ភូមា៖ អាជ្ញាធរបិទសេវាអ៊ីនធ័រណិតទាំងស្រុង ដើម្បីបង្អាក់សន្ទុះបាតុកម្មរបស់ប្រជាជន
អាជ្ញាធរភូមា បានកាត់ផ្តាច់សេវាអ៊ីនធ័រណិតទាំងស្រុង នៅទូទាំងប្រទេស ចំនួន២ថ្ងៃជាប់គ្នាហើយ គិតត្រឹមថ្ងៃអង្គារទី១៦កុម្ភៈនេះ ដើម្បីបង្អាក់ រារាំងការជួបជុំធ្វើបាតុកម្ម របស់ប្រជាជនភូមា។ ក្រៅពីបានដាក់ពង្រាយកម្លាំងទាហាន កាន់កាំភ្លើង អមដោយរថពាសដែក ច្រូងច្រាង នៅតាមទីក្រុងធំៗ ក្រុមកងទ័ពភូមា ក៏បានបើកប្រតិបត្តិការ ចុះចាប់មនុស្សជាច្រើន ដើម្បីសំដៅបំបាក់មេចលនាបំផុសបំផុលបាតុកម្ម។
ចុះផ្សាយនៅថ្ងៃ៖
នៅវេលាម៉ោង១រំលងអាធ្រាត្រ យប់ថ្ងៃទី១៥ ឈានចូលទី១៦កុម្ភៈ សេវាអ៊ីនធ័រណិត ទូទាំងប្រទេសភូមា ត្រូវបានកាត់ផ្តាច់។ នេះគឺជាលើកទី៤ហើយ ដែលក្រុមកងទ័ពកាន់អំណាចនៅភូមា បានចេញបញ្ជាឲ្យបិទសេវាអ៊ីនធ័រណិតទូទាំងប្រទេស ដើម្បីរារាំងការចែករំលែកសារ តាមបណ្តាញសង្គម ឲ្យប្រជាជនផុសផុលធ្វើបាតុកម្ម។
លោកស្រី Christine Schraner Burgener ប្រេសីតពិសេស នៃអង្គការសហប្រជាជាតិ ទទួលបន្ទុកកិច្ចការភូមា បានទូរស័ព្ទទៅនិយាយជាមួយលោក សឺ វីន អគ្គបញ្ជាការរងនៃកងទ័ពជាតិភូមា ដោយលោកស្រី បានលើកឡើងថា ភាពរអាក់រអួលដែលជាឧបសគ្គទាំងនេះ គឺជាការរារាំងសិទ្ធិសេរីភាពរបស់ប្រជាជនភូមា ហើយវាផ្ទុយពីគោលការណ៍លទ្ធិប្រជាធិបតេយ្យ។
ក្រៅពីសេវាអ៊ីនធ័រណិត អាជ្ញាធរភូមា បានបើកប្រតិបត្តិការតាមចាប់មនុស្សជាច្រើននាក់ ដែលគេអះអាងថា ជាមេក្លោងឃោសនា ដឹកនាំចលនាបាតុកម្ម។ កម្លាំងទាហានប្រដាប់ដោយអាវុធ និងរថក្រោះជាច្រើនគ្រឿង ត្រូវបានគេដាក់ពង្រាយផងដែរ តាមទីក្រុងនានា តាំងតែពីថ្ងៃអាទិត្យមក។
តែយ៉ាងណាក៏ដោយ លោក មីន កូណាំង ដែលជាអតីតមេដឹកនាំចលនានិស្សិត កាលពីឆ្នាំ១៩៨៨ បានចេញមុខប្រកាស នៅក្នុងសារវីដេអូមួយ ឲ្យប្រជាជនភូមា តាំងចិត្តក្លាហាន កុំតក់ស្លុត ក្រោកឈរឡើងដើម្បីលទ្ធិប្រជាធិបតេយ្យ និងសិទ្ធិសេរីភាព។ លោក មីន កូណាំង ស្ថិតនៅក្នុងចំណោមជនទាំង៧នាក់ ដែលអាជ្ញាធរភូមា បានប្រកាសតាមចាប់ខ្លួន ប៉ុន្មានថ្ងៃចុងក្រោយនេះ។
គិតត្រឹមពេលនេះ មានមនុស្សប្រមាណ៤២០នាក់ ដែលត្រូវបានកងទ័ពចាប់ខ្លួន។ ដោយឡែក សវនាកាកាត់ទោសលោកស្រី អ៊ុងសាន ស៊ូជី នឹងត្រូវបើកធ្វើនៅថ្ងៃពុធ ទី១៧កុម្ភៈ តាមប្រព័ន្ធវីដេអូខុនហ្វឺរិនស៍។ នេះបើផ្អែកតាមការបញ្ជាក់ ពីលោក Khin Maung Zaw មេធាវីរបស់លោកស្រីអ៊ុងសាន ស៊ូជី។ ដោយឡែក លោកTom Andrews តំណាងអង្គការសហប្រជាជាតិ ប្រចាំនៅភូមា បានលើកឡើង នរណាក៏ដឹងច្បាស់ដែរ ថា សវនាកានេះ គឺគ្រាន់តែឆាកល្ខោន រៀបចំដោយក្រុមយោធាភូមាតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ