ប៉េកាំងប្តេជ្ញាមិនធ្វើសម្បទាន ក្នុងរឿងធ្វើកំណែទម្រង់ប្រព័ន្ធបោះឆ្នោតនៅហុងកុង
ឆ្លើយតបនឹងប្រទេសលោកខាងលិច ដែលបានបរិហាររិះគន់ ចំណាត់ការរបស់ប៉េកាំង ដើម្បី កែប្រែប្រព័ន្ធបោះឆ្នោត ហុងកុង អ្នកតំណាងទីក្រុងប៉េកាំងបានចេញមុខធ្វើសន្និសីទនៅថ្ងៃសុក្រនេះ ដើម្បី អះអាងការពារថា សេចក្តីព្រាងច្បាប់ធ្វើកំណែទម្រង់ប្រព័ន្ធបោះឆ្នោត ជាចំណាត់ការទី២ បន្ទាប់ពីច្បាប់សន្តិសុខជាតិហុងកុង ដើម្បី បិទបញ្ចប់ចលាចល និងភាពអនាធិបតេយ្យ នៅទីក្រុងហុងកុង។
ចុះផ្សាយនៅថ្ងៃ៖
ស្តាប់ - ០២:២០
នៅថ្ងៃព្រហស្បតិ៍ អង់គ្លេស សហភាពអឺរ៉ុប និងសហរដ្ឋអាមេរិក បានប្រតិកម្មរិះគន់ៗ ជាបន្តបន្ទាប់ នៅក្រោយ សភាចិនបោះឆ្នោតយល់ព្រម ឲ្យគេធ្វើកំណែទម្រង់ប្រព័ន្ធបោះឆ្នោត នៅហុងកុង។
សហភាពអឺរ៉ុប បានបរិហារចំណាត់ការរបស់ទីក្រុងប៉េកាំង ថា ជាការរំលោភមួយថ្មីទៀត ទៅលើគោលការណ៍ប្រទេសមួយ ប្រព័ន្ធពីរ។ ចំណែករដ្ឋមន្រ្តីការបរទេសអាមេរិក លោកអង់តូនី ប្លីងកិន បានវាយតម្លៃថា ចិនកំពុងរំលោភការសន្យា របស់ខ្លួន ជាមួយប្រជាជនហុងកុង ដែលមានចែងនៅក្នុងកិច្ចព្រមព្រៀង ចិនអង់គ្លេស និងដែលបានធ្វើឡើងនៅមុនពេលអង់គ្លេសប្រគល់ហុងកុងទៅ ឲ្យចិនកាន់កាប់វិញ នៅ ឆ្នាំ ១៩៩៧។
នៅក្រោយ សភាចិន អនុម័តសេចក្តីព្រាងច្បាប់ស្តីពីកំណែទម្រង់ប្រព័ន្ធបោះឆ្នោត ហុងកុង ទាំងសហភាពអឺរ៉ុប និងអាមេរិកបានប្រកាសថា ខ្លួននឹងចាត់វិធានការម៉ឺងម៉ាត់ ជាមួយចិន ប៉ុន្តែ អ្នកតំណាងជាន់ខ្ពស់ របស់ចិន បានចេញមុខមកបញ្ជាក់ថា ចិននឹងមិនធ្វើសម្បទាន អ្វីទាំងអស់ នៅក្នុងរឿងធ្វើកំណែទម្រង់ប្រព័ន្ធបោះឆ្នោត នៅហុងកុង និងថា ប៉េកាំងនឹងមិនធ្វើសម្បទាន នៅចំពោះមុខកម្លាំងបរទេស ដែលចង់បង្ករអស្ថិរភាព នៅហុងកុង។
នៅក្នុងសន្នីសិទកាសែត នៅថ្ងៃសុក្រនេះ លោក Zhang Xiaoming អ្នកទទួលខុសត្រូវជាន់ខ្ពស់នៃការិយាល័យ កិច្ចការហុងកុង និងម៉ាកាវ របស់រដ្ឋាភិបាលចិន បានចាត់ទុក ផែនការធ្វើកំណែទម្រង់ប្រព័ន្ធបោះឆ្នោត ហុងកុង ថា ជាការវាយ ដាល់ មួយដៃទៀត នៅបន្ទាប់ពីច្បាប់សន្តិសុខជាតិហុងកុងបានទៅ បិទបញ្ចប់ ចលាចល នៅ ទីក្រុងហុងកុង កាលពី ឆ្នាំមុន។
បន្ថែមពីលើច្បាប់សន្តិសុខជាតិ ដែលបានបើកផ្លូវឲ្យប៉ូលិសហុងកុង ចាប់ឃុំខ្លួន សកម្មជន និងអ្នកនយោបាយដើម្បី លទ្ធិប្រជាធិបតេយ្យ ហុងកុង ជាច្រើនរូប កំណែទម្រង់ ប្រព័ន្ធបោះឆ្នោតហុងកុង មានគោលដៅ បន្ថែមអំណាចទៅឲ្យគណៈកម្មការបោះឆ្នោតហុងកុង ដើម្បីមានសិទ្ធិជ្រើសរើស រាល់បេក្ខជនតំណាងរាស្ត្រ សម្រាប់ការបោះឆ្នោតសភាហុងកុង។
ទៅតាមសេចក្តីព្រាងកំណែទម្រង់ ដែលសភា ចិនបានបោះឆ្នោតអនុម័តនៅថ្ងៃព្រហស្បតិ៍ គណៈកម្មការបោះឆ្នោត នឹងពង្រីកចំនួនសមាជិករបស់ខ្លួន ពី ១២០០នាក់ទៅ ១៥០០នាក់។ វិធានការនេះ នឹងទៅកាត់បន្ថយ ចំនួនសមាជិកសភា ហុងកុង ដែលកើតចេញមកពីការបោះឆ្នោតដោយផ្ទាល់ របស់ប្រជាជនហុងកុង។ ជារួម គណៈកម្មការ បោះឆ្នោត ហុងកុង ដែលស្ថិតក្រោមឥទ្ធិពលរបស់ទីក្រុងប៉េកាំង ជាអ្នកជ្រើសរើស មេដឹកនាំហុងកុង និងសមាជិកសភាហុងកុងដែលស្មោះស្ម័គ្រនឹងបក្សកុម្មុយនិស្តចិន។
អ្នកនយោបាយ មកពីគណបក្សដើម្បីប្រជាធិបតេយ្យហុងកុង ធ្លាប់បានបរិហាររួចហើយថា កំណែទម្រង់ប្រព័ន្ធបោះឆ្នោត គឺជាការសម្លាប់លទ្ធិប្រជាធិបតេយ្យនៅហុងកុង ព្រោះថា វានឹងផាត់ចោល រាល់អ្នកប្រជាធិបតេយ្យ ហុងកុង ដែលគ្មាននិន្នាការ គាំទ្រនយោបាយរបស់ប៉េកាំង ចេញពីក្នុងស្ថាប័នដឹកនាំនៅហុងកុង៕
À la suite du vote de jeudi, le comité permanent de l'ANP devrait être chargé de rédiger un projet de loi qui sera officiellement approuvé par le Parlement chinois avant d'être imposé à Hong Kong.
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ