ភូមា៖ បាតុកម្មនៅតែបន្តទូទាំងប្រទេស ខណៈអាជ្ញាធរចេញច្បាប់អាជ្ញាសិកនៅក្រុងរ៉ង់ហ្គូន
កាលពីយប់ថ្ងៃអាទិត្យ ប្រជាជនភូមាជាច្រើនពាន់នាក់ បានជួបជុំគ្នានៅតាមទីក្រុងធំៗ ដើម្បីរំលឹកវិញ្ញាណក្ខន្ធ ដល់បាតុករដែលស្លាប់ ដោយការបង្រ្កាបយ៉ាងហិង្សាបំផុត របស់កងទ័ព។ ក្នុងចំណោម គេឃើញមានក្រុមគ្រូពេទ្យជាច្រើននាក់ ក្នុងឯកសណ្ឋានពេទ្យពណ៌ស ដែលបានចូលរួមដង្ហែរក្បួន ដើម្បីបរិហារ ចំពោះការប្រើកម្លាំងហួសប្រមាណ ពីសំណាក់សមត្ថកិច្ច មកលើបាតុករស្លូតត្រង់។ គិតមកត្រឹមពេលនេះ មានមនុស្សប្រមាណ២៥០នាក់ហើយ ដែលបានស្លាប់។
ចុះផ្សាយនៅថ្ងៃ៖
ស្តាប់ - ០២:៣៧
នៅរដ្ឋកាឈីន ភាគខាងជើងបង្អស់ភូមា ប្រជាជនជាច្រើនពាន់នាក់ បានមកជួបជុំគ្នា ក្នុងវេលាយប់ថ្ងៃសៅរ៍ឈានចូលថ្ងៃអាទិត្យ ដើម្បីអុជទៀន រំលឹកវិញ្ញាណក្ខន្ធ ដល់អ្នកស្លាប់ ដោយការបង្ក្រាបរបស់សមត្ថកិច្ច។ នៅទីក្រុងម៉ាន់ដាឡេ ភាគកណ្តាលប្រទេស ដែលជាទីក្រុងធំទី២វិញ ប្រជាជនបានបន្តជួបជុំគ្នា សឹងតែដល់ទល់ភ្លឺ ដោយមានការចូលរួម ពីក្រុមគ្រូបង្រៀន គ្រូពេទ្យ បុគ្គលិកធនាគារ និងបុគ្គលិកសេវាដឹកជញ្ជូនផ្លូវដែកជាដើម។
« សង្គ្រោះថ្នាក់ដឹកនាំរបស់យើង » « សង្គ្រោះអនាគតយើង » ទាំងនេះគឺជាឃ្លា ដែលមានសរសេរនៅលើផ្ទាំងបដាក្រណាត់របស់ប្រជាជនភូមា អមទៅដោយពន្លឺភ្លើងទៀនក្រហមច្រាល។ ស្ត្រីម្នាក់ជា គ្រូពេទ្យបានថ្លែងប្រាប់អ្នកយកព័ត៌មានបារាំងថា ក្រុមគ្រូពេទ្យទាំងអស់ មានសេចក្តីក្លាហាន មិនខ្លាចឈាមប្រជាជន ដែលពួកយោធាបានបង្ហូរនោះទេ។
សូមបញ្ជាក់ថាគិត ចាប់ពីថ្ងៃទី១កុម្ភៈមក គឺមានបាតុករភូមា ប្រមាណ២៥០នាក់ហើយ ដែលបានស្លាប់ ដោយគ្រាប់កាំភ្លើងរបស់សមត្ថកិច្ច។ នេះបើផ្អែកតាមតួលេខរបស់សមាគមជួយអ្នកទោសនយោបាយនៅភូមា (AAPP)។ ប្រភពដដែលនេះ អះអាងថា តួលេខអ្នកស្លាប់អាចមានច្រើនជាងនេះ ដោយសារតែប៉ុន្មានថ្ងៃចុងក្រោយនេះ កងទ័ពភូមាបានចាប់ខ្លួនមនុស្សច្រើននាក់ណាស់ ហើយមួយចំនួនធំ បានបាត់ដំណឹងឈឹងសូន្យ។
ដោយឡែក នៅទីក្រុងរ៉ង់ហ្គូនវិញ អាជ្ញាធរបានចេញច្បាប់អាជ្ញាសិក ធ្វើឲ្យប្រជាជនមានការភ័យបារម្ភជាខ្លាំង។ សង្កាត់មួយចំនួនធំ បានក្លាយទៅជាសមរភូមិប្រយុទ្ធយ៉ាងអាណាធិបតេយ្យ រវាងក្រុមបាតុករ និងសមត្ថកិច្ច ដែលបាញ់រះមិនញញើតដៃ។ ប្រជាជននៅក្រុងរ៉ង់ហ្គូន បានអះអាងថា ពួកគេបានរងនូវការគំរាមកំហែង សម្លុតបំភ័យ ពីសំណាក់អាជ្ញាធរ ប្រៀបបីដូចជាជនឧទ្ទាមក្នុងសង្រ្គាមស៊ីវីល ទាំងដែលពួកគេគ្មានអាវុធសោះ។ នៅតាមស្ថាននីយ៍រថភ្លើង គេសង្កេតឃើញ ប្រជាជនភូមាជាច្រើននាក់កកកុញ ធ្វើដំណើរចាកចេញពីក្រុងរ៉ង់ហ្គូន ដោយសារតែពួកគេមិនចង់បន្តរស់នៅក្នុងភាពភ័យខ្លាច។ ដូចគ្នាដែរ អាជ្ញាធរថៃ និងឥណ្ឌា បានលើកឡើងថា គេសង្កេតឃើញប្រជាជនភូមាបានភៀសខ្លួនចូលមកក្នុងទឹកដីគេកាន់តែច្រើន។
សូមបញ្ជាក់ថា ទោះជាមានការថ្កោលទោស និងទណ្ឌកម្មពីសំណាក់ប្រទេសលោកខាងលិចក៏ដោយ តែកងទ័ពភូមានៅតែធ្វើមិនដឹងមិនឮ។ មនុស្សប្រមាណ២៣០០នាក់ ត្រូវបានចាប់ខ្លួន។ មន្ត្រីគណបក្សសម្ព័ន្ធជាតិដើម្បីលទ្ធិប្រជាធិបតេយ្យ ប្រឈមនឹងទោសក្បត់ជាតិ ដែលអាចជាប់ពន្ធនាគារ២២ឆ្នាំ។ ចំណែកលោកស្រីអ៊ុងសាន ស៊ូជីវិញ ត្រូវតុលាការរបស់របបសិក ចោទពីបទប្រព្រឹត្តិអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ