យោធាភូមាប្រកាសដាក់ប្រទេសក្នុងគ្រាអាសន្នមួយឆ្នាំ ក្រោយការធ្វើរដ្ឋប្រហារនិងចាប់ខ្លួនមេដឹកនាំស៊ីវិល អ៊ុងសាន ស៊ូជី
ទាហានភូមា បានប្រកាសដាក់ប្រទេសក្នុងគ្រាអាសន្ន រយៈពេលមួយឆ្នាំ ក្រោយតែពីការធ្វើរដ្ឋប្រហារទម្លាក់មេដឹកនាំស៊ីវិល និងជាទីប្រឹក្សារដ្ឋ លោកស្រី អ៊ុងសាន ស៊ូជី ដោយជោគជ័យ នៅព្រឹកថ្ងៃចន្ទ១កុម្ភៈនេះ។ ការប្រកាសដាក់ប្រទេសក្នុងគ្រាអាសន្នពេលនេះ គឺដើម្បីគ្រប់គ្រងស្ថានភាពប្រទេសឲ្យបាននឹងនរ ក្រោយមានភាពមិនប្រក្រតីនៅក្នុងការបោះឆ្នោតកាលពីខែវិច្ឆិកា។
ចុះផ្សាយនៅថ្ងៃ៖
ស្តាប់ - ០១:៣៤
យោធាភូមានៅព្រឹកនេះ បានចេញនូវសេចក្តីថ្លែងការណ៍មួយតាមរយៈប្រព័ន្ធផ្សព្វផ្សាយទូរទស្សន៍របស់ ខ្លួន Myawaddy ថាខ្លួនបានសម្រេចដាក់ប្រទេសក្នុងគ្រាអាសន្នរយៈពេលមួយឆ្នាំ ដើម្បីដោះស្រាយ និងគ្រប់គ្រងស្ថានការណ៍តានតឹងដែលកំពុងកើតមាននៅក្នុងប្រទេសភូមា ហើយអំណាចទាំងអស់នឹងត្រូវផ្ទេរឲ្យឧត្តមសេនីយ៍ជាន់ខ្ពស់លោក មិន អ៊ុងឡាង (Min Aung Hlaing) ជាអ្នកកាន់ការបណ្តោះអាសន្ន។ ការប្រកាសដាក់ប្រទេសក្នុងគ្រាអាសន្ននេះ គឺក្រោយពេលដែលយោធាភូមា បានធ្វើរដ្ឋប្រហារទម្លាក់លោកស្រី អ៊ុងសាន ស៊ូជី និងឃុំឃាំងលោកស្រី ព្រមទាំងមន្រ្តីជាន់ខ្ពស់មកពីគណបក្សសម្ព័ន្ធជាតិដើម្បីប្រជាធិបតេយ្យមួយចំនួន ក្រោយតែយោធាភូមាបានរកឃើញថាមានបញ្ហាមិនប្រក្រតីមួយចំនួនកើតចេញពីការបោះឆ្នោតកាលពីថ្ងៃទី៨វិច្ឆិកា២០២០។
បើតាមសេចក្តីថ្លែងការណ៍ពីការដាក់ប្រទេសក្នុងគ្រាអាសន្នពីភាគីយោធាភូមា បានបង្ហាញថា បញ្ជីឈ្មោះអ្នកបោះឆ្នោតដែលប្រើក្នុងពេលបោះឆ្នោតពហុបក្សនៅថ្ងៃទី៨វិច្ឆិកានោះ ត្រូវបានរកឃើញថាមានភាពខុសគ្នាច្រើន ព្រមទាំងបញ្ហាមិនប្រក្រតីមួយចំនួន ហើយគណៈកម្មាធិការរៀបចំការបោះឆ្នោតភូមា នៅតែខកខានក្នុងការដោះស្រាយបញ្ហានោះ។ ការបោះឆ្នោតកាលពីឆ្នាំ២០២០កន្លងទៅ ដែលគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រី អ៊ុងសាន ស៊ូជី ឈ្នះឆ្នោតនិងទទួលបានអាសនៈសភាចំនួន៣៩៧អាសនៈក្នុងចំណោមអាសនៈសរុបចំនួន៤៧៦។
ជាមួយគ្នានេះ ក្រោយការដាក់ប្រទេសក្នុងគ្រាអាសន្ន ជើងហោះជើរក្នុងស្រុកត្រូវផ្អាកមួយរយៈ ហើយព្រលានយន្តហោះអន្តរជាតិនៅទីក្រុងយ៉ង់ហ្គោនក៏ត្រូវបានបិទ។ មិនតែប៉ុណ្ណោះសេវាទូរស័ព្ទ និងប្រព័ន្ធអ៊ីនធឺណែតត្រូវបានកាត់ផ្តាច់នៅតាមទីក្រុងធំៗនៃប្រទេសភូមា។ នេះបើយោងតាមសារព័ត៌មានរ៉យទ័រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ