ឯកអគ្គរដ្ឋទូតភូមាប្រចាំអ.ស.ប.បរិហារមេដឹកនាំយោធា នៅលើវេទិកាអង្គការសហប្រជាជាតិ
នៅថ្ងៃសុក្រទី ២៦កុម្ភៈ២០២១ នៅចំពោះមុខអង្គមហាសន្និបាតអង្គការប្រជាជាតិ ឯកអគ្គរដ្ឋទូតភូមាប្រចាំអង្គការសហប្រជាជាតិលោក Kyaw Moe Tun បានបរិហាររដ្ឋប្រហាររបស់មេដឹកនាំសឹកភូមា និងបានអំពាវនាវឱ្យសហគមន៍អន្តរជាតិបញ្ចេញសកម្មភាពឱ្យបានខ្លាំងក្លា ជួយពលរដ្ឋភូមា។ លោកឯកអគ្គរដ្ឋទូតបានបិទបញ្ចប់សុន្ទរកថា ដោយលើកម្រាមដៃបីឡើងលើ ជានិម្មិត្តរូបនៃការគាំទ្រចលនាប្រឆាំងនៅក្នុងប្រទេសផង។
ចុះផ្សាយនៅថ្ងៃ៖
ស្តាប់ - ០២:១៣
ក្នុងសុន្ទរកថា១២នាទី លោក Kyaw Moe Tun ឯកអគ្គរដ្ឋទូតភូមាប្រចាំអង្គការសប្រជាជាតិមិនត្រឹមតែបរិហាររដ្ឋប្រហារនិងទង្វើបង្ក្រាបបាតុករស៊ីវិល ព្រមទាំងទង្វើឧក្រិដ្ឋលើជនជាតិភាគតិចរបស់ពួកយោធាទេ តែថែមទាំងបានជំរុញឱ្យសហគមន៍អន្តរជាតិជួយធ្វើយ៉ាងណាបិទបញ្ចប់អំណាចសឹកនៅភូមាឱ្យបានឆាប់រហ័សផង និង ប្រគល់អំណាចមកឱ្យប្រជាពលរដ្ឋភូមាវិញផង។ ជាមួយនឹងពាក្យប្តេជ្ញានាំភូមាឱ្យមានរដ្ឋាភិបាលស៊ីវិល បង្កើតឡើងដោយពលរដ្ឋនិងដើម្បីពលរដ្ឋ លោកឯកអគ្គរដ្ឋទូត បានសំណូមពរឱ្យអង្គការសហប្រជាជាតិកុំទទួលស្គាល់របបដឹកនាំដែលកើតចេញពីរដ្ឋប្រហារថ្ងៃទី ១កុម្ភៈ ២០២១ និងកុំសហការរដ្ឋាភិបាលសឹកនេះ។ អន្តរាគមន៍របស់លោក Kyaw Moe Tun បានទទួលការស្វាគមន៍ទះដៃអបអរយ៉ាងកងរំពង ក្នុងសាលប្រជុំ ព្រមទាំងការលើកសរសើរពីសំណាក់សហរដ្ឋអាមេរិក សហភាពអឺរ៉ុប អង្គការកិច្ចសហប្រតិបត្តិការអ៊ីស្លាម ថាជាសុន្ទរកថាដ៏ក្លាហាន និងច្បាស់លាស់។
សំឡេងប្រឆាំងនឹងអាជ្ញាធរឯង ចេញពីបបូរមាត់ឯកអគ្គរដ្ឋទូត នៅអង្គការសហប្រជាជាតិ ជាការដ៏កម្របំផុត។ ករណីនេះធ្លាប់កើតមានជាលើកចុងក្រោយបង្អស់កាលពីឆ្នាំ២០១១ ដោយឯកអគ្គរដ្ឋទូតលីប៊ីស្រែកប្រឆាំងនឹងរបបផ្តាច់ការកាដាហ្វី ពេលកំពុងមានការប៉ះបោរប្រជាជនយ៉ាងខ្លាំងនៅលីប៊ី។
មុនសុន្ទរកថារបស់ឯកអគ្គរដ្ឋទូតភូមា លោកស្រីChristine Schraner Burgener ប្រេសិតពិសេសរបស់អង្គការសហប្រជាជាតិទទួលបន្ទុកកិច្ចការភូមា ក៏បានថ្កោលទោសទង្វើបង្ក្រាបរបស់ក្រុមយោធាភូមាដែរ។ តំណាងអង្គការសហប្រជាជាតិចង់ចុះទៅត្រួតពិនិត្យស្ថានការណ៍ដោយផ្ទាល់ក្នុងដឹកដីភូមា ជាមួយនឹងលក្ខខណ្ឌសុំជួបលោកស្រីអ៊ុងសានស៊ូជី ប៉ុន្តែត្រូវបានរដ្ឋាភិបាលសឹកបដិសេធ។
ដូចទម្លាប់ ចិនតាមរយៈឯកអគ្គរដ្ឋទូតប្រចាំអង្គការសហប្រជាជាតិ ចាត់ទុកស្ថានភាពភូមាជាកិច្ចការផ្ទៃក្នុង និងស្នើសុំឱ្យគ្រប់ភាគីកុំលូកដៃ ដែលអាចញុះញង់ឱ្យមានភាពតានតឹង និងកាន់តែធ្ងន់ធ្ងរ ក្លាយជាអំពើហិង្សាបង្ហូរឈាម។
សូមបញ្ជាក់ថា ក្នុងពេលដែលអង្គការសហប្រជាជាតិកំពុងបើកមហាសន្និបាតពិសេស ដែលស្នើរៀបចំឡើងដោយសហរដ្ឋអាមេរិកនិងសហភាពអឺរ៉ុប ស្តីពីវិបត្តិភូមា និងដែលចូលរួមដោយតំណាងការទូតចំនួន១៩៣ប្រទេស ចលនាបាតុកម្មនៅភូមាកាន់រីកធំឡើងៗ។ មានក្រុមជនជាតិភាគតិច កាន់តែច្រើនឡើងៗ បានមកចូលរួមធ្វើបាតុកម្មដែរ។ ចំណែកប៉ូលិសវិញ បានបាញ់កាំភ្លើងគ្រាប់ជ័រដើម្បីបំបែកហ្វូងបាតុករ។ នេះបើតាមភ្នាក់ងារសារព័ត៌មានបារាំង AFP ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ