កូវីដ១៩៖ អាជ្ញាធរចិនចាត់វិធានការបង្អាក់ការធ្វើដំណើរចុះឡើង ក្នុងរដូវកាលចូលឆ្នាំចិន
ជាធម្មតា នៅក្នុងអំឡុងពេលបុណ្យចូលឆ្នាំប្រពៃណីចិន គឺមានប្រជាជនចិន ដែលជាពលករចំណាកស្រុករាប់សិបលាននាក់ ដែលតែងតែធ្វើដំណើរត្រលប់ទៅស្រុកកំណើតជួបជុំគ្រសារ។ ក៏ប៉ុន្តែ នៅឆ្នាំនេះ ដើម្បីបង្ការការឆ្លងរាលដាលនូវកូវីដ១៩ អាជ្ញាធរចិនបានចេញវិធានការមួយចំនួន ដើម្បីទប់កុំឲ្យប្រជាជនធ្វើដំណើរចុះឡើង និងមានវិធានការលើកទឹកចិត្ត ដល់អ្នកដែលមិនធ្វើដំណើរទៅជួបជុំគ្រួសារនៅខេត្តផ្សេងៗផងដែរ។
ចុះផ្សាយនៅថ្ងៃ៖
ស្តាប់ - ០២:១៥
បុណ្យចូលឆ្នាំ គឺជាបុណ្យដ៏សំខាន់បំផុត ក្នុងប្រពៃណីជនជាតិចិន ហើយក៏ជាវិស្សមកាលមួយដ៏សំខាន់ផងដែរ ដើម្បីអនុញ្ញាតឲ្យប្រជាជន អាចឈប់សម្រាក ជួបជុំក្រុមគ្រួសារ។ ប្រជាជនចិនដែលពលករ ឬបុគ្គលិក មកពីខេត្តផ្សេងៗ រាប់សិបលាននាក់ នៅតាមទីក្រុងធំៗនានា ជាធម្មតាតែងតែយកឱកាសនេះ ត្រលប់ទៅលេងស្រុកកំណើត។
បើទោះបីជាការណីឆ្លងរាលដាលកូវីដ១៩ នៅប្រទេសចិន មានការចុះអន់ថយខ្លាំង សឹងតែគ្មានសោះក៏ដោយ តែអាជ្ញាធរចិន មិនបានបន្ធូរបន្ថយការប្រុងប្រយ័ត្ននោះទេ ជាពិសេសនៅក្នុងអំឡុងពេលបុណ្យចូលឆ្នាំ។ វិធានការមួយចំនួនត្រូវបានដាក់ចុះ មានទាំងការរារាំងហាមឃាត់ការធ្វើដំណើរ ឆ្លងកាត់ពីខេត្តមួយទៅខេត្តមួយ និងការលើកទឹកចិត្ត អរគុណចំពោះអ្នកដែលសុខចិត្ត មិនធ្វើដំណើរ។
ក្រុងប៉េកាំង គឺជាតំបន់ដែលមានវិធានការតឹងតែងជាងគេបង្អស់។ អ្នកដែលចង់ធ្វើដំណើរចេញ ឬចូលក្រុងប៉េកាំង គឺត្រូវតែមានលទ្ធផលតេស្តអវិជ្ជមានកូវីដ មុនពេលមកដល់។ ហើយពេលមកដល់ គឺត្រូវស្នាក់នៅដាច់ដោយឡែក១៤ថ្ងៃ ដោយត្រូវធ្វើតេស្តបន្ថែម២ដងទៀត មុននឹងអាចចេញដំណើរទៅណាមកណាបាន។
ចំពោះការលើកទឹកចិត្តប្រជាជនមិនឲ្យធ្វើដំណើរវិញ រដ្ឋាភិបាលចិន បានចំណាយប្រាក់ប្រមាណ ជាង៤០លានយាន់ ដែលស្មើជាង៦លានដុល្លារសហរដ្ឋអាមេរិក។ អំណោយលើកទឹកចិត្តទាំងនោះ គឺមានដូចជាគូប៉ុងបញ្ចុះតម្លៃទំនិញអនឡាញ អំណោយជាកញ្ចប់សេវាទូរស័ព្ទ និងសេវាមើលខ្សែភាពយន្តអនឡាញជាដើម។
ជាការកត់សំគាល់ទូទៅ ក្នុងអំឡុងពេលចូលឆ្នាំចិនឆ្នាំនេះ គេសង្កេតឃើញ ការធ្វើដំណើរក្នុងស្រុក តាមរថភ្លើង និងតាមយន្តហោះ បានធ្លាក់ចុះដល់ទៅ៨០% បើប្រៀបធៀបទៅបុណ្យចូលឆ្នាំ ឆ្នាំមុន។ ស្ថានីយរថភ្លើងធំៗនៅទីក្រុងប៉េកាំង ដែលធ្លាប់តែមានមនុស្សកកកុញណែនណាន់តាន់តាប់ នៅថ្ងៃមុនចូលឆ្នាំមួយថ្ងៃ គឺមានសភាស្ងាត់ប្លែកពីធម្មតា។ តែយ៉ាងណាក៏ដោយ ក៏នៅមានមនុស្សមួយចំនួនតូចដែរ ដែលបានសម្រេចចិត្តធ្វើដំណើរទៅជួបជុំគ្រួសារ ដោយសារក្តីនឹករលឹក អត់ទ្រាំពុំបាន បើទោះបីជាដឹងថាពេលត្រលប់មកវិញ នឹងត្រូវធ្វើតេស្ត ហើយត្រូវធ្វើចត្តាឡីស័កក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ