ទោះមានវិបត្តិជំងឺកូវីដ១៩ ការចំណាយលើកងទ័ពក្នុងពិភពលោក នៅតែខ្ពស់កប់ពពក
ការចំណាយលើវិស័យយោធា នៅទូទាំងពិភពលោក សម្រាប់ឆ្នាំ ២០២០ នៅតែមានកម្រិតខ្ពស់ នោះបើទោះបីជាពិភពលោកជួបរងគ្រោះដោយសារវិបត្តិជំងឺកូវីដ១៩។ តាមរបាយការណ៍ប្រចាំឆ្នាំរបស់វិទ្យាស្ថានអង់គ្លេស IISS ដែលចេញផ្សាយនៅថ្ងៃព្រហស្បតិ៍ម្សិលមិញ ការពង្រឹងសមត្ថភាព កងទ័ពជើងទឹករបស់ចិន ជាចំណែកសំខាន់មួយធ្វើឲ្យការចំណាយលើកងទ័ព ក្នុងពិភពលោក នៅតែកើនឡើងខ្ពស់ នៅឆ្នាំ ២០២០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
សេដ្ឋកិច្ចដើរថយក្រោយ ដោយសារវិបត្តិជំងឺកូវីដ មិនបានធ្វើឲ្យការចំណាយទៅលើវិស័យកងទ័ព នៅទូទាំងពិភពលោក នៅ ឆ្នាំ ២០២០ ធ្លាក់ថមថយចុះនោះទេ។ បន្ទាប់ពីកើនឡើង គួរឲ្យកត់សំគាល់ប្រមាណ ៤% នៅ ឆ្នាំ ២០១៩ ការចំណាយលើវិស័យយោធា នៅក្នុងពិភពលោក បានកើនឡើង ជិត ៤%បន្ថែមទៀត នៅឆ្នាំ ២០២០។ នេះបើតាមរបាយការណ៍របស់វិទ្យាស្ថានអន្តរជាតិដើម្បីសិក្សាយុទ្ធសាស្រ្ត ហៅកាត់ជាភាសាអង់គ្លេសIISS។
តាមរបាយការណ៍របស់វិទ្យាស្ថានអង់គ្លេស ការចំណាយលើវិស័យកងទ័ព នៅក្នុងពិភពលោក កើនឡើង ដល់១៨៣០ ពាន់លានដុល្លារ បើទោះបីជាពិភពលោកជួបវិបត្តិកូវីដ និង វិបត្តិសេដ្ឋកិច្ចសកល ក្តី។ ជិត ២ភាគបី នៃខ្ទង់ចំណាយលើវិស័យកងទ័ពក្នុងពិភពលោក ជាចំណែករបស់អាមេរិក និងចិនរួមគ្នា ដោយអាមេរិកបានចំណាយ ប្រមាណ ៧៣៨ពាន់លានដុល្លារ និងចិន ដែលជាប់ចំណាត់លេខ២ បានចំណាយថវិកាជាង ១៩៣ពាន់លានដុល្លារ ដែលស្មើនឹង១០ភាគរយ នៃការចំណាយសរុបក្នុងពិភពលោក។ គេអាចនិយាយបានថា ចិន ជាចលកររុញច្រានឲ្យការចំណាយរបស់អាស៊ីទៅលើវិស័យកងទ័ព កើនឡើងខ្ពស់ ឬ ស្មើនឹង២៥ភាគរយ នៃការចំណាយសរុបក្នុងពិភពលោក។
របាយការណ៍របស់វិទ្យាស្ថានអន្តរជាតិដើម្បីសិក្សាយុទ្ធសាស្រ្ត បានសង្កត់ធ្ងន់ទៅលើការពង្រឹងវិស័យយោធារបស់ ចិន ជាពិសេសខាងផ្នែកកងទ័ពជើងទឹក។ តាមរបាយការណ៍របស់វិទ្យាស្ថានអង់គ្លេស បើទោះជាមានសេដ្ឋកិច្ចធ្លាក់ចុះខ្សោយបន្តិច ដោយសារវិបត្តិកូវីដ ចិននៅតែរក្សាខ្ទង់ចំណាយ របស់ខ្លួន សម្រាប់ពង្រឹងសមត្ថភាពកងទ័ពជើងទឹករបស់ខ្លួនដូចជា បង្កើនចំនួន កប៉ាល់ចម្បាំង នាវាមុជទឹកទំនើបៗ ដើម្បីអាចប្រជែង ដណ្តើមគ្រប់គ្រងតំបន់សមុទ្រចិនខាងត្បូង។ ជម្លោះនៅសមុទ្រចិនខាងត្បូង ដែលទាក់ទាញឲ្យអាមេរិកបញ្ជូនកប៉ាល់ចម្បាំងទៅហោះឆ្វែលក្រោមហេតុផលការពារសម្ព័ន្ធមិត្តរបស់អាមេរិក ដែលជាភាគីជម្លោះជាមួយចិន ជាហេតុផលសំខាន់មួយ ដែលធ្វើឲ្យទាំងអាមេរិក និងចិន នៅតែបន្តបង្កើនការចំណាយលើវិស័យកងទ័ពរបស់ខ្លួន។
នៅអឺរ៉ុប ថ្វីត្បិត សេដ្ឋកិច្ចដើរថយក្រោយខ្លាំង និងប្រឈមនឹងការកើនឡើងនៃប្រាក់បំណុល ដោយសារតែវិបត្តិកូវីដ គ្មានប្រទេសណាមួយ បង្ហាញចេតនាកាត់បន្ថយការចំណាយលើយោធានោះទេ។ ប្រឈមនឹងការគំរាមកំហែងរបស់រុស្ស៊ី នៅក្រោយ រុស្ស៊ីកាត់យកទឹកដីគ្រីមេរបស់ប្រទេសអ៊ុយក្រែន នៅឆ្នាំ ២០១៤ ប្រទេសអឺរ៉ុប ដែលជាសមាជិកអូតង់ នៅបន្ត បង្កើនខ្ទង់ចំណាយយោធាប្រមាណ ២%នៅ ឆ្នាំ ២០២០។
របាយការណ៍របស់វិទ្យាស្ថាន IISSវាយតម្លៃថា ប្រទេសជាច្រើនបានសម្រួលរៀបចំ កញ្ចប់ថវិកាយោធារបស់ខ្លួនឡើងវិញ ដើម្បីអាចបង្វែរយកថវិកាមួយចំនួន ទៅជួយវិបត្តិសុខភាព ឬដើម្បី គាំទ្រ ជំរុញសេដ្ឋកិច្ច ដែលធ្លាក់ចុះខ្លាំងដោយសារវិបត្តិជំងឺកូវីដ កញ្ចប់ថវិកាកងទ័ពរបស់ពួកគេ នឹងអាចប្រែប្រួល ថយចុះ ចាប់ពីឆ្នាំ ២០២៣ ប៉ុន្តែ មិនមែននៅឆ្នាំនេះ និងឆ្នាំក្រោយនោះទេ។ ជាក់ស្តែង គិតត្រឹម ខែវិច្ឆិកាចុងឆ្នាំមុន រដ្ឋាភិបាលជាច្រើនមិនបានបង្ហាញចេតនាកាត់បន្ថយកញ្ចប់ថវិកាយោធាសម្រាប់ឆ្នាំ ២០២១នេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ