ក្រុមប្រឹក្សាសិទ្ធិមនុស្សថ្កោលទោស « ការប្រើកម្លាំងជ្រុលហួសហេតុ » របស់កងទ័ពភូមាទៅលើបាតុករ
ក្រុមប្រឹក្សាសិទ្ធិមនុស្សនៃអង្គការសហប្រជាជាតិ បានបើកសម័យប្រជុំលើកទី៤៦ នៅទីក្រុងហ្សឺណែវ ដោយបានជជែកគ្នាអំពីសំណុំរឿងភូមា។ ក្រៅពីបានទាមទារឲ្យដោះលែងអ្នកទោសទាំងអស់ ក្រុមប្រឹក្សានេះ បានប្រកាសថ្កោលទោស ការប្រើកម្លាំងជ្រុលហួសហេតុ របស់កងទ័ពភូមា ដែលបានបង្ក្រាបចលនាបាតុកម្មរបស់ប្រជាជន បណ្តាលឲ្យស្លាប់មនុស្សជាច្រើនរយនាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ក្រុមប្រឹក្សាសិទ្ធិមនុស្សនៃអង្គការសហប្រជាជាតិ បានចេញសេចក្តីសម្រេចចិត្តរួម នៅថ្ងៃទី២៤មីនា ដោយបានប្រកាសថ្កោលទោសសាជាថ្មី នូវការធ្វើរដ្ឋប្រហារយោធា នៅប្រទេសភូមា។ ស្ថានប័នកំពូល បានទាមទារផងដែរ ឲ្យរបបសិកភូមា ត្រូវដោះលែងមនុស្សទាំងអស់ ដែលត្រូវបានចាប់ខ្លួន ក្រៅប្រព័ន្ធច្បាប់ មិនថា បាតុករ អ្នកនយោបាយ អ្នកកាសែត និងជនបរទេស ដែលមានពាក់ព័ន្ធនឹងការធ្វើបាតុកម្ម។
សេចក្តីសម្រេចចិត្តនេះ បានប្រកាសថ្កោលទោសផងដែរ នូវការប្រើកម្លាំងហួសហេតុ ការប្រើគ្រាប់កាំភ្លើងពិត បាញ់រះទៅលើក្រុមបាតុករដោយឥតរើសមុខ របស់កម្លាំងសមត្ថកិច្ចភូមា។ ក្រុមប្រឹក្សាសិទ្ធិមនុស្សទាមទារឲ្យរបបសិក ត្រូវតែគោរពសិទ្ធិសេរីភាពបញ្ចេញមតិរបស់ប្រជាជន។
សូមរំលឹកថា នេះគឺជាលើកទី២ហើយ ដែលក្រុមប្រឹក្សាសិទ្ធិមនុស្ស ចេញសេចក្តីថ្លែការណ៍ថ្កោលទោសរបបសិកភូមា។ កាលពីថ្ងៃទី១២កុម្ភៈ ស្ថាប័នកំពូលនេះ បានបើកសម័យប្រជុំវិសាមញ្ញ និងបានចេញសេចក្តីថ្លែការណ៍អំពានាវ ឲ្យរបបសិកភូមា ត្រូវដកចេញនូវច្បាប់អាជ្ញាសិក ព្រមទាំងត្រូវដោះលែងអ្នកទោសនយោបាយទាំងអស់។
យ៉ាងណាក៏ដោយ របបសិកភូមានៅតែធ្វើមិនដឹងមិនឮ។ គិតមកត្រឹមពេលនេះ មានបាតុករស្លាប់ ចំនួនជាង២៦០នាក់។ ជាងនេះទៀត ប៉ុន្មានថ្ងៃមុននេះ របបសិកភូមាបានប្រកាសថា នឹងបង្ក្រាបអំពើអាណាធិបតេយ្យឲ្យរាបដូចកន្ទេល។ ក៏ប៉ុន្តែកាលពីថ្ងៃពុធទី២៤មីនា របបសិក បានដោះលែងអ្នកទោសចំនួនប្រមាណ៦០០នាក់ ដែលក្នុងនោះមានអ្នកកាសែត របស់បណ្តាញព័ត៌មានអាមេរិក Associated Press ម្នាក់ផងដែរ។
ក្រៅពីប្រកាសថ្កោលទោសទាំងនេះ ក្រុមប្រឹក្សាសិទ្ធិមនុស្ស បានហៅឲ្យរបបសិកភូមា បើកទ្វារអនុញ្ញាត ឲ្យអ្នកជំនាញអន្តរជាតិចូលទៅភូមា ដោយគ្មានការកៀបសង្កត់ និងឃ្លាំមើល ដើម្បីបើកការស៊ើបអង្កេតឲ្យបានច្បាស់ អំពីស្ថានការណ៍ពិតជាក់ស្តែង។ ក្រុមប្រឹក្សាសិទ្ធិមនុស្ស ក៏បានលើកឡើងផងដែរ អំពីបញ្ហារំលោភសិទ្ធិមនុស្សធ្ងន់ធ្ងរផ្សេងទៀត ដែលអាជ្ញាធរភូមា បានធ្វើទៅលើជនជាតិភាគតិច ជាក់ស្តែងជនជាតិរ៉ូហ៊ីងយ៉ា។ ច្បាប់ភូមាមិនអនុញ្ញាតឲ្យ ជនជាតិរ៉ូហ៊ីងយ៉ាទទួលសញ្ជាតិជាប្រជាជនភូមាស្របច្បាប់ទេ ដែលប្រការនេះធ្វើឲ្យពួកគេ រស់នៅក្រៅច្បាប់ គ្មានសិទ្ធិចូលរួមក្នុងជីវភាពសង្គម និងនយោបាយរបស់ភូមាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ