំងនឹងជំងឺកូវីដ គឺផ្ទុយស្រឡះពីប្រទេសប្រេស៊ីលដែលកាលពីថ្ងៃសៅរ៍បានក្លាយជាប្រទេសទី ២ នៅលើពិភពលោក បន្ទាប់ពីសហរដ្ឋអាមេរិក ដែលមានអ្នកស្លាប់ដោយសារកូវីដកើនដល់លើស ៥សែននាក់។
កិច្ចខិតខំប្រឹងប្រែងចាក់វ៉ាក់សាំងរបស់ប្រទេសអាមេរិកខាងត្បូងមួយនេះ មានភាពយឺតយ៉ាវ ហើយមានប្រជាជនប្រេស៊ីលតែ ១១ % ប៉ុណ្ណោះដែលទទួលបានការចាក់ថ្នាំបង្ការកូវីដ១៩ ខណៈរលកចម្លងកូវីដទីបីកំពុងរីករាលដាលពាសពេញប្រទេស។
គួរគូសបញ្ជាក់ជូនថា ចំនួនអ្នកឆ្លងកូវីដសរុបទាំងអស់នៅក្នុងប្រទេសចិនមានចំនួនជាង ៩ម៉ឺន ១ពាន់ករណី។ ចិនបានកត់ត្រាករណីឆ្លងថ្មី ២៣ ករណីកាលពីថ្ងៃអាទិត្យម្សិលមិញ។ គួរជ្រាបដែរថា ប្រទេសចិនទំនងជាផលិតវ៉ាក់សាំងបង្ការជំងឺកូវីដបានច្រើនជាង ៣ ពាន់លានដូសនៅក្នុងឆ្នាំ ២០២១នេះ។ នេះបើយោងទៅតាមសេចក្តីរាយការណ៍របស់ទីភ្នាក់ងារសារព័ត៌មានស៊ីនហួកាលពីខែមេសា។ ក៏ប៉ុន្តែ អាជ្ញាធរចិនមិនបានបញ្ជាក់ប្រាប់នោះទេពីទិន្នន័យវ៉ាក់សាំងដែលនឹងត្រូវលក់ចេញទៅបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ