វ៉ាក់សាំងកូវីដ១៩របស់មន្ទីរពិសោធន៍ចិន Sinopharm មានប្រសិទ្ធិភាព៧៩% តែនៅតែខ្វះទំនុកចិត្ត
ថ្វីបើមានប្រទេសមួយចំនួន ដូចជាហុងគ្រី ឥណ្ឌូណេស៊ី ម៉ារ៉ុក ហ្សកដានី ឬសេណេហ្គាល់ជាដើម បានបញ្ជាទិញវ៉ាក់សាំងកូវីដ១៩ របស់មន្ទីរពិសោធន៍ចិន Sinopharm រួចហើយក៏ដោយ តែវ៉ាក់សាំងនេះ មិនសូវទទួលបានទំនុកចិត្ត ប៉ុន្មានទេ ពីសំណាក់ប្រទេសភាគច្រើន ជាពិសេសនៅអឺរ៉ុប បើប្រៀបធៀបទៅនឹងវ៉ាក់សាំងផ្សេងទៀត របស់មន្ទីរពិសោធន៍ Pfizer/BioNTech Moderna និង AstraZeneca ជាដើម។
ចុះផ្សាយនៅថ្ងៃ៖
ស្តាប់ - ០២:៥៨
នៅថ្ងៃទី៣០ធ្នូ ឆ្នាំ២០២០ មន្ទីរពិសោធន៍ផលិតឱសថចិន Sinopharm បានប្រកាសថា វ៉ាក់សាំងប្រឆាំងកូវីដ១៩របស់ខ្លួន គឺមានប្រសិទ្ធិភាពចំនួន ៧៩.៣៤% ដោយផ្អែកលើការបូកសរុប លទ្ធផលសាកល្បងទ្រង់ទ្រាយធំ ដំណាក់កាលទី៣។ អាជ្ញាធរគ្រប់គ្រងឱសថចិន ក៏បានចេញអាជ្ញាបណ្ណផលិត និងចែកចាយ ទៅឲ្យមន្ទីរពិសោធន៍នេះ។
ផ្អែកតាមការប្រកាសនេះ គឺកម្រិតប្រសិទ្ធិភាពនៃវ៉ាក់សាំងរបស់មន្ទីរពិសោធន៍ចិន Sinopharm មានទាបជាង ប្រសិទ្ធិភាពរបស់វ៉ាក់សាំង នៃមន្ទីរពិសោធន៍អាមេរិក Pfizer/BioNTech និង Moderna ដែលមានសុទ្ធតែជាង៩០%។ តែយ៉ាងណា វ៉ាក់សាំងរបស់ Sinopharm គឺមានកម្រិតប្រសិទ្ធិភាព ខ្ពស់ជាងវ៉ាក់សាំងរបស់មន្ទីរពិសោធន៍អង់គ្លេស AstraZeneca បន្តិច។
អ្វីដែលគេដឹង សម្រាប់ពេលនេះ គឺថា ខុសពីវ៉ាក់សាំង របស់ Pfizer/BioNTech និង Moderna ដែលមានទំរង់ថ្មីស្រឡាង ផ្គុំឡើងដោយបច្ចេកទេស ARN វ៉ាក់សាំងរបស់មន្ទីរពិសោធន៍ចិន Sinopharm គឺជាវ៉ាក់សាំង ដែលមានទំរង់លក្ខណៈសាមញ្ញ ហើយគេធ្លាប់ប្រើជាធម្មតាកន្លងមក ក្នុងវិស័យឱសថសាស្ត្រ។ វ៉ាក់សាំង របស់មន្ទីរពិសោធន៍ចិន Sinopharm និងវ៉ាក់សាំងរបស់មន្ទីរពិសោធន៍អង់គ្លេស AstraZeneca គឺត្រូវបានផលិតឡើង ដោយបច្ចេកទេសដូចគ្នា។
មានន័យថា វ៉ាក់សាំងរបស់មន្ទីរពិសោធន៍ Sinopharm គឺប្រើវិធីធម្មតា ដោយយកមេរោគ កូរ៉ូណាវីរុសប្រភេទថ្មី (Sars-CoV-2) ដែលគេបានសម្លាប់វា ក្នុងកម្រិតតូចមួយ យកទៅចាក់បញ្ចូលទៅក្នុងខ្លួនមនុស្ស ដើម្បីដាស់សរីរាង្គមនុស្ស ឲ្យកម្រើក ហើយផលិតប្រព័ន្ធអង់ទីក័រ ដើម្បីទប់ទល់ជាមួយមេរោគនេះ។ គុណសម្បតិ្តមួយ នៃវ៉ាក់សាំងរបស់មន្ទីរពិសោធន៍ Sinopharm នេះ គឺគេអាចរក្សាទុក ក្នុងទូទឹកកកធម្មតា ក្នុងសីតុណ្ហភាព ចន្លោះពី ២°c ទៅ ៨°c។ វ៉ាក់សាំងកូវីដ១៩ របស់មន្ទីរពិសោធន៍ចិន Sinopharm គឺត្រូវចាក់ចំនួន២ដូស ដោយរំលងគ្នាចំនួន២៨ថ្ងៃ។
តែយ៉ាងណា គិតមកត្រឹមពេលនេះ មានដំណឹងតិចតួចបំផុត ដែលបញ្ជាក់លំអិត ស្តីអំពីលទ្ធផលសាកល្បង របស់វ៉ាក់សាំងចិន Sinopharm។ ដែលប្រការនេះ បានធ្វើឲ្យមានការមិនទុកចិត្ត ពីសំណាក់ប្រទេសមួយចំនួន។ ក្រៅតែពីខ្វះឯកសារលំអិតស្តីពីលទ្ធផលសាកល្បង អ្នកជំនាញមួយបានលើកឡើងថា មន្ទីរពិសោធន៍ផលិតឱសថរបស់ចិន មានបទពិសោធន៍តិចណាស់ ក្នុងការប្រមូលទិន្នន័យ នៃការធ្វើតេស្តសាកល្បងទ្រង់ទ្រាយធំនៅក្រៅប្រទេស ដោយហេតុថា នៅក្នុងស្រុកចិន មិនមានអ្នកជំងឺកូវីដ១៩ច្រើនគ្រប់គ្រាន់ទេ។
មន្ទីរពិសោធន៍ផលិតឱសថចិនខ្លះ ក៏ធ្លាប់ជួបរឿងអាស្រូវផលិតវ៉ាក់សាំងគ្មានគុណភាពផងដែរ។ តែយ៉ាងណា ក្រសួងការបរទេសចិន បានអះអាងកាលពីថ្ងៃសុក្រកន្លងទៅ ថាអាជ្ញាធរចិន មិនបានលេងសើចជាមួយវ៉ាក់សាំងកូវីដ១៩ទេ ពោលគឺអ្នកជំនាញចិន បានធ្វើការយ៉ាងយកចិត្តទុកដាក់បំផុត ហើយធានាថាវ៉ាក់សាំងនេះ មានប្រសិទិ្ធភាពល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ