ភូមា៖ សហគមន៍អន្តរជាតិ ថ្កោលទោសរដ្ឋប្រហារ និងទាមទារឲ្យដោះលែងលោកស្រីអ៊ុងសាន ស៊ូជី
ក្រោយហេតុការណ៍រដ្ឋប្រហារយោធានៅភូមា នៅថ្ងៃទី១កុម្ភៈ ប្រតិកម្មអន្តរជាតិបានធ្លាក់មកជាបន្តបន្ទាប់ ដោយបានសម្តែងការព្រួយបារម្ភ អំពីអនាគតនៃលទ្ធិប្រជាធិបតេយ្យនៅភូមា។ សហគមន៍អន្តរជាតិ បានអំពាវនាវឲ្យក្រុមយោធាភូមា គោរពសន្លឹកឆ្នោតរបស់ប្រជាជន ព្រមទាំងបានទាមទារឲ្យដោះលែង លោកស្រីអ៊ុងសាន ស៊ូជី នឹងមនុស្សឯទៀត ជាបន្ទាន់។
ចុះផ្សាយនៅថ្ងៃ៖
ស្តាប់ - ០២:៥៥
ស្ថានភាពចលាចលនយោបាយនៅភូមា កំពុងតែធ្វើឲ្យសហគមន៍អន្តរជាតិ ព្រួយបារម្ភបំផុត។ ពន្លកអនាគតនៃលទ្ធិប្រជាធិបតេយ្យ ដែលទើបតែបានចាប់លាស់បានបន្តិច ក៏ស្រាប់តែត្រូវបានគេក្តិចទៅវិញ ដោយការធ្វើរដ្ឋប្រហារយោធា ជាថ្មីម្តងទៀតនៅថ្ងៃទី១កុម្ភៈ។
លោក អង់តូនីញ៉ូ ហ្គូតទែស អគ្គលេខាធិការអង្គការសហប្រជាជាតិ បានលើកឡើងថា ការប្រកាសប្រមូលក្តោបក្តាប់អំណាចទាំងស្រុង ពីសំណាក់ក្រុមយោធា នឹងបំផ្លាញដល់ការធ្វើកំណែទម្រង់ ប្រជាធិបតេយ្យ នាប៉ុន្មានឆ្នាំចុងក្រោយនេះ។ លោកបាន ថ្លែងថ្កោលទោសផងដែរ ចំពោះការចាប់ខ្លួនលោកស្រី អ៊ុងសាន ស៊ូជី ព្រមទាំងអ្នកនយោបាយជាច្រើនរូបទៀត នៅក្រោយហេតុការណ៍រដ្ឋប្រហារ។
ដូចគ្នាដែរ លោក Charles Michel ប្រធានក្រុមប្រឹក្សាអឺរ៉ុប បានសរសេរលើទំព័រTwitter ថា តាងនាមឲ្យសហភាពអឺរ៉ុប លោកសូមថ្កោលទោស យ៉ាងម៉ឺងម៉ាត់បំផុត ចំពោះការធ្វើរដ្ឋប្រហារ ព្រមទាំងការចាប់ខ្លួនលោកស្រីអ៊ុងសាន ស៊ូជី និងអ្នកនយោបាយផ្សេងទៀត។ លោកបន្តថា លទ្ធផលនៃការបោះឆ្នោតបែបប្រជាធិបតេយ្យ ត្រូវតែទទួលបានការគោរពទទួលយក។ ចំណែកលោក Josep Borrell ប្រមុខការទូតសហភាពអឺរ៉ុប បានលើកឡើងថា ប្រជាជនភូមាត្រូវការលទ្ធិប្រជាធិបតេយ្យ ហើយសហភាពអឺរ៉ុប នឹងនៅជាមួយប្រជាជនភូមាជានិច្ច។
ចំណែកលោក បូរីស ចនសុន នាយករដ្ឋមន្ត្រីអង់គ្លេស បានសរសេរលើTwitter ថា លោកថ្កោលទោស រដ្ឋប្រហារយោធារបស់កងទ័ពភូមា និងថ្កោលទោសចំពោះការចាប់ឃុំខ្លួនលោកស្រីអ៊ុងសាន ស៊ូជី ព្រមទាំងអ្នកទោសនយោបាយឯទៀត។ លោក Jen Psaki អ្នកនាំពាក្យសេតវិមានអាមេរិកវិញ បានបញ្ជាក់ថា សហរដ្ឋអាមេរិកប្រឆាំងចំពោះការកែប្រែលទ្ធផលបោះឆ្នោត ដែលប្រជាជនភូមាបានសម្រេចដោយសេរី កាលពីថ្ងៃទី៨វិច្ឆិកា។ លោកថា សហរដ្ឋអាមេរិក នឹងចាត់វិធានការ ទៅលើក្រុមមនុស្ស ដែលដឹកនាំការធ្វើរដ្ឋប្រហារនេះ។
ដូចគ្នាដែរ លោក Gabriel Attal អ្នកនាំពាក្យរដ្ឋាភិបាលបារាំង បានថ្លែងនៅតាមវិទ្យុ នៅព្រឹកថ្ងៃទី១កុម្ភៈនេះថា រដ្ឋាភិបាលបារាំង សូមអំពាវនាវឲ្យកងទ័ពភូមា ត្រូវដោះលែងមនុស្សទាំងអស់ ហើយទទួលស្គាល់លទ្ធផលបោះឆ្នោត ដែលប្រជាជនភូមាបានសម្រេចចិត្ត។ លោកបានអះអាងថា រដ្ឋាភិបាលបារាំង កំពុងពិភាក្សា ជាមួយដៃគូ និងស្ថាប័នអន្តរជាតិឯទៀត ដើម្បីរកយន្តការអន្តរជាតិ ជួយស្រោចស្រង់លទ្ធិប្រជាធិបតេយ្យភូមា។ រដ្ឋាភិបាលជប៉ុន សិង្ហបុរី ឥណ្ឌា និងអូស្ត្រាលីជាដើម សុទ្ធតែបានសម្តែងការព្រួយបារម្ភ អំពីការរលត់រលាយ នូវការរីកចំរើនបង្គួរ នៃលទ្ធិប្រជាធិបតេយ្យនៅភូមា។
ដោយឡែក លោក Wang Wenbin អ្នកនាំពាក្យក្រសួងការបរទេសចិន មិនបានថ្លែងថ្កោលទោសឲ្យចំៗ ទៅលើការធ្វើរដ្ឋប្រហារយោធានេះទេ ដោយលោកលើកឡើងថា ចិនកំពុងតែសង្កេតតាមដាន ដើម្បីស្វែងយល់ស្ថានការណ៍នយោបាយ នៅភូមាឲ្យបានច្បាស់។ លោកបន្ថែមថា រដ្ឋាភិបាលចិន អំពាវនាវឲ្យគ្រប់ភាគីនយោបាយភូមា ត្រូវស្វែងរកដំណោះស្រាយ ដោយឈរលើក្របខណ្ឌរដ្ឋធម្មនុញ្ញ និងច្បាប់ជាធរមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ