អង្គការកាកបាទក្រហមបារម្ភពីស្ថានភាពដុនដាប និងវិបត្តិមនុស្សធម៌នៅភូមា
នៅក្នុងប្រទេសភូមា ២ខែក្រោយរដ្ឋប្រហារទម្លាក់រដ្ឋាភិបាលរបស់លោកស្រីអ៊ុង សានស៊ូជី ចលនាបាតុកម្មប្រឆាំងនឹងរបបសឹកកំពុងបន្តមានសន្ទុះកាន់តែខ្លាំង។ ចំណែកការវាយបង្ក្រា្កបរបស់កម្លាំងប៉ូលិស និងទាហានលើក្រុមបាតុករក៏មិនចុះខ្សោយដែរ។ តួលេខរបស់សមាគមជំនួយអ្នកទោសនយោបាយបានឲ្យដឹងក្នុងថ្ងៃសុក្រ ទី២ មេសាថា មានមនុស្សស្លាប់ប្រមាណជា ៥៤៣នាក់ ក្នុងនោះមានកូនក្មេងជាង ៤០នាក់។ ចំណែកអង្គការ Save the Children បានបញ្ជាក់ពីចំនួនកូនក្មេង និងក្មេងជំទង់ស្លាប់បានកើនទ្វេដងក្នុងរយៈពេល ១២ថ្ងៃចុងក្រោយនេះ។ ដោយឡែក អង្គការសុខភាពពិភពលោកបានលើកឡើងពីការវាយប្រហារលើក្រុមបុគ្គលិករបស់អង្គការកាកបាទក្រហមក្នុងស្រុកចំនួន ៣០លើកដោយបណ្តាលឲ្យស្លាប់ ២នាក់ស្លាប់ និងរបួស ៦នាក់។ ទន្ទឹមគ្នានេះ ឡានពេទ្យ និងអាគាររបស់សហព័ន្ធអន្តរជាតិនៃកាកបាទក្រហម និងអឌ្ឍចន្ទក្រហមនៅក្នុង ១២រដ្ឋ និងតំបន់បានក្លាយជាផ្ទាំងស៊ីបនៃការវាយប្រហារ។ លោកអាឡិចសង់ដ័រ ម៉ាត់ធ្យូ នាយកសហព័ន្ធអន្តរជាតិនៃកាកបាទក្រហម និងអឌ្ឍចន្ទក្រហមប្រចាំតំបន់អាស៊ីប៉ាស៊ីហ្វិកបានម្តែងក្តីបារម្ភពីស្ថានភាពធ្ងន់ធ្ងរ និងវិបត្តិមនុស្សធម៌នាប៉ុន្មានសប្តាហ៍ខាងមុខ។
ចុះផ្សាយនៅថ្ងៃ៖
ស្តាប់ - ០១:៤០
« ស្ថានការណ៍នៅនឹងកន្លែងមានការលំបាកខ្លាំងណាស់។ នៅម្ខាង គេបានសង្កេតឃើញវត្តមានចលនាបាតុកម្មនៅតាមផ្លូវ ហើយនៅម្ខាងទៀត មានបញ្ហាជាច្រើនរាប់មិនអស់ដែលនឹងធ្វើឲ្យប្រជាជនកាន់តែងាយរងគ្រោះជាងមុននៅប៉ុន្មានសប្តាហ៍ខាងមុខ។ តម្លៃចំណីអាហារឡើងថ្លៃខ្ពស់ ការរកលុយជួបការលំបាក ប្រព័ន្ធសុខាភិបាលមានវិបត្តិ កង្វះវិធានការបង្ការពាក់ព័ន្ធនឹងជំងឺកូវីដ១៩ និងរដូវភ្លៀងធ្លាក់ដែលនឹងឈានមកដល់នាប៉ុន្មានសប្តាហ៍ខាងមុខ។ កត្តាទាំងអស់នេះនឹងបង្កការលំបាកធំធេងដល់ប្រជាជនភូមាដោយចៀសមិនរួច។
បន្ទាប់មក គេត្រូវបូកបន្ថែមនូវកត្តាផ្សេងទៀត គឺអំពើហិង្សា ចលនាបះបោរសង្គម និងស្ថានការណ៍នៅតាមតំបន់ជាប់ព្រំដែន។ សរុបមកគេអាចនិយាយបានថា ស្ថានការណ៍កំពុងស្ថិតក្នុងអស្ថិរភាពខ្ពស់ខ្លាំង។ ឥឡូវនេះ បើគេនិយាយពីអំពើហិង្សាប្រឆាំងនឹងក្រុមបុគ្គលិកមនុស្សធម៌វិញ គឺបានកើតឡើងចំនួន ៣២លើក។ គឺជាអំពើហិង្សាដោយការវាយប្រហារ ឬមួយដោយការបំភិតបំភ័យ។ យើងបានធ្វើការអំពាវនាវជាទូទៅកុំឲ្យមានការរារាំងដល់ការងាររបស់ក្រុមបុគ្គលិកស្ម័គ្រចិត្តរបស់កាកបាទក្រហមក្នុងការផ្តល់ជំនួយដល់ក្រុមមនុស្សដែលកំពុងត្រូវការជំនួយ។
ជាពិសេសនៅក្នុងបរិបទសព្វថ្ងៃ គឺជំនួយផ្នែកសុខភាពដែលជាតម្រូវការចាំបាច់បំផុត។ យើងចង់ឲ្យគ្រប់ភាគីទាំងអស់ទទួលស្គាល់ពីភាពមិនលំអៀងរបស់ក្រុមបុគ្គលិកកាកបាទក្រហម និងទុកឲ្យពួកគេអាចចូលទៅជួយប្រជាជនដែលកំពុងជួបការលំបាក »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ