សំណុំរឿងអ៊ុយហ្គួរ៖ ចិនវាយបកទៅសហភាពអឺរ៉ុបដោយការដាក់ទណ្ឌកម្មលើមន្ត្រីអឺរ៉ុប
ប្រទេសចិនបានប្រកាសនៅថ្ងៃចន្ទ ២២ មីនា ២០២១ ដាក់ទណ្ឌកម្មលើជនជាតិអឺរ៉ុបចំនួន ១០នាក់ រួមមានអ្នកនយោបាយ អ្នកជំនាញស្រាវជ្រាវ និងអង្គភាពចំនួន ៤ផ្សេងទៀត។ ចំណាត់ការរបស់ក្រុងប៉េកាំងនេះធ្លាក់មកភ្លាមមួយរំពេច ដើម្បីសងសឹកចំពោះការដាក់ទណ្ឌកម្មពីសំណាក់ក្រុងព្រុចសែល ប្រឆាំងនឹងមន្រ្តីចិនជុំវិញការរំលោភសិទ្ធិមនុស្សនៅក្នុងតំបន់ស៊ីនជាំង។
ចុះផ្សាយនៅថ្ងៃ៖
ស្តាប់ - ០២:០៣
ប្រទេសចិនបានប្រកាសដាក់ទណ្ឌកម្មលើជនជាតិអឺរ៉ុបទាំងអស់ ១០ រូបពីបទថាបាន “ជ្រៀតជ្រែកយ៉ាងខ្លាំង” ទៅក្នុងកិច្ចការផ្ទៃក្នុងរបស់ខ្លួន និងចំពោះ “ការរំលោភបំពានច្បាប់អន្តរជាតិ”។
នៅក្នុងបញ្ជីឈ្មោះបុគ្គលដែលត្រូវទទួលរងទណ្ឌកម្ម រួមមានសមាជិកសភាអឺរ៉ុប ៥រូប សមាជិកគណៈកម្មាធិការសិទ្ធិមនុស្សនិងសន្តិសុខរបស់សហភាពអឺរ៉ុប ព្រមទាំងអ្នកស្រាវជ្រាវអាល្លឺម៉ង់ម្នាក់ផង។
យោងតាមសេចក្តីថ្លែងការណ៍មួយរបស់ក្រសួងការបរទេសចិន រដ្ឋាភិបាលក្រុងប៉េកាំងប្រឆាំងដាច់ខាតនិងថ្កោលទោសជាខ្លាំង ចំពោះការដាក់ទណ្ឌកម្មរបស់សហភាពអឺរ៉ុប ប្រឆាំងនឹងមន្ត្រីខ្លួន ក្រោមការចោទប្រកាន់ថាបានរំលោភសិទ្ធិមនុស្សទៅលើជនជាតិអ៊ុយហ្គួរនៅឯតំបន់ស្វយ័តស៊ីនជាំង។
សម្រាប់ចិន ពាក្យចោទប្រកាន់របស់សហភាពអឺរ៉ុប គឺជាការផ្សព្វផ្សាយភូតកុហកនិងធ្វើឲ្យប៉ះពាល់ដល់អធិបតេយ្យភាពរបស់ចិនធ្ងន់ធ្ងរណាស់។ ចិនបានព្រមានថា ប្រសិនបើសហភាពអឺរ៉ុប មិនកែប្រែកំហុសរបស់ខ្លួនទេនោះ ចិននឹងមានវិធានការបន្ថែមទៀតប្រឆាំងទល់នឹងអឺរ៉ុប។
គួរជ្រាបថា ចំណាត់ការរបស់រដ្ឋាភិបាលចិនបានធ្លាក់មកភ្លាមមួយរំពេច នៅថ្ងៃតែមួយ បន្ទាប់ពីសហភាពអឺរ៉ុប បានសម្រេចដាក់ទណ្ឌកម្មចិនពាក់ព័ន្ធការរំលោភសិទ្ធិមនុស្ស។ កាលពីថ្ងៃចន្ទម្សិលមិញ សហភាពអឺរ៉ុបបានសម្រេចដាក់ទណ្ឌកម្មប្រឆាំងនឹងមន្រ្តីចិនបួនរូបជុំវិញការបង្ក្រាបលើជនជាតិអ៊ុយហ្គួរ។
ទន្ទឹមគ្នានេះ តាមរយៈកិច្ចប្រជុំនៅក្នុងទីក្រុងព្រុចសែល រដ្ឋមន្ត្រីការបរទេសអឺរ៉ុប ក៏បានផ្តោតការយកចិត្តទុកដាក់ផងដែរ អំពីការដាក់ទណ្ឌកម្មទៅលើរបបសឹកភូមា ដែលបានទម្លាក់រដ្ឋាភិបាលស៊ីវិលតាមរយៈរដ្ឋប្រហារ និងបានបង្ក្រាបយ៉ាងហិង្សាលើក្រុមបាតុករ។
សហភាពអឺរ៉ុប បានសម្រេចបង្កកទ្រព្យសម្បត្តិ និងបញ្ចូលឈ្មោះមន្ត្រីគ្រាក់ៗភូមាជាច្រើននាក់ ទៅក្នុងបញ្ជីខ្មៅហាមឃាត់ទិដ្ឋាការ។ ពួកគេទាំងនោះរួមមានលោកឧត្តមសេនីយ៍មីន អ៊ុងឡាំង មន្រ្តីយោធាជាន់ខ្ពស់ ៩ នាក់ផ្សេងទៀត និងចុងក្រោយគេគឺប្រធានគណៈកម្មាធិការរៀបចំការបោះឆ្នោតភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ