អ្នកជំនាញWHO ៖ សម្មតិកម្មមេរោគកូវីដធ្លាយពីមន្ទីរពិសោធន៍ មិនគូរឱ្យជឿ
ប្រធានក្រុមអ្នកជំនាញអង្គការសុខភាពពិភពលោក ដែលកំពុងចុះទៅអង្កេតរកប្រភពដើមនៃជំងឺកូវីដ១៩ ហាក់ដូចជាចង់ច្រានចោលសម្មតិកម្មដែលមេរោគកូរ៉ូណាថ្មីធ្លាយចេញពីមន្ទីរពិសោធន៍ចិន។ នៅក្នុងបទសម្ភាសន៍តាមទូរស័ព្ទ ពីទីក្រុងប៉េកាំង ជាមួយភ្នាក់ងារសារព័ត៌មានបារាំង AFP នាថ្ងៃព្រហស្បតិ៍ទី ៤កុម្ភៈ២០២១នេះ លោក Peter Ben Embarek បានអះអាងថា សម្មតិកម្មមេរោគកូវីដធ្លាយពីមន្ទីរពិសោធន៍ សមជាសេណារីយោភាពយន្តខ្លាំងណាស់។
ចុះផ្សាយនៅថ្ងៃ៖
ស្តាប់ - ០២:១៧
បន្ទាប់ពីបានចុះទៅអង្កេតដល់វិទ្យាស្ថានស្រាវជ្រាវមេរោគវ៉ូហាន លោក Peter Ben Embarek ប្រធានក្រុមអ្នកជំនាញអង្គការសុខភាពពិភពលោកបានអះអាងថា គិតមកទល់ត្រឹមពេលនេះ គេពុំមានរកឃើញភស្តុតាងអ្វីមកបញ្ជាក់ និងគួរជឿថាមានករណីធ្លាយមេរោគចេញពីមន្ទីរពិសោធន៍វ៉ូហានទេ។ សម្មតិកម្មដែលមានលេចឮកន្លងមក សមជាសេណារីយោដ៏ល្អសម្រាប់ភាពយន្តឬរឿងភាគ ប៉ុន្តែលោកសន្យា បន្តអង្កេតតាមបែបវិទ្យាសាស្ត្រនិងតាមអង្គហេតុ ដើម្បីអាចទាញសេចក្តីសន្និដ្ឋានចុងក្រោយស្តីអំពីដើមហេតុនាំមានរោគរាតត្បាតសកលបាន។
ជាអ្នកជំនាញផ្នែកសុវត្ថិភាពចំណីអាហារនៅអង្គការសុខភាពពិភពលោក តាំងពីឆ្នាំ២០១០មក លោក Peter Ben Embarek ជាតិដាណឺម៉ាកដែលធ្លាប់ចាត់ទុកវិទ្យាស្ថានស្រាវជ្រាវមេរោគវូហាន ជាដំណាក់កាលទស្សនកិច្ចដ៏សំខាន់ បានបញ្ជាក់ថាបានផ្តោះប្តូរកិច្ចសន្ទនា ដោយត្រង់ទៅត្រង់មកជាមួយ ភាគីចិន និងប្រកបដោយអត្ថប្រយោជន៍សម្រាប់យល់អំពីជំហររបស់ចិន ក្នុងការផ្តល់ព័ត៌មានផ្សេងៗស្តីពីជំងឺកូវីដ១៩ ដែលបានឃើញនិងមានចុះផ្សាយក្នុងសារព័ត៌មាន។
បើតាមលោក Peter Ben Embarek ការអង្កេតនេះមិនអាចផ្តល់ចម្លើយបានពេញលេញអំពីមូលហេតុនៃការរាតត្បាតមែន តែជាជំហានដំបូងដ៏សំខាន់។ បេសកកម្មរបស់លោក និងក្រុមអ្នកជំនាញលើទឹកដីចិន ត្រូវបញ្ចប់នៅសប្តាហ៍ក្រោយ។
សូមបញ្ជាក់ថាអតីតប្រធានាធិបតីអាមេរិក លោក ដូណាល់ត្រាំ ធ្លាប់បានព្រលយភាពសង្ស័យចោទថាមេរោគកូវីដ១៩បានធ្លាយមេរោគ ដោយចេតនាឬអចេតនា ពីវិទ្យាស្ថានស្រាវជ្រាវមេរោគនៅវូហានដែលមានមន្ទីរពិសោធន៍ស្រាវជ្រាវមេរោគប្រភេទP3 និង P4។ មន្ទីរពិសោធន៍P3 សិក្សាស្រាវជ្រាវអំពីមេរោគកំណាចៗមួយចំនួន ដូចជាមេរោគកូរ៉ូណាវីរុសនេះជាដើម។ ចំណែក មន្ទីរពិសោធន៍ P4 មានលក្ខខណ្ឌសន្តិសុខសុវត្ថិភាព កាន់តែខ្ពស់ ទៀត ព្រោះជាកន្លែងធ្វើការស្រាវជ្រាវ មេរោគ ដែលកាចសាហាវកម្រិតខ្លាំង ដូចជាមេរោគ អេបូឡា ជាដើម។ មន្ទីរពិសោធន៍ P4 វូហានបានបើកឲ្យដំណើរការ នៅឆ្នាំ២០១៨ ដោយ សហការបច្ចេកទេសជាមួយអ្នកជំនាញបារាំង។ មុនផ្ទេរតំណែងឱ្យរដ្ឋាភិបាលថ្មី អតីតប្រមុខការទូតអាមេរិក ប៉ុមប៉េអូ បានចង្អុលមុខវិទ្យាស្ថានវូហាននេះម្តងទៀត។ រហូតមកទល់ពេលបច្ចុប្បន្ននេះវិទ្យាស្ថានស្រាវជ្រាវមេរោគវូហានជាចំណុចដ៏ចម្រូងចម្រាសជាងគេបំផុតសម្រាប់ក្រុមអ្នកអង្កេត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ